A fosi brifi fu Yohanes

1 Wi wani ferteri unu fu a sma di de a wortu fu libi. A ben de sensi a bigin. Wi yere en, wi si en nanga wi eigi ai, wi poti prakseri na en èn wi fasi en nanga wi anu. 2 Wi kon sabi èn ferstan a têgo libi di kmopo fu a P’pa. Wi na kotoigi fu dati èn na dati wi e ferteri unu. 3 Wi e ferteri unu den sani di wi si èn di wi yere, so taki unu kan de wán nanga wi, nanga a P’pa èn nanga en Manpkin Yesus Krestes. 4 Wi e skrifi unu fu den sani disi, so taki wi alamala kan prisiri.

5 Disi na a boskopu di wi yere fu en èn di wi e ferteri unu: Gado na leti èn nowan dungru no de na ini en.* 6 Efu wi taki: „Wi de wán nanga en”, ma tòg wi e tan waka na ini dungru, dan wi e lei èn wi no e du san a tru leri e sori. 7 Ma efu wi waka na ini a leti neleki fa Gado de na ini a leti, dan wi alamala o de wán èn a brudu fu en Manpkin Yesus o krin wi fu ala sondu.

8 Efu wi taki: „Wi no abi sondu”, dan wi e kori wisrefi èn wi no e bribi a tru leri. 9 Efu wi taki krin sortu sondu wi du, dan wi kan de seiker taki Gado o du san a pramisi èn a o du san reti. A o gi wi pardon fu den sondu fu wi èn a o krin wi fu ala ogri. 10 Efu wi taki: „Wi no e sondu”, dan wi e kari Gado wan leiman èn a wortu fu en no de na ini wi ati.