Gi den Hebrewsma
8 We, a moro prenspari sani fu a tori di wi e taki, na disi: Wi abi wan granpriester leki a wan disi èn a go sidon na a reti-anusei fu a kownusturu fu a Moro Heiwan na hemel. 2 A de wan futuboi di e dini na ini a santa presi fu a tru tenti. A no libisma meki a tenti, ma na Yehovah. 3 Ibri granpriester poti na wroko fu tyari presenti nanga srakti-ofrandi. Na fu dati ede a ben de fanowdu taki a granpriester disi ben musu gi wan sani leki ofrandi tu. 4 We, efu a ben de na grontapu, dan a no ben o de wan priester, fu di priester de kaba di e gi ofrandi soleki fa a Wèt e taki. 5 A santa wroko di den man disi e du, de leki wan eksempre èn wan skaduw fu den sani di de na hemel. Sobun, di Moses ben o meki a tenti, Gado taigi en: „Sorgu taki yu meki ala sani leki na eksempre di mi sori yu na tapu a bergi.” 6 Ma now Yesus kisi wan moro bun wroko fu du, fu di a de a mindriman tu fu wan srefi sortu frubontu di bun moro na owru frubontu. Wèt de di e horibaka gi a nyun frubontu disi di abi fu du nanga pramisi di moro bun.
7 Efu noti ben mankeri na a fosi frubontu, dan wan di fu tu frubontu no ben o de fanowdu, 8 bika Gado feni taki a pipel abi fowtu. A e taki: „Yehovah taki: ’Luku, wan ten o kon taki mi o meki wan nyun frubontu nanga den Israelsma èn nanga den sma fu Yuda. 9 A no o de leki a frubontu di mi ben meki nanga den afo fu den di mi teki den na den anu fu tyari den komopo fu Egepte. A o de tra fasi, fu di den no hori a frubontu di mi meki nanga den, so taki mi no ben e broko mi ede nanga den moro’, na so Yehovah taki.
10 ’Bika disi na a frubontu di mi o meki nanga den Israelsma baka a ten dati’, na so Yehovah taki. ’Mi o poti mi wèt na ini den frustan èn mi o skrifi den na ini den ati. Mi o tron a Gado fu den èn den o tron mi pipel.
11 Nowan fu den o taigi en kondreman nanga en brada moro: „Yu musu sabi Yehovah!” Den alamala o sabi mi. A moro pikinwan èn a moro bigiwan fu den o sabi mi, 12 bika mi o gi den pardon fu den ogri sani di den du èn mi no o memre den sondu fu den kwetikweti moro.’”
13 Te a e taki „wan nyun frubontu”, dan nanga dati a meki taki a fosi frubontu no de fanowdu moro. We, a sani di no de fanowdu moro èn di kon owru, de fu kon na wan kaba.