A fosi brifi gi den Tesalonikasma

2 Brada nanga sisa, unu srefi sabi heri bun taki wi no ben kon na unu fu soso. 2 Soleki fa unu sabi, dan den sma na Filipi ben pina wi èn den du sani nanga wi fu gi wi syen. Ma baka dati a Gado fu wi gi wi dek’ati fu ferteri unu a bun nyunsu fu en, aladi sma ben e gens wi hebi.* 3 Wi no e gi unu fowtu rai. Wi no e gi unu rai tu nanga takru prakseri noso fu bedrigi unu. 4 Ma fu di na Gado ben feni en bun fu gi wi a wroko fu preiki a bun nyunsu, meki wi no e preiki fu plisi libisma, ma fu plisi Gado di e ondrosuku wi ati.

5 Fu taki en leti, unu sabi taki noiti wi no kori sma nanga moi wortu èn noiti wi du leki wi na bun sma soso fu kisi wini gi wisrefi. Gado srefi si! 6 Wi no ben suku fu kisi glori fu libisma tu. Wi no ben suku en na unu èn wi no ben suku en na tra sma tu. Leki apostel fu Krestes wi ben kan tron wan hebi gi unu, fu di unu ben o abi fu pai furu moni fu sorgu wi. 7 Ma na presi fu dati, wi ben sori switifasi gi unu, leki te wan m’ma e gi en eigi pkin bobi èn e sorgu en nanga lobi. 8 We, fu di wi lobi unu trutru, meki wi no ben prisiri fu ferteri unu a bun nyunsu fu Gado w’wan, ma wi ben de klarklari tu fu dede gi unu, bika wi ben kon lobi unu srefsrefi.

9 Mi brada, mi de seiker taki unu no fergiti fa wi ben wroko tranga èn fa wi ben meki furu muiti. Wi ben e wroko dei nanga neti, fu di wi no ben wani taki wan fu unu pai furu moni fu sorgu wi. Wi no ben wani de wan hebi gi unu te wi ben e preiki a bun nyunsu fu Gado gi unu. 10 Unu sabi èn Gado srefi sabi tu, taki di wi ben de nanga unu di de bribiman, wi ben tai hori na unu èn wi ben du san reti. Unu no ben man feni fowtu na wi tapu. 11 Unu sabi heri bun taki wi tan gi unu rai, wi tan trowstu unu èn wi tan sori ibriwan fu unu fa unu musu libi, neleki fa wan p’pa e du nanga den pkin fu en. 12 Na so unu ben kan tan tyari unsrefi na wan fasi di Gado feni bun. Na en e kari unu fu kon na ini en Kownukondre èn fu kisi a glori fu en.

13 Iya, na fu dati ede wi e taki Gado tangi ala ten tu, bika di unu yere a wortu fu Gado di wi ben preiki gi unu, dan unu no teki a wortu leki a wortu fu libisma, ma leki a wortu fu Gado èn na dati a de trutru. A wortu dati abi furu krakti tu na tapu unu di de bribiman. 14 Brada nanga sisa, unu ben teki na eksempre fu den gemeente fu Gado di de na Yudea èn di de wán nanga Krestes Yesus. Neleki fa den Dyu ben pina den brada na Yudea, na so un eigi kondreman pina unu tu. 15 Srefi Masra Yesus den Dyu dati kiri neleki fa den ben gwenti kiri den profeiti, èn den du ogri nanga wi. Boiti dati, den no e du sani di e meki Gado prisiri èn den no e suku a bun fu trawan. 16 Den e pruberi fu tapu wi fu no preiki gi den trakondre sma so taki den sma dati kan kisi ferlusu. Na so den e lai moro sondu na tapu densrefi. Ma te fu kba, Gado puru atibron na den tapu.

17 We brada nanga sisa, di sma dwengi wi fu gwe libi unu, a ben de fu wan syatu pisi ten nomo (awinsi wi no ben kan de nanga unu, ma tòg wi tan prakseri unu). Ma wi du bun furu muiti fu miti unu fu di wi ben angri fu si unu.* 18 Na fu dati ede wi ben wani kon na unu. Iya mi, Paulus, suku fu kon. A no wán leisi nomo, ma tu leisi srefi. Ma Satan tapu pasi gi wi. 19 San na a sani di e gi wi howpu, san e gi wi prisiri èn sortu pai* wi kisi di o meki wi prisiri te wi Masra Yesus kon? We, a no unu dan? 20 Fu tru, unu na wi glori nanga wi prisiri.