A fosi brifi fu Petrus
1 Mi, Petrus, wan apostel fu Yesus Krestes, e skrifi unu di e libi fu wan syatu pisi ten na ala sei fu Pontus, Galasia, Kapadosia, Asia nanga Bitinia, iya, mi e skrifi den wan di kisi wan kari. 2 Gado a Tata ben sabi na fesi kaba taki a ben o kari unu. A yeye fu en meki unu kon santa, so taki unu kan gi yesi na en èn so taki unu kan kon krin, fu di unu natinati nanga a brudu fu Yesus Krestes:
Meki Gado sori unu bun-ati moro nanga moro èn meki a gi unu moro freide sosrefi.
3 Blesi fu a Gado nanga a Tata fu wi Masra Yesus Krestes, bika na fu di a abi furu sari-ati nanga wi, meki wi gebore nyun baka fu kan abi wan howpu di no e lasi gowe. Wi abi a howpu disi fu di a gi Yesus Krestes wan opobaka, 4 so taki wi kan kon abi libi di no man pori, di no doti èn di no o lasi gowe. A libi disi na wan gudu di poti na wan sei na ini hemel gi unu. 5 Unu na den wan di e kisi kibri nanga yepi fu a krakti fu Gado fu di unu abi bribi. Gado e kibri unu fu kan frulusu unu na wan fasi di o kon na krin na ini den lasti dei. 6 A sani disi e gi unu bigi prisiri srefisrefi, aladi unu ben de nanga sari fu wan syatu pisi ten fu di unu kisi difrenti tesi. 7 Na so fasi a bribi fu unu di kisi tesi èn di warti moro gowtu di kan lasi gowe aladi sma bron en na ini faya kaba, o meki sma prèise unu. A bribi dati o meki unu kisi glori nanga grani tu te Yesus Krestes sori ensrefi. 8 Noiti unu no si Krestes, ma toku unu lobi en. Unu no e si en nownow, ma toku unu e bribi na ini en èn unu breiti srefisrefi, iya, unu e prisiri pasa marki, 9 fu di unu sabi taki a bribi fu unu o meki taki unu kisi frulusu.
10 Den profeiti ben e suku fayafaya fu kon sabi o prenspari a frulusu dati ben de èn den ondrosuku sani finifini. Na den ben taki na fesi fu den bun di Gado ben o du gi unu. 11 Den ben e tan ondrosuku san ben o pasa èn na sortu ten a santa yeye di ben de na ini den, ben o sori den den sani di abi fu du nanga Krestes. A yeye ben e sori den na fesi taki Krestes ben o pina èn taki kefalek sani ben o pasa baka dati. 12 Gado ben tyari kon na krin gi den taki den no ben e dini densrefi, ma taki na gi unu den ben skrifi den sani di unu yere now fu den sma di fruteri unu a bun nyunsu, fu di a santa yeye di ben seni kon fu hemel, ben yepi den. Na den srefi sani disi den engel e angri fu kon frustan.
13 Fu dati ede sreka un frustan fu wroko tranga. De nanga krin frustan dorodoro. Hori a bun na prakseri di Gado o du gi unu te Yesus Krestes sori ensrefi. 14 Un musu de leki pikin di e gi yesi. Den lostu di unu ben abi na a ten di unu no ben sabi noti fu Gado, no musu basi unu moro. 15 Ma neleki fa a sma di kari unu de santa, na so un musu kon santa tu na ini ala san unu e du, 16 bika Gado Buku taki: „Un musu de santa, bika mi santa.”
17 Boiti dati, efu unu e begi a Tata di no e teki sei te a e koti krutu gi sma èn di e strafu ibriwan fu den gi den sani di den e du, dan un musu tyari unsrefi na wan fasi di e sori taki unu abi bigi lespeki gi Gado na ini a syatu pisi ten di unu e libi dya. 18 Unu sabi taki di a frulusu unu fu a soso fasi fu libi di unu ben teki abra fu den afo fu unu, a no gebroiki sani di man pori, soleki solfru noso gowtu. 19 Ma a frulusu unu nanga brudu di warti trutru, neleki a brudu fu wan pikin skapu di no abi nowan mankeri èn di no flaka, iya, a brudu fu Krestes. 20 A tru taki Gado ben teki Krestes kaba bifo grontapu ben seti, ma na ini den lasti dei Gado sori suma na Krestes fu a bun fu unu. 21 Na en meki taki unu e bribi na ini Gado, a sma di gi en wan opobaka èn di gi en glori. Na so fasi unu kan tan bribi na ini Gado èn unu kan tan wakti en.
22 Un gi yesi na den tru tori. Na so un krin un libi.* Fu di unu e gi yesi na a tru leri, meki un musu lobi un brada sondro fu hoigri èn un musu lobi makandra nanga un heri ati, 23 bika a no nanga siri di man pori unu gebore ete wan tron, ma nanga siri di no man pori, iya, nanga a wortu fu a libilibi Gado di e tan fu têgo. 24 Soleki fa Gado Buku e taki, dan „ala libisma de leki grasi èn a moi fu den de leki wan bromki di a grasi e gi. A grasi e kon drei èn a bromki e fadon, 25 ma san Yehovah e taki e tan fu têgo.” We, a „sani di a taki” na a bun nyunsu di sma fruteri unu.