Yesaya
57 Ret’ati sma e dede,
ma nowan sma e poti prakseri na dati.
Sma di e dini Gado nanga den heri ati e dede tu.
Ma nowan sma e ferstan taki den ret’ati sma e dede
fu di ogri miti den.*
2 Den e go rostu.
Ala sma di e waka na wan reti fasi e go rostu na ini den grebi.*
3 „Ma un manpkin fu wan uma di e koti luku, un kon dya.
Unu na pkin fu wan huru-uma
èn fu wan man di e waka gi en trowpatna.
4 Suma unu e lafu?
Suma unu e gi bigitaki? Gi suma unu e langa un tongo?
Unu na pkin fu sondu
èn pkin fu lei.
5 Unu e huru na ondro den bigi bon.
Iya, na ondro ibri bon di abi furu w’wiri.
Unu e srakti pkin na den bergi-olo
fu den lagipresi.
6 Yu lobi den grati ston fu a lagipresi.
Ma na den sani disi w’wan yu o abi.
Yu e tyari dringi-ofrandi nanga tra ofrandi gi den.
Dan yu wani taki mi musu feni disi bun?
7 Yu poti yu bedi na tapu wan hei bergi.
Yu go drape fu tyari srakti-ofrandi.
8 Na baka a doro nanga a doropostu, yu poti wan sani fu memre den gado fu yu.
Yu drai baka gi mi èn yu puru yu krosi na yu skin.
Yu kren go drape, dan yu bradi a bedi fu yu, meki a kon moro bigi.
Yu meki wan ferbontu nanga den.
Yu ben lobi fu go nanga den na bedi
èn yu ben luku a syenpresi fu mansma.*
Yu seni den boskopuman fu yu go farawe.
Dati meki yu saka go na ini Grebi.*
10 Den furu sani di yu e du meki yu kon weri.
Tòg yu no taki: ’Den sani disi no e tyari wini kon!’
Yu kisi krakti baka
èn dati meki yu no e gi abra.*
11 Gi suma yu e beifi?
Suma yu e frede, meki yu e lei now?
Yu no prakseri mi.
Yu no broko yu ede nanga noti.
Mi ben e tan pî èn mi no ben aksi yu frantwortu fu den sani di yu ben e du.*
Dati meki yu no e frede mi.
12 Mi o meki sma kon sabi san yu e du. Mi o meki den sabi taki yu e du leki yu na wan ret’ati sma.
Den sani di yu e du no o tyari wini kon gi yu.
13 Te yu e bari fu kisi yepi,
dan ala den falsi gado fu yu no o man yepi yu.
Winti o wai den alamala gwe.
Wan pkin winti nomo o wai den gwe.
Ma a sma di e suku yepi na mi, o tan libi na ini a kondre
èn mi santa bergi o de fu en.
14 Wan sma o taki: Meki a pasi! Meki a pasi! Sreka a pasi!
Puru ala sani na a pasi gi mi pipel.’”
„Mi e tan na wan hei èn santa presi.
Ma mi de tu nanga den sma di e firi brokosaka èn di las’ati.*
Mi o gi den mofinasma dek’ati
èn mi o gi krakti na den sma di e firi brokosaka.
16 Bika a no fu ala ten mi o drai baka gi den
èn mi ati no o bron nanga den fu têgo.
Bika sma ben o kon swaki efu mi ben o du dati.
Iya, ala den libisani di mi meki ben o kon swaki.
17 Unu ben e sondu èn unu ben e bedrigi sma fu kisi wini. Dati meki mi ati bron nanga unu.
Mi naki unu èn mi drai baka gi unu, fu di mi ati ben e bron srefsrefi.
Tòg unu tan opo unsrefi teige mi. Unu tan du san un ati wani.
18 Mi si san unu e du,
ma tòg mi o dresi unu. Mi o tiri unu
èn mi o trowstu unu nanga den sma fu unu di ben e sari.”*
19 „Mi o meki sma prèise mi.
Den sma di de farawe èn den sma di de krosbei o abi freide. Mi o dresi den”,
na so Yehovah taki.
20 „Ma den ogrisma de leki wan krasi se di no man tan tiri.
Ala yuru den skwala e meki wan lo w’wiri nanga tokotoko opo kon.
21 Nowan freide no o de gi den ogrisma”, na so mi Gado taki.