A di fu tu brifi gi Timoteyus
2 Fu dati ede mi pkin, meki a bun-ati di Krestes Yesus e sori tan gi yu krakti. 2 Den sani di yu ben yere fu mi èn di furu tra sma sabi tu, na dati yu musu leri den man di de fu fertrow. Dan den man disi o kon koni nofo fu gi tra sma leri. 3 Leki wan bun srudati fu Krestes Yesus, yu musu de klarklari fu nyan pina. 4 Nowan man di de wan srudati e go du* bisnis.* Bika a wani taki a sma di teki en leki srudati feni en bun. 5 Boiti dati, efu wan sma de na ini wan streilon* èn a no e lon na a fasi fa a streilon musu lon, a no e kisi wan krans. 6 A gronman di e wroko tranga musu de a fosi sma di o nyan den froktu fu en gron. 7 Prakseri ala ten san mi taki, dan Masra o meki yu kon ferstan ala sani.
8 Memre taki Gado gi Yesus Krestes libi baka èn taki a ben de wan bakapkin fu David, soleki fa a bun nyunsu di mi e preiki e taki. 9 Na fu a bun nyunsu disi meki mi e nyan pina èn na fu dati ede mi de na straf’oso leki wan ogriman. Ma tòg noti no man tapu a wortu fu Gado. 10 Dati meki awinsi san e miti mi, mi e hordoro gi a bun fu den sma di Gado kari, so taki Krestes Yesus kan yepi den tu fu kisi ferlusu nanga têgo glori. 11 Yu kan bribi a sani disi: Efu wi dede makandra nanga en, dan wi o libi makandra nanga en tu. 12 Efu wi e hordoro, dan wi o tiri leki kownu makandra nanga en tu. Efu wi taki dati wi no sabi en, dan en srefi o taki dati a no sabi wi. 13 Awinsi wi no e du san Gado taki, tòg Gado srefi e du ala ten san a taki, bika a no man tyari ensrefi tra fasi leki fa a de trutru.
14 Tan memre den na den sani disi èn taigi den na fesi Gado fu no meki trobi fu wortu ede. A sani dati no e tyari nowan wini kon. A kan meki den sma di e arki a trobi lasi bribi.* 15 Du ala muiti fu gi yusrefi na Gado leki wan sma di a feni bun, wan wrokoman di no abi fu syen fu noti èn di man leri sma a wortu fu Gado na a yoisti fasi. 16 Wai pasi gi lawlaw taktaki di e pori santa sani, bika den taktaki disi o meki sma go du moro ogri. 17 Den sani di den sma dati e taki o panya leki wan takru soro di e nyan a meti fu a skin. Himeneyus nanga Fileitus na tu fu den sma disi. 18 Den man disi drai baka gi a tru bribi èn den e taki dati na opobaka psa kba. Den e meki tu taki son sma lasi bribi. 19 Tòg Gado seti wan steifi fundament di no man seki. Disi na den wortu di stampu na tapu a fundament: „Yehovah* sabi den sma di de fu en”, èn: „Meki ala sma di e kari a nen fu Yehovah,* stop du ogri.”
20 We, na ini wan bigi oso yu abi difrenti patu pe sma e poti sani na ini. Yu abi patu di meki fu gowtu noso fu solfru, ma yu abi patu tu di meki fu udu noso fu tokotoko. Sonwan fu den patu na fu du prenspari wroko, ma trawan na fu du lagi wroko. 21 Sobun, efu wan sma no e fasi den patu di den e gebroiki fu du lagi wroko, dan a sma srefi o de wan patu fu du prenspari wroko. A o de santa èn a basi fu en o man gebroiki en gi ibri sortu bun wroko. 22 Sobun, lowe gi den lostu di yongusma abi. Ma du muiti fu de wan ret’ati sma, fu abi bribi, fu sori lobi èn fu abi freide. Du dati makandra nanga den sma di e kari Masra nen nanga wan krin ati.
23 Boiti dati, no go na ini ala sortu lawlaw nanga dondon taktaki, fu di yu sabi taki disi e tyari trobi kon. 24 Wan srafu fu Masra no musu meki trobi, ma a musu sori switifasi gi ala sma èn a musu abi a koni fu man gi sma leri. Te ogri e miti en, a musu man hori ensrefi. 25 Nanga safr’ati a musu gi leri na den sma di no wani arki, bika kande Gado o meki den abi berow,* so taki den kan kon sabi finfini san na den tru tori fu Gado. 26 Dan den kan kisi densrefi baka èn den kan kmoto na ini a val fu Didibri, fu di a ben kisi den libilibi fu du a wani fu en.