Gi den Galasiasma

5 Krestes meki taki wi no de srafu* moro. Fu dati ede, tnapu kánkan èn no meki sma poti unu baka na ini katibo.

2 Iya, mi, Paulus, e taigi unu taki efu unu o besnèi,* dan a dede fu Krestes no o tyari nowan wini gi unu. 3 Ete wan leisi mi e taigi ibri sma di e go besnèi taki a musu du ala san a Wet e taki. 4 Efu unu e du san a Wet e taki fu di unu e denki taki na so Gado o si unu leki ret’ati sma, dan unu prati fu Krestes èn a no o sori unu bun-ati moro. 5 Na fu di wi abi bribi meki wi e wakti fayafaya fu Gado si wi leki ret’ati sma. Na a santa yeye e yepi wi fu du disi. 6 Gi den sma di de wán nanga Krestes Yesus, a no prenspari efu den besnèi noso efu den no besnèi. Ma a sani di prenspari na a bribi di den e sori fu di den abi lobi.

7 Unu ben e lon bun. Suma meki taki unu no e du moro san a tru leri e taki? 8 Suma meki unu kenki prakseri? A no Gado di kari unu. 9 Na pkinso gist* nomo e meki a heri blon sweri. 10 Mi de seiker taki unu di de wán nanga Masra no o go denki tra fasi. Ma a sma di e tyari bruya kon o kisi a strafu di a musu kisi, awinsi suma na en. 11 Ma brada nanga sisa, efu mi e preiki ete taki un musu besnèi, dan fu san ede den e ferfolgu mi? Efu na dati mi ben e preiki, dan den sani di mi e leri sma fu a dede fu Yesus no ben o tapu den fu abi bribi. 12 Fu san ede den man di e taki dati unu musu besnèi no e koti a heri sani fu den puru?*

13 Brada nanga sisa, Gado kari unu fu de fri. Ma un no musu teki disi leki wan okasi fu du san a sondu skin wani. Na presi fu dati un musu dini makandra leki srafu fu di un lobi makandra. 14 Bika a heri Wet abi fu du nanga a wán wet disi: „Yu musu lobi tra sma leki fa yu lobi yusrefi.” 15 Ma efu unu e tan feti nanga makandra èn e du hati sani nanga makandra, dan un musu luku bun taki unu no kiri makandra.

16 Ma mi e taigi unu: Tan du san a yeye wani, dan unu no o du nowan sani di a sondu skin wani. 17 Bika a sondu skin de teige a yeye èn a yeye de teige a sondu skin. Den e gens makandra èn fu dati ede unu no e du den sani di unu wani du. 18 Boiti dati, efu a yeye e tiri unu, dan a Wet no abi krakti na unu tapu moro.

19 Iya, den sani di a sondu skin e du de krin fu si. Den sani disi na hurulibi,* fasi fu libi di no krin, ogri di sma e du sondro fu syen,* 20 na anbegi fu falsi gado, afkodrei, feantifasi, kesekese, dyarusu, faya-ati, trobi, pratifasi, falsi leri, 21 big’ai, a drungu di sma e drungu, bradyari fesa èn tra sani leki den sortu sani disi. Na gi den sani disi mi e warskow unu na fesi, neleki fa mi ben warskow unu kba taki den sma di gwenti du den sani disi no o kisi a Kownukondre fu Gado.

22 Na a tra sei, den fasi di a yeye e meki sma kisi* na lobi, prisiri, freide, pasensi, switifasi, bun-ati, bribi, 23 safr’ati, a dwengi di wan sma man dwengi ensrefi. Nowan wet e krutu den sani disi. 24 Den sma di de fu Krestes Yesus ben spikri a sondu skin fu den na a postu, makandra nanga den firi èn den lostu fu den.

25 Efu wi e meki a yeye tiri wi libi, dan meki wi tan waka tu na wan fasi di fiti soleki fa a yeye wani. 26 Wi no musu go denki tumsi furu fu wisrefi, wi no musu strei nanga makandra èn wi no musu dyarusu tapu makandra.