A di fu tu brifi gi den Korentesma
10 Mi, Paulus, e begi unu fu teki den rai di mi e gi unu. Te mi e taki nanga unu mi e du dati na wan switifasi èn nanga sakafasi neleki Krestes. Ma sonwan fu unu feni taki te mi no de nanga unu mi no e frede fu taigi unu sani, ma te mi de nanga unu, dan mi no kfalek so. 2 Mi howpu taki den sma di feni taki wi e tyari wisrefi leki grontapusma kenki den denki, so taki te mi doro mi no abi fu pir’ai gi den. 3 Aladi wi na libisma, tòg wi no e feti na a fasi fa grontapusma e feti. 4 Bika den fetsani di wi e gebroiki fu feti no de leki di fu den sma fu a grontapu disi, ma wi kisi den fu Gado. Den tranga so te, taki den man broko iniwan sani di tnapu steifi leki wan fortresi.* 5 Den sani di wi e broko na den fowtu denki fu sma èn iniwan sani di e tapu sma fu kon sabi Gado. Wi e meki ala den denki disi kon de leki strafman èn wi e meki den du san Krestes taki. 6 Te unu sori taki unu e gi yesi na ini ala sani, dan wi no o draidrai fu strafu iniwan sma di trangayesi na a wan noso tra fasi.
7 Unu e si soso den sani di ai man si. Efu wan sma de seiker taki en na wan bakaman fu Krestes, dan meki a hori na prakseri taki wi na bakaman fu Krestes tu, neleki en. 8 Masra no gi wi a reti fu broko unu saka, ma fu tranga unu. Sobun, awinsi mi ben o meki bigi fu dati pkinso moro leki san fiti, tòg mi no ben o kisi syen. 9 Mi no wani meki unu denki taki mi skrifi unu den brifi fu meki unu frede. 10 Bika sma e taki: „A e skrifi ala sortu kfalek brifi, ma te a de na wi fesi dan a no kfalek so èn a no sabi taki bun srefi.” 11 Ma meki den sma dati hori na prakseri taki te wi kon na unu, wi o du san wi skrifi na ini den brifi di wi ben seni gi unu. 12 Bika wi no wani de leki son sma di e hei densrefi èn wi no wani teki wisrefi gersi nanga den kwetkweti. Den abi den eigi prakseri fu san bun èn nanga dati den e krutu densrefi. Na so den e sori taki den don.
13 Wi no o meki bigi fu a wroko di wi no du. Wi o meki bigi soso fu san wi ben man du na ini a wroko di Gado gi wi. Wan fu den sani dati na taki wi ben musu preiki gi unu tu. 14 Di wi kon na unu, dan wi du nomo san Gado ben taigi wi fu du. Wi ben de den foswan di ben kon te na unu fu ferteri unu a bun nyunsu fu Krestes. 15 Nôno, wi no e meki bigi fu a wroko di wi no du èn wi no e meki bigi fu a wroko di tra sma du. Ma wi howpu taki a bribi fu unu o kon moro tranga, so taki unu o abi moro warderi gi a wroko di wi kisi fu du. Dan wi o du moro srefi. 16 Wi o go preiki a bun nyunsu na den kondre di de moro fara leki a di fu unu. Na so wi no o meki bigi fu a wroko di tra sma du kba na ini tra kontren. 17 „Ma meki a sma di e meki bigi, du dati gi Yehovah.”* 18 Bika a no te wan sma e prèise ensrefi, dan Yehovah* e feni en bun, ma na te Gado srefi e prèise en.