Mateyus e fruteri

24 Di Yesus ben e gowe fu a tempel, den disipel fu en kon na en fu sori en a tempel. 2 A piki den: „Unu e si ala den sani disi? Fu tru mi e taigi unu: Nowan ston sa tan na tapu a trawan, ma den sa broko den puru.”

3 Di a sidon na tapu Olèif-bergi, den disipel kon na en di nowan tra sma ben de drape. Den taki: „Taigi wi: O ten den sani disi o pasa, san o de a marki taki yu kon* èn taki a kaba fu a grontapu* disi de krosibei?”

4 Yesus piki den: „Luku bun taki nowan sma no kori unu, 5 bika furu sma o gebroiki mi nen èn den o taki: ’Mi na a Krestes’, èn den o kori furu sma. 6 Unu o yere taki feti e feti èn unu o yere nyunsu taki feti de. Ma no meki den sani disi skreki unu, bika den sani disi musu pasa, ma a kaba no de ete.

7 Bika a wan pipel o go feti nanga a tra pipel, èn a wan kownukondre o go feti nanga a tra kownukondre. Na ini a wan presi baka a trawan angriten nanga gronseki o de. 8 Ala den sani disi na a bigin fu wan ten fu banawtu di de leki a hebi pen fu wan uma di de fu meki en pikin.

9 Na a ten dati sma o frufolgu unu èn den o kiri unu. Na ini ala kondre sma o teige unu fu mi nen ede. 10 Na a ten dati furu sma o fadon tu. Den o tori makandra èn den o teige makandra. 11 Furu falsi profeiti o opo kon èn den o kori furu sma. 12 Fu di moro nanga moro sma o du ogri, meki a lobi fu furu sma o kon kowru. 13 Ma a sma di horidoro te na a kaba, na en o kisi frulusu. 14 A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.

15 Fu dati ede, te unu e si taki a tegu sani di e tyari pori kon, a wan di a profeiti Danièl ben taki fu en, e tanapu na wan santa presi, (a sma di e leisi disi musu gebroiki en frustan fu man sabi san taki dya), 16 dan meki den sma di de na Yudea, bigin lowe go na den bergi. 17 A man di de na tapu a daki fu en oso, no musu saka kon na gron fu teki sani na ini en oso. 18 A man di de na ini en gron, no musu drai go na oso baka fu teki en dyakti. 19 Helu fu den uma di de nanga bere na a ten dati èn den wan di abi pikin di de na bobi ete! 20 Tan begi taki unu no abi fu lowe na ini a kowru ten fu a yari noso na wan Sabat-dei, 21 bika wan bigi banawtu o de. Noiti ete so wan ten ben de sensi a bigin fu grontapu teleki now èn noiti moro so wan ten o kon baka. 22 Fu taki en leti, efu Gado no ben o syatu a ten dati, dan nowan sma ben o feni frulusu. Ma Gado o syatu a ten gi den sma di a kari.

23 Fu dati ede, te wan sma e taigi unu: ’Luku! Krestes dyaso’, noso ’A de drape!’, dan no bribi a sani disi. 24 Bika falsi Krestes nanga falsi profeiti o opo kon èn den o du bigi sani nanga wondru, so taki efu a ben o man, den ben o kori srefi den sma di Gado kari. 25 Mi warskow unu na fesi. 26 Fu dati ede, efu sma e taigi unu: ’Luku! A de na a sabana’, dan un no musu go. Efu den e taki: ’Luku! A de na ini kamra’, dan no bribi dati. 27 Bika neleki te faya e koti na hemel èn e komoto fu owstusei èn a e skèin go te na west-sei, na so a o de te a Manpikin fu libisma kon. 28 Pe wan dedeskin de, na drape den aka o kon makandra.

29 Wantewante baka a banawtu fu a ten dati, a son o kon dungru, a mun no o gi leti, den stari o fadon komoto fu hemel èn den krakti fu hemel o seki. 30 Dan a marki fu a Manpikin fu libisma o kon de fu si na hemel. Ala den lo na grontapu o sari èn den o si a Manpikin fu libisma e kon na tapu den wolku fu hemel nanga krakti èn nanga bigi glori. 31 A o seni den engel fu en go nanga a bigi babari fu trompeti èn den o tyari den sma kon na wán di Gado kari komopo fu noordsei, zuidsei, owstusei, nanga west-sei, iya, fu a wan uku fu hemel te na a tra uku.

32 Luku a figabon èn leri a sani disi fu en: Te unu e si taki wan nyun taki e bigin gro na a bon èn a e bigin sproiti, dan unu sabi taki a waran ten fu a yari de krosibei. 33 Sosrefi, te unu e si ala den sani disi, dan un musu sabi taki a Manpikin fu libisma de krosibei èn taki a e tanapu leti na mofodoro. 34 Fu tru, mi e taigi unu taki den sma fu a ten disi no o dede kwetikweti, fosi ala den sani disi pasa. 35 Hemel nanga grontapu o pasa gowe, ma den sani di mi taki, no o pasa gowe kwetikweti.

36 Nowan sma sabi a dei nanga a yuru dati. Iya, srefi den engel fu hemel nanga a Manpikin no sabi, ma soso a Tata sabi. 37 Bika neleki fa sani ben de na ini a ten fu Noa, na so a o de te a Manpikin fu libisma kon. 38 Na ini a ten dati bifo a frudu, sma ben nyan, den ben dringi, man ben teki uma fu trow èn uma ben trow nanga man, teleki a dei doro di Noa go na ini na ark. 39 Ma den no ben poti prakseri na san ben e pasa, teleki a frudu kon èn a wai den alamala puru. Na so a o de te a Manpikin fu libisma kon. 40 Na a ten dati tu man o de na ini a gron. Gado o teki a wan tyari gowe, ma a o libi a trawan na baka. 41 Tu uma o mara nanga na anumiri. A o teki a wan tyari gowe, ma a o libi a trawan na baka. 42 Fu dati ede, tan na ai, bika unu no sabi sortu dei un Masra o kon.

43 Ma wán sani un musu sabi, taki efu a masra fu na oso ben sabi sortu yuru a fufuruman ben o kon, dan a ben o tan na ai èn a no ben o meki sma broko kon na ini en oso. 44 Dati meki un musu de srekasreka tu, bika a Manpikin fu libisma o kon na wan yuru di unu no ben prakseri.

45 Suma na trutru a koni srafu di de fu frutrow èn di en masra poti fu luku den futuboi fu en, so taki a kan gi den nyanyan na a reti ten? 46 Koloku fu a srafu te en masra doro èn a si taki a srafu e du dati! 47 Fu tru mi e taigi unu: A o poti a srafu fu luku ala den sani di a abi.

48 Ma efu a srafu ogri èn a prakseri na ini en ati: ’Mi masra no o kon ete’, 49 èn a srafu dati o bigin fon den tra srafu èn a o nyan èn dringi nanga sma di trawan sabi leki drunguman, 50 dan a masra fu a srafu dati o kon na wan dei di a srafu no e fruwakti èn na wan yuru di a no sabi. 51 A masra o gi en wan bun hebi strafu èn a o gi en san a musu kisi makandra nanga den hoigriman. Drape a o krei èn a o kaw tifi.