Yesaya
2 Ma na den ogri di unu e du meki taki unu prati nanga un Gado.
Den sondu fu unu meki taki a drai baka gi unu
èn taki a no wani arki unu srefsrefi.
3 Den anu fu unu lai brudu
èn den e du soso ogri.
Un mofo e taki lei èn un tongo e taki sani di no bun.
4 Nowan sma e taki dati sani musu psa na wan reti fasi
èn nowan sma di e go na fesi krutu e taki san tru.
Sma e fertrow tapu sani di no tru* èn den e taki soso sani.
Den de nanga bere fu ala sortu problema èn a pkin di den o meki na soso ogri.
5 Den ogri sani di den e prakseri fu du de leki den eksi fu takru sneki
èn soso takru sneki e kmoto na ini den eksi di broko.
Iniwan sma di e nyan den eksi disi o dede.
Na soso anansi-t’tei den e meki.
6 Ma den no man weri na anansi-t’tei leki wan krosi
èn den no man tapu densrefi nanga den sani di den meki.
Den sani di den e du na ogri sani.
Soso ogri den anu e du.
7 Den futu e lon go du ogri
èn den e feti fu kiri sma fu soso.
Soso ogri den e prakseri.
Den e pori èn den e broko sani na ala presi pe den e go.
8 Den no sabi fa fu libi bun nanga sma
èn den no e du san reti srefsrefi.
Den meki den pasi fu den kon kron.
Nowan sma di e waka na tapu den pasi dati o abi wan bun libi.
9 Fu dati ede retidu de fara fu wi
èn a no man doro wi.
Wi tan howpu fu si leti, ma na soso dungru wi si.
Wi wani waka na ini leti, ma wi tan waka na ini dungru.
10 Wi e firfiri a muur neleki brenisma
èn neleki sma di no abi ai.
Na mindridei wi stotu wi futu neleki na neti wi de.
Na mindri tranga sma wi de leki dedesma.
11 Wi alamala e bari leki beer
èn wi e geme leki doifi fu di wi e sari.
Wi ben suku retidu, ma nowan retidu ben de.
Wi ben wani kisi ferlusu, ma ferlusu tan farawe fu wi.
12 Bika yu si den furu ogri di wi du
èn den sondu fu wi de leki wan kotoigi di e taki sortu ogri wi du.
Wi sabi heri bun sortu ogri wi du
èn wi sabi taki wi sondu.
13 Wi sondu teige Yehovah èn wi du leki wi no sabi en.
Wi drai baka gi wi Gado.
Wi wani du ogri nanga sma èn wi wani opo wisrefi teige en.
Wi e prakseri soso lei èn wi e bedrigi trawan.
14 Retidu wai go na baka
èn ala san reti e tnapu farawe.
Nowan sma na a pren* e taki san tru*
èn nowan bun sani man kon na insei.
Yehovah si ala den sani disi.
A no ben lobi en kwetkweti* taki retidu no ben de.
16 A ben ferwondru di a si taki nowan sma ben yepi wan trawan
èn taki nowan sma ben du wan sani fu tyari kenki kon.
Dati meki en eigi anu tyari ferlusu kon.*
Fu di a de wan ret’ati sma meki a du wan sani.
Boiti dati, a weri atibron leki wan krosi
èn a tranga firi fu du san reti de leki wan dyakti* na en skin.
18 A o pai sma gi den ogri di den du.
A o puru atibron na tapu den feanti fu en èn a o gi den san den musu kisi.
A o pai den èilanti gi den ogri fu den.
19 Fu a presi pe son e opo te na a presi pe son e dongo,
sma o abi lespeki gi a nen fu Yehovah èn den o gi en glori.
Bika a o kon leki wan liba di e lon es’esi
èn di a yeye fu Yehovah e pusu kon.
20 „A sma di bai unu baka o kon na Sion
èn a o kon na den sma fu Yakob di tapu fu du ogri”, na so Yehovah taki.
21 Yehovah taki: „Disi na a ferbontu di mi meki nanga den.” Yehovah taki: „Mi yeye de na yu tapu èn mi taigi yu san yu musu taki. Fu ala ten mi o taigi yu, den pkin fu yu nanga den granpkin fu yu san unu musu taki èn fu ala ten mi yeye o de na un tapu.”