Yesaya
63 Suma na a sma di e kon fu Edom?
Suma e kmoto fu Bosra nanga brenki krosi?*
A weri krosi di moi srefsrefi
èn a e waka kon leki wan tranga man.
„Mi na a sma dati. Mi e taki san reti
èn mi abi furu makti fu ferlusu sma.”
2 Fu san ede den krosi fu yu redi
neleki den krosi fu wan sma di e masi droifi?
3 „Na mi w’wan trapu den droifi fu masi den.
Nowan sma ben de nanga mi.
Nanga atibron mi tan masi den,
iya, nanga bigi atibron mi trapu den.
A brudu fu den spoiti kon tapu mi krosi
èn now mi flaka ala mi krosi.
5 Mi ben e luku lontu, ma nowan sma ben de nanga mi.
Mi no ben man bribi taki nowan sma ben wani horbaka gi mi.
Fu dati ede mi langa mi anu fu tyari ferlusu kon.*
Na fu di mi ati bron, meki mi du wan sani.
6 Nanga atibron mi trapu na tapu den pipel
èn mi meki den dringi mi bigi atibron teleki den kon drungu.
Mi meki a brudu fu den lon na gron.”
7 Mi o taki fu den bun sani di Yehovah du.*
Mi o prèise Yehovah
gi ala den sani di a du gi wi.
Iya, mi o taki fu den furu bun sani di Yehovah du gi den Israelsma,
fu di a sari den èn fu di a abi bun-ati* psa marki.
8 A taki: „Fu tru, den na mi pipel. Den na manpkin di no o drai baka gi mi.”
Dati meki a tron den Ferlusuman.
9 Te den ben e pina, dan en srefi ben e firi en tu.
En eigi boskopuman* ferlusu den.
Fu di a lobi den èn fu di a e firi gi den, meki a bai den baka.
A opo den èn a tyari den sensi owruten.
10 Ma den opo densrefi teige en èn den meki a santa yeye fu en sari.
Dati meki a tron den feanti
èn a bigin feti nanga den.
11 Dan den bigin prakseri fa a ben de fosten
na a ten fu en futuboi Moses.
Den prakseri: „Pe a sma de di tyari a pipel psa a se, makandra nanga den skapuman fu en pipel?
Pe a sma de di poti en santa yeye na en tapu?
12 Pe a sma de di horbaka gi Moses nanga en bigi krakti?*
Pe a sma de di prati a watra gi den,
so taki sma ben o memre en nen fu ala ten?
13 Pe a sma de di meki den waka psa na ini a krasi se*
èn di meki den waka sondro fu stotu den futu
leki asi na ini a sabana?
14 Neleki fa meti e saka go na ini wan lagipresi fu rostu,
na so a yeye fu Yehovah tyari den go rostu.”
Na so yu tyari a pipel fu yu,
so taki sma kan gi yu bigi nen glori.
15 Yu de na yu moi tanpresi di santa èn di de hei na ini hemel.
Ma grantangi, luku kon na ondro.
Fu san ede yu no e poti prakseri na wi moro? Fu san ede yu no e gebroiki yu krakti moro?
Fu san ede yu no e firi gi wi? Fu san ede yu no abi sar’ati gi wi?
Yu no e luku wi moro.
16 Ma yu na wi P’pa.
Iya, yu na wi P’pa Yehovah,
aladi Abraham no ben sabi wi
èn Israel no ben sabi suma na wi.
Yu na a sma di bai wi baka langa ten psa.
17 Tye Yehovah, fu san ede yu meki wi kmoto na yu pasi?
Fu san ede yu meki wi kon tranga-ede,* so taki wi no e frede yu?
Grantangi, drai kon baka fu den futuboi fu yu ede.
Drai kon baka gi den lo di de fu yu.
18 Fu wan syatu pisi ten yu santa pipel ben abi a kondre.
Ma den feanti fu wi pori yu santa presi.
19 Wan heri pisi ten kba wi de leki wan pipel di yu no ben e tiri noiti
èn leki wan pipel di no ben e tyari yu nen noiti.