Lukas skrifi en

6 Wan Sabat-dei a ben e waka psa na ini den aleisigron. Ne den disipel fu en piki na aleisi, dan den masi en na ini den anu èn den nyan en. 2 Ne wan tu fu den Fariseiman taki: „Fu san ede unu e du wan sani di un no mag du na a Sabat-dei?” 3 Ma Yesus piki den: „Noiti unu no leisi san David du di angri ben e kiri en nanga den man fu en? 4 David go na ini na oso fu Gado èn a granpriester gi en den brede di ben poti na fesi Gado leki ofrandi. Ne a nyan èn a gi den man fu en tu, aladi na den priester w’wan ben mag nyan den brede dati.” 5 A taigi den tu: „A Manpkin fu libisma na Basi fu a Sabat.”

6 Wan tra Sabat-dei, Yesus go na ini a snoga èn a bigin gi sma leri. Wan man ben de drape di ben malengri* na en ret’anu. 7 Den leriman fu a Wet nanga den Fariseiman ben e luru Yesus fu si efu a ben o dresi sma na a Sabat-dei, so taki den ben kan feni wan sani na en tapu. 8 Ma a ben sabi san den ben e denki. Dati meki a taigi a man nanga a malengri anu:* „Opo go tnapu na mindrisei.” Ne a man opo go tnapu drape. 9 Baka dati Yesus taigi den: „Mi e aksi unu: A fiti fu du bun noso ogri na a Sabat-dei? Of a fiti fu yepi wan sma noso fu kiri wan sma na a Sabat-dei?” 10 Baka di a luku den alamala, a taigi a man: „Langa yu anu.” A man langa en anu èn en anu kon betre. 11 Ma den leriman fu a Wet nanga den Fariseiman ati bron srefsrefi èn den go taki nanga makandra san den ben kan du nanga Yesus.

12 Wan dei a go na a bergi fu begi. Heri neti a begi Gado. 13 Di dei opo, a kari den disipel fu en kon, dan a teki 12 fu den èn a kari den „apostel”. 14 Yu ben abi Simon di a ben kari Petrus tu, en brada Andreas, Yakobus, Yohanes, Filipus, Bartolomeyus, 15 Mateyus, Tomas, Yakobus di de a manpkin fu Alfeyus, Simon di sma sabi tu leki wan man di e du sani fayafaya, 16 Yudas di de a manpkin fu Yakobus nanga Yudas Iskariot di ben seri Yesus bakaten.

17 Dan a saka nanga den fu a bergi èn a go tnapu na wan plata presi. Wan bigi grupu disipel fu en ben de drape nanga wan lo sma di ben kmoto fu heri Yudea, Yerusalem nanga den kondre Tirus nanga Sidon di de na ini a birti fu a se. Den ben kon drape fu arki Yesus èn fu meki a dresi den. 18 A dresi srefi den sma di ben abi ogri yeye na den tapu. 19 Ala den sma ben pruberi fu fasi en, bika krakti ben e kmoto fu en di ben e meki den alamala kon betre.

20 Dan a luku den disipel fu en èn a taki:

„Den sma di pôti o de koloku, bika a Kownukondre fu Gado na fu den.

21 Den sma di de nanga angri now o de koloku, bika den o nyan den bere furu.

Den sma di e krei now o de koloku, bika den o lafu.

22 Unu o de koloku tu te sma no lobi unu, te den e yagi unu, te den e gi unu pornen èn te den e taki wan lo ogri fu unu fu di unu na bakaman fu a Manpkin fu libisma. 23 Te den sani disi e miti unu, dan un musu breiti èn prisiri srefsrefi fu di a pai di unu o kisi na hemel o bigi. Na den srefi sani dati den afo fu den ben e du nanga den profeiti.

24 Bigi ogri o miti den guduman, bika den kisi ala bun sani kba.

25 Bigi ogri o miti den sma di e nyan den bere furu now, bika angri o kiri den.

Bigi ogri o miti den sma di e lafu now, bika den o sari èn krei.

26 Bigi ogri o miti unu te sma e taki bun fu unu, bika na dati den afo fu den ben e du nanga den falsi profeiti.

27 Ma mi e taigi unu di e arki: Tan lobi un feanti, tan du bun gi den sma di e teige unu, 28 tan blesi den sma di e fluku unu, tan begi gi den sma di e taigi unu hati sani. 29 Efu wan sma naki yu na yu seifesi, dan meki a naki a tra sei tu. Efu wan sma puru yu dyakti na yu skin, dan no tapu en fu teki yu empi tu. 30 Te wan sma aksi unu wan sani, dan gi en dati èn te wan sma teki wan sani fu unu, dan no aksi en a sani dati baka.

31 San unu wani meki sma du gi unu, na dati un musu du gi den tu.

32 Efu unu lobi soso den sma di lobi unu, dan sortu bun unu e du? Bika srefi den sondari lobi den sma di lobi den. 33 Efu unu e du bun gi den sma di e du bun gi unu, dan sortu bun unu e du? Srefi den sondari e du a sani dati. 34 Èn efu unu e leni sma sani soso fu di unu e howpu taki den o pai unu baka, dan sortu bun unu e du? Srefi den sondari e leni tra sondari sani soso fu kan kisi a srefi sani baka. 35 Ma tan lobi un feanti, tan du bun èn tan leni sma sani sondro fu howpu taki unu o kisi wan sani fu den baka. Na so unu o kisi wan bigi pai èn unu o de manpkin fu a Moro Heiwan. Bika Gado srefi e du bun gi den sma di no de nanga tangi èn gi den ogrisma. 36 Tan abi sar’ati neleki fa un P’pa abi sar’ati.

37 No krutu sma moro, dan Gado no o krutu unu. No suku fowtu na sma moro, dan Gado no o suku fowtu na unu. Tan gi sma pardon, dan unu o kisi pardon tu. 38 Abi a gwenti fu gi sma sani, dan sma o gi unu sani tu. Den o lai wan baskita, den o stampu en moi, den o seki en bun, den o furu en psa marki, dan den o kanti en poti na ini a saka fu un krosi. Bika a fasi fa unu e libi nanga trawan, na so den o libi nanga unu tu.”

39 Dan a ferteri den wan agersitori tu: „Wan breni man o man sori wan tra breni man a pasi? No, den ala tu o fadon go na ini wan peti. 40 Wan sma di e kisi leri* no bigi moro en leriman, ma ibri sma di kisi trutru bun leri o de leki en leriman. 41 Fu san ede yu e luku a fini pisi udu na ini yu brada ai, ma yu no e si a postu na ini yu eigi ai? 42 Fa yu kan taigi yu brada: ’Brada, kon meki mi puru a fini pisi udu na ini yu ai’, ma yu srefi no e si a postu na ini yu eigi ai? Hoigriman! Puru a postu na ini yu eigi ai fosi, dan yu o si krin fa yu kan puru a fini pisi udu na ini yu brada ai.

43 Nowan bun bon e meki pori froktu èn nowan siki bon e meki bun froktu. 44 Sma kan kon sabi wan bon na den froktu fu en. Yu no man piki figa fu makabon èn yu no man koti droifi puru fu wan makabon. 45 Wan bun sma e puru bun sani na ini en ati, ma wan ogri sma e puru ogri sani na ini en ati. Bika san furu na ati, na dati mofo e taki.

46 Fu san ede unu e kari mi ’Masra! Masra!’, ma unu no e du den sani di mi taki? 47 Mi o taigi unu suma a sma gersi di e kon na mi, di yere san mi taki èn di e du tu san mi taki: 48 A de leki wan man di ben e bow wan oso. A diki go dipi na ini a gron fu poti wan fundament na tapu ston-gron. Di wan frudu kon, dan a liba naki na oso dati bun tranga. Ma na oso no seki fu di a ben bow bun. 49 Na a tra sei, efu wan sma yere, ma a no e du san a yere, dan a de leki wan man di bow wan oso na tapu a gron sondro fu meki wan fundament. A liba naki na oso bun tranga èn direk a heri oso fadon broko.”