Psalm
Prèise a nen fu Yehovah.
Un futuboi fu Yehovah, un prèise en,
2 unu di e wroko na ini na oso fu Yehovah,
iya, unu di de na ini den dyari lontu na oso fu wi Gado.
3 Prèise Yah, bika Yehovah bun.
Singi fu prèise* a nen fu en, bika en nen e gi wi prisiri.
4 Yah teki Yakob leki en futuboi.
A teki Israel leki a spesrutu gudu fu en.
5 Mi sabi heri bun taki Yehovah na wan bigi Gado.
A Masra fu wi bigi moro ala tra gado.
6 Yehovah e du ala san a wani
na ini hemel èn na grontapu, na ini se èn na ini ala den dipi pisi fu a se.
7 Te na den moro farawe presi fu grontapu a e meki wolku* opo go na loktu.
A e meki bliksem koti te alen e fadon.*
A e meki winti wai kmoto na den maksin fu en.
8 A kiri den fosi pkin na ini Egepte,
den fosi pkin fu libisma nanga meti.
9 Un sma fu Egepte, a du bigi sani nanga wondru na un mindri.
A meki den sani disi psa nanga a kownu fu Egepte èn nanga ala den futuboi fu en.
10 A puru furu pipel na pasi
èn a kiri makti kownu.
11 A kiri Kownu Sihon fu den Amorietsma
nanga Kownu Ok fu Basan
èn a wini ala den kownukondre fu Kanan.
12 A teki a kondre fu den sma disi
èn a gi en pipel Israel a kondre dati leki gudu.
13 Yehovah, yu nen e tan fu ala ten.
Yehovah, fu ala ten sma o memre yu.*
15 Den gado fu den pipel fu grontapu na fu solfru nanga gowtu,
sani di libisma anu meki.
16 Den abi mofo, ma den no man taki.
Den abi ai, ma den no man si.
17 Den abi yesi, ma den no man yere.
Den no man hari bro nanga a noso fu den.
18 Den sma di e meki den o kon de leki den.
Na dati o psa tu nanga ala den sma di e fertrow na den tapu.
19 Un Israelsma, un prèise Yehovah.
Un sma fu Aron, un prèise Yehovah.
20 Un sma fu Leifi, un prèise Yehovah.
Un sma di abi bigi lespeki gi Yehovah, un prèise Yehovah.
21 Un alamala di de na Sion,
un prèise Yehovah di e tan na Yerusalem.
Prèise Yah!