Markus skrifi en

15 Fa yu si dei broko, den edeman fu den priester makandra nanga den fesiman nanga den leriman fu a Wet èn srefi ala den krutuman fu a Grankrutu, kon makandra fu luku san den ben o du. Ne den tai Yesus anu èn den tyari en go na Pilatus. 2 Dan Pilatus aksi en: „Na yu na a Kownu fu den Dyu?” Yesus piki en: „Yusrefi taki dati.” 3 Ma den edeman fu den priester ben e taki furu ogri fu en. 4 Dati meki Pilatus aksi en baka: „Yu no e piki? Luku omeni ogri den e taki fu yu.” 5 Ma Yesus no piki en moro. Dati meki Pilatus ferwondru.

6 Na ibri Paskafesa Pilatus ben abi a gwenti fu lusu wan strafman èn a pipel ben kan taki suma a ben musu lusu. 7 Na a ten dati, Barabas nanga wan tu tra ogriman di ben opo densrefi teige den tiriman ben de na straf’oso. Fu di den ben kiri sma, meki den ben sroto den. 8 Ne a pipel kon drape èn den aksi Pilatus fu du san a ben gwenti du gi den. 9 Pilatus aksi den: „Unu wani taki mi lusu a Kownu fu den Dyu gi unu?” 10 A ben taki disi, fu di a ben sabi taki na dyarusu ben meki taki den edeman fu den priester tyari Yesus kon gi en. 11 Ma den edeman fu den priester sutu faya gi a pipel meki den taigi Pilatus fu lusu Barabas gi den na presi fu Yesus. 12 Pilatus piki den baka: „Dan san mi musu du nanga a sma di unu e kari a Kownu fu den Dyu?” 13 Ete wan leisi den bari: „Spikri en na wan postu!” 14 Ma Pilatus aksi den baka: „Fu san ede? Sortu ogri a du?” Ma den bari moro tranga: „Spikri en na wan postu!” 15 Di Pilatus yere disi, a lusu Barabas gi a pipel, fu di a ben wani plisi den. Dan a meki den wipi Yesus èn a meki den tyari en gwe fu go spikri na wan postu.

16 Baka dati, den srudati tyari Yesus go na ini a dyari di ben de na mindrisei fu na oso fu a granman èn den kari a heri legre kon drape. 17 Den weri wan paars krosi gi en, den brei wan krans fu makataki, dan den poti en na tapu en ede. 18 Dan den taki: „Fa a e go, Kownu fu den Dyu!” 19 Den ben e naki en na tapu en ede tu nanga wan tiki èn den ben e spiti na en tapu. Dan den saka kindi boigi gi en. 20 Te fu kba, di den kba spotu en, den puru a paars krosi na en skin èn den weri en krosi gi en. Baka dati den tyari en go na dorosei fu spikri en na wan postu. 21 Na a srefi ten dati wan man fu Sireine ben kmoto na boiti. A ben nen Simon èn a ben de a p’pa fu Aleksander nanga Rufus. Di den si a e waka psa, den dwengi en fu tyari a postu* fu Yesus.

22 Na so den tyari Yesus go na a presi Golgota, san wani taki „Dede-ede Presi”. 23 Drape den pruberi fu gi en win di moksi nanga mirre fu tapu a skin-ati, ma a no teki en. 24 Dan den spikri en na wan postu èn den iti lot fu kan prati den krosi fu en èn fu luku suma ben o kisi sortu pisi krosi. 25 A ben de wan ten fu neigi yuru m’manten di den spikri en na wan postu. 26 Na loktusei fu en den ben skrifi fu san ede den krutu en. Disi na san den skrifi: „Kownu fu den Dyu.” 27 Boiti dati den ben anga tu fufurman na postu na en sei, wán na en ret’anusei èn a trawan na en kruktu-anusei. 28* —— 29 Den sma di ben e waka psa ben taigi en wan lo hati sani, den ben e seki den ede èn den ben e taki: „A no yu ben o broko a tempel puru èn bow en baka na ini dri dei? 30 Yepi yusrefi noh! Saka kmoto fu a postu.”* 31 Den edeman fu den priester nanga den leriman fu a Wet ben e spotu en tu. Den taki: „A yepi tra sma, ma a no man yepi ensrefi! 32 Meki Krestes, a Kownu fu Israel, saka kmoto fu a postu* now, so taki wi kan si èn bribi.” Srefi den man di ben anga na den postu na en sei ben e spotu en tu.

33 Na wan ten fu 12 yuru brekten a heri kondre kon dungru èn a dungru hori teleki wan ten fu 3 yuru bakadina. 34 Dri yuru bakadina Yesus bari bun tranga: „Eli, Eli, lama sabaktani?” Disi wani taki: „Mi Gado, mi Gado, fu san ede yu gwe libi mi?” 35 Di sonwan fu den sma di ben e tnapu drape yere disi, den taki: „Luku! A e kari Elia.” 36 Dan wan sma lon go nati wan spons nanga swa win, a poti en na wan tiki èn a gi Yesus fu dringi. A taki: „Wakti! Kow si efu Elia o kon puru en.” 37 Ne Yesus bari bun tranga, dan a dede.* 38 Dan a garden fu a tempel priti na tu fu tapsei te na ondrosei. 39 Di a legre-edeman di ben e tnapu drape e luku en, si san psa di Yesus dede, a taki: „A man disi ben de Gado Manpkin trutru.”

40 Wan tu uma ben tnapu moro fara e luku. Maria Magdalena ben de wan fu den. Maria, a m’ma fu Yakobus a Pkinwan èn fu Yoses, nanga Salome ben de drape tu. 41 Den uma disi nanga wan lo tra uma ben kon nanga Yesus na Yerusalem. Den ben gwenti waka nanga Yesus èn di a ben de na Galilea den ben e yepi en nanga den sani di a ben abi fanowdu.

42 A ben de latlati bakadina kba, ma fu di a ben de a dei di den e sreka sani gi a Sabat, dati na a dei fosi Sabat-dei, 43 meki Yosef fu Arimateya teki dek’ati fu go aksi Pilatus a dedeskin fu Yesus. Yosef ben de wan lespeki memre fu a Grankrutu fu den Dyu èn ensrefi ben e ferwakti a Kownukondre fu Gado. 44 Ma fu di Pilatus ben wani sabi efu Yesus dede kba, meki a seni kari a legre-edeman èn a aksi en efu Yesus dede kba. 45 Di a legre-edeman taigi en taki Yesus dede kba, a meki Yosef teki a dedeskin. 46 Dan Yosef go bai linnen-krosi,* a puru Yesus fu a postu, a domru en na ini a linnen-krosi èn a poti en na ini wan grebi di den ben diki na ini wan stonbergi. Dan a lolo wan ston poti na a mofo fu a grebi. 47 Ma Maria Magdalena nanga Maria, a m’ma fu Yoses, ben e tan luku pe den ben poti en.