Yohanes e fruteri

15 Mi na a trutru droifibon, èn mi Tata na a gronman. 2 A o puru ibri taki fu mi di no e meki froktu èn a o krin ibri taki di e meki froktu, so taki a kan meki moro froktu. 3 Den sani di mi taigi unu, meki taki unu krin kaba. 4 Tan wán nanga mi, èn mi o tan wán nanga unu. Neleki fa wan taki srefi no man meki froktu efu a no tan na a droifibon, na so unu no man meki froktu tu, efu unu no tan wán nanga mi. 5 Mi na a droifibon, unu na den taki. Efu wan sma tan wán nanga mi èn mi tan wán nanga en, dan a o meki furu froktu, fu di unu no man du noti sondro mi. 6 Efu wan sma no tan wán nanga mi, dan den o puru a sma disi trowe leki wan taki èn a o kon drei. Dan sma o piki den taki disi èn den o iti den go na ini faya fu bron den. 7 Efu unu tan wán nanga mi èn efu unu e du san mi e taki, dan unu kan aksi awansi san unu wani èn unu sa kisi dati tu. 8 Te unu e tan meki furu froktu èn e sori taki unu na mi disipel, dan dati o gi mi Tata glori. 9 Neleki fa a Tata lobi mi, na so mi lobi unu. Tyari unsrefi na so wan fasi, taki mi tan lobi unu. 10 Efu unu e gi yesi na den komando fu mi, dan mi o tan lobi unu, neleki fa mi Tata tan lobi mi, fu di mi e gi yesi na den komando fu en.

11 Mi taigi unu den sani disi, so taki unu kan prisiri leki fa mi e prisiri èn unu kan prisiri srefisrefi. 12 Mi e gi unu a komando fu lobi makandra neleki fa mi lobi unu. 13 A moro bigi lobi di wan sma kan sori, na fu gi en libi* gi den mati fu en. 14 Unu na mi mati te unu e du san mi e taigi unu. 15 Mi no e kari unu srafu moro, fu di wan srafu no sabi san en masra e du. Ma mi kari unu mi mati, fu di mi taigi unu ala den sani di mi yere fu mi Tata. 16 A no unu teki mi, ma na mi teki unu èn na mi poti unu fu tan meki furu froktu, so taki den froktu fu unu kan tan. Dan a Tata o gi unu awansi san unu e aksi en na ini mi nen.

17 Mi e gi unu den komando disi, so taki unu kan lobi makandra. 18 Efu grontapu e teige unu, dan sabi taki den ben teige mi bifo den ben teige unu. 19 Efu unu ben de wan pisi fu grontapu, dan grontapu ben o lobi unu, bika unu ben o de fu grontapu. Ma fu di unu no de wan pisi fu grontapu èn mi teki unu puru na grontapu, meki grontapu e teige unu. 20 Prakseri den sani di mi ben taigi unu: Wan srafu no bigi moro en masra. Efu den frufolgu mi, dan den o frufolgu unu tu. Efu den du san mi taki, dan den o du tu san unu taki. 21 Ma na fu di unu na mi disipel, meki den o du ala den sani disi nanga unu, fu di den no sabi a sma di seni mi kon. 22 Efu mi no ben kon taki nanga den, den no ben o abi sondu. Ma now den no kan taki dati den no abi sondu. 23 A sma di e teige mi, e teige mi Tata tu. 24 Efu mi no ben du den sani di nowan tra sma du ete na den mindri, dan den no ben o abi sondu. Ma now den si san mi du èn den e teige mi nanga a Tata. 25 Disi e pasa, so taki den sani di skrifi na ini a Wèt fu den kan kon tru, bika a skrifi: ’Den ben teige mi aladi mi no du noti.’ 26 Mi o seni a yepiman di komopo fu a Tata kon gi unu. Dati na a santa yeye di e sori san tru èn di komopo fu a Tata. Te a yeye disi doro, dan a o de leki wan kotoigi gi mi. 27 Unu srefi musu de leki kotoigi gi mi, fu di unu ben de nanga mi sensi di mi bigin nanga a wroko fu mi.