A fosi brifi gi Timoteyus

6 Meki ala den wan di de srafu tan sori den basi fu den ala lespeki, so taki noiti sma no taki ogri fu a nen fu Gado èn fu a leri fu en. 2 Boiti dati, den srafu di abi basi di de na bribi no musu wiswasi den soso fu di den na brada fu den. Ma na presi fu dati den musu wroko moro tranga srefi, bika den wan di e kisi wini fu a bun wroko di den e du, na Kresten tu nanga lobi brada fu den.

Tan leri sma den sani disi èn tan gi den ala den rai disi. 3 Efu wan sma e kon nanga wan tra leri èn a no e agri nanga a soifri leri di e kon fu wi Masra Yesus Krestes, noso efu den sani di a e leri sma no e gi den dek’ati fu dini Gado fayafaya, 4 dan a sma dati abi bigifasi èn a no e ferstan noti. A wan-enkri sani di a e prakseri na fu meki trobi èn fu hartaki fu wortu. Den sani disi e tyari dyarusu nanga kesekese kon èn den e meki sma taki ogri fu trawan.* Den e meki sma prakseri ogri fu trawan tu. 5 Den e meki taki man di abi soso takru prakseri èn di no sabi fa sani de trutru, e meki trobi ala yuru fu pkinpkin sani. Den man disi e dini Gado fayafaya soso fu kan kisi wini gi densrefi. 6 A tru taki wan sma e kisi furu wini te a e dini Gado fayafaya, ma dati o psa soso te a de tevrede nanga san a abi, 7 bika wi no tyari noti kon na grontapu èn wi no man tyari noti gwe tu. 8 Sobun, efu wi abi n’nyan nanga krosi,* dan wi musu de tevrede nanga den sani disi.

9 Ma den sma di wani kon gudu nomonomo e kisi tesi èn den e fadon go na ini wan trapu. Den e kisi ala sortu takru lostu èn den e go du ala sortu dondon sani di o meki taki den kisi pori, 10 bika lobi gi moni na a rutu fu ala sortu ogri. Fu di son sma kweki a lobi dati, meki den gwe libi a bribi èn den gi densrefi furu pen, neleki na dyuku den dyuku densrefi.

11 Ma fu di yu na wan futuboi fu Gado, meki yu musu wai pasi gi den sani disi. Meki muiti fu du san reti, fu dini Gado fayafaya, fu abi bribi, fu sori lobi, fu hordoro èn fu abi safr’ati. 12 Feti a bun feti di abi fu du nanga a bribi èn grabu a têgo libi hori bun steifi. Na Gado kari yu fu kisi a libi disi èn na wan moi fasi yu taki fu en na fesi furu sma.

13 Na fesi Gado di e hori ala sani na libi èn na fesi Krestes Yesus di no ben frede fu taki fa sani de di a ben de na fesi Pontius Pilatus, mi e taigi yu 14 fu wroko nanga den rai di mi gi yu. Du ala sani soleki fa mi taigi yu, so taki nowan sma kan feni fowtu na yu tapu. Du disi teleki wi Masra Yesus Krestes sori ensrefi. 15 En na a wan-enkri Tiriman di de koloku èn a o sori ensrefi te a ten fu en doro. En na Kownu fu den wan di e tiri leki kownu èn Masra fu den wan di e tiri leki masra. 16 En na a wan-enkri sma di no man dede èn a e tan na wan presi pe a leti e skèin so krin, taki nowan sma man go drape. Nowan sma no si en èn nowan sma man si en. Na en musu kisi grani nanga makti fu têgo. Amen.

17 Taigi den sma di gudu na ini a grontapu* disi taki den no musu abi bigifasi* èn taki den no musu fertrow tapu gudu di kan lasi gwe, ma tapu Gado. Na en e gi wi ala sani bogobogo fu wi kan prisiri. 18 Taigi den taki den musu du bun, ja, den musu du furu bun sani, den musu lobi fu gi sma sani èn den musu de klarklari fu prati san den abi nanga trawan. 19 Dan den o seti wan bun fundament gi a tamara. A o de leki wan gudu di den kibri gi densrefi. Na so den kan grabu a trutru libi hori bun steifi.

20 Timoteyus, sorgu bun gi den sani di yu kisi. No arki lawlaw taktaki di e pori santa sani èn no arki den leri di no e kruderi nanga a tru leri, bika na den tori disi sma e kari „sabi”, ma a no trutru sabi. 21 Fu di son sma ben e meki bigi taki den abi a sabi disi, meki den gwe libi a bribi.

Meki Gado sori unu bun-ati.