A fosi brifi fu Petrus

2 Dati meki un musu tapu nanga ala den ogri di unu e du. No bedrigi trawan, no hoigri, no dyarusu èn no taki ogri fu trawan. 2 Neleki fa nyunyun beibi e angri fu dringi bobimerki,* na so un musu angri fu a wortu fu Gado. Disi o yepi unu fu gro èn fu kisi ferlusu. 3 Ma dati o psa soso te unu si* taki Masra bun.

4 En na a libilibi ston di libisma no ben wani, ma Gado teki en fu di a prenspari gi en. Fu di unu kon na en, 5 meki unu srefi tron libilibi ston tu. Unu kon tron wan oso di a yeye fu Gado e bow. Na so unu kan de santa priester èn unu kan tyari ofrandi gi Gado fu di en yeye de nanga unu. Yesus Krestes e meki taki unu kan tyari den ofrandi disi di Gado lobi. 6 Bika Gado Buku taki: „Luku, mi e poti wan ston na ini Sion. Mi srefi teki en èn mi poti en leki wan prenspari ukuston fu a fundament. A sma di e bribi na ini en, noiti o kisi syen.”

7 Fu dati ede a ston disi prenspari gi unu di e bribi. Ma dati no de so gi den sma di no e bribi. Gado Buku taki: „A ston di den bowman no ben wani, na a wan dati tron a moro prenspari ukuston”,* 8 èn a de „wan ston di e meki sma stotu den futu èn wan bigi ston di e meki sma fadon”. Den sma disi e stotu den futu fu di den no e du san a wortu e taki. Na dati o psa nanga den sortu sma disi. 9 Ma unu na „wan spesrutu grupu sma di Gado teki, wan grupu priester di o tiri leki kownu, wan santa pipel èn wan pipel di de wan spesrutu gudu. Gado teki unu so taki unu kan ferteri na ala sei fu den kfalek moi fasi” fu en.* En na a sma di kari unu kmoto na ini a dungru fu kon na ini a moi leti fu en. 10 Bika fosi, unu no ben de Gado pipel, ma now unu na en pipel. Fosi, Gado no ben abi sar’ati nanga unu, ma now a abi sar’ati nanga unu.

11 Lobi brada nanga sisa, unu de leki trakondre sma di e libi wan syatu pisi ten na ini a grontapu disi. Mi e gi unu a dek’ati fu no gi unsrefi abra na den takru lostu fu a sondu skin di e tan feti nanga unu. 12 Tan tyari unsrefi na wan bun fasi na mindri den grontapusma. Na so den o si den bun sani di unu e du, awinsi den e kosi unu taki unu na ogriman. Dan den o gi Gado glori na a dei te a o kon ondrosuku san wi e du.

13 Fu Masra ede un musu saka unsrefi na ondro den sma di e tiri unu, awinsi na wan kownu di hei moro unu, 14 noso awinsi na den granman di a poti fu strafu den ogriman èn fu prèise den sma di e du bun. 15 Bika disi na san Gado wani: un musu du bun, so taki unu kan tapu a mofo fu den don sma di e taki lawlaw sani. 16 Unu na sma di fri, ma dati no wani taki unu fri fu du ogri.* Na presi fu dati un musu dini Gado leki srafu. 17 Gi grani na ala sortu sma, lobi ala brada,* lespeki Gado èn gi a kownu grani.

18 Den futuboi musu saka densrefi nanga ala lespeki na ondro den basi fu den. Den no musu saka densrefi nomo na ondro den bun basi di no e aksi tumsi furu fu den, ma den musu saka densrefi tu na ondro den wan di muilek. 19 Bika te wan sma e hordoro te tesi miti en* èn a e nyan pina fu di a wani du san Gado wani,* dan dati e meki Gado prisiri. 20 Efu unu e hordoro te unu e kisi fonfon fu wan ogri di unu du, dan a no wan kfalek sani. Ma efu unu e hordoro te unu e nyan pina fu di unu e du bun, dan Gado o breiti nanga unu.

21 Te yu luku en bun, dan na fu dati ede Gado kari unu. Bika srefi Krestes ben nyan pina gi unu èn a libi wan eksempre gi unu, so taki unu kan waka soifri na en baka. 22 A no ben du nowan sondu èn a no ben taki nowan sani fu kori sma. 23 Te sma ben e kosi* en, a no ben e kosi* den baka. Te sma ben e pina en, a no ben e taigi den taki a ben o du ogri nanga den baka, ma a ben libi ala sani gi a sma di e krutu sani na wan reti fasi. 24 Di a ben de na a postu,* dan en srefi teki den sondu fu wi na en tapu, so taki wi no ben o abi noti fu du moro nanga sondu èn wi ben o libi na wan reti fasi. „Na den soro fu en, meki unu kon betre”, 25 bika unu ben de leki skapu di lasi pasi. Ma now unu drai kon baka na un skapuman èn a sma di e luku taki sani waka bun nanga unu.