Yesaya
30 Yehovah taki: „Bigi ogri o miti den tranga-ede man
di e du sani di mi no taigi den fu du.
Den e meki ferbontu nanga trawan,* ma mi yeye no de na den tapu.
Na so den e du a wan sondu baka a trawan.
2 Sondro fu aksi mi, den go na Egepte
fu suku yepi na a kownu.*
Den go suku kibri na ini a skaduw fu Egepte!
3 Ma unu o kisi syen te unu o go suku yepi na a kownu.
Un fesi o fadon te unu o go suku kibri na ini a skaduw fu Egepte.
4 Den granman kon na a foto Sowan
èn den boskopuman doro te na Hanes.
5 Den Egeptesma o gi den alamala syen,
bika den no man du noti gi nowan sma,
den no man yepi nowan sma èn den no e tyari nowan wini kon gi sma.
Na soso syen nanga pornen den o gi den Israelsma.”
6 Disi na wan krutuboskopu gi den meti fu zuidsei:
Wan grupu sma e waka na ini wan kondre fu pina nanga bigi problema,
wan kondre pe lew e bari,
wan kondre fu takru sneki nanga sneki di e dyompo beti sma.
Na tapu a baka fu buriki nanga kameili
den e syow den gudu fu den.
Ma den sani disi no o tyari nowan wini gi a pipel.
7 A yepi fu Egepte na fu soso.
Dati meki mi kari en: „Rahab, a wan di e sdon nomo e du noti.”
8 „Go, dan yu skrifi den sani disi na tapu wan skrifiplanga na fesi ala sma.
Skrifi den na ini wan buku,
so taki sma kan sabi bakaten
san ben psa.
9 Bika a pipel disi na wan tranga-ede pipel. Den na manpkin di e kori sma
èn di no wani arki den wet* fu Yehovah.
10 Den taigi den sma di e kisi fisyun: ’Un no musu si fisyun moro.’
Den taigi den profeiti: ’Un no musu ferteri wi san o psa nanga wi.
Na switi tori un musu ferteri wi. Ferteri wi sani di unu no si trutru.
11 Kmoto na a reti pasi. Drai gwe na wan tra sei.
No taigi wi nowan sani moro fu a Santawan fu Israel.’”
12 Fu dati ede a Santawan fu Israel taki:
„Unu no wani arki den wortu disi.
Un lobi bedrigi sma. Na soso kori unu e kori trawan.
Dati na un libi.
13 Dati meki a sondu fu unu kon de gi unu leki wan broko skotu.
A de leki te wan hei skotu abi wan priti di o meki a heri skotu fadon.
Wantronso a o fadon broko.
14 A o broko neleki te wan sma e naki wan bigi prapi panya.
A o broko so te,
taki nowan pisi fu en yu o man gebroiki fu puru krofaya na ini wan faya,
noso fu man teki pkinso watra.”*
15 A Moro Hei Masra Yehovah, a Santawan fu Israel, taki:
„Efu unu wani kisi ferlusu, dan un musu drai kon baka na mi èn un musu wakti mi.
Efu unu wani de tranga, dan un no musu bruya èn un musu fertrow na mi tapu.”
Ma unu no ben wani du dati.
16 Na presi fu dati unu taki: „Kwetkweti! Wi o lowe gwe nanga asi!”
Dati meki unu o abi fu lowe trutru.
Unu taki: „Wi o rèi na tapu asi di e lon es’esi!”
Dati meki un feanti o kon es’esi na un baka tu.
17 Te wán fu den nomo tapu skreki gi unu, dan wán dusun sma fu unu o beifi.
Te feifi fu den tapu skreki gi unu, dan unu o lon gwe,
teleki den wan di tan abra de leki wan postu di tnapu let’opo na tapu wan bergi-ede
èn leki wan fraga* di ala sma man si na tapu wan pkin bergi.
18 Ma Yehovah o tan wakti unu nanga pasensi,* fu di a wani du bun gi unu.
A o opo du wan sani fu sori unu sar’ati.
Bika Yehovah na wan Gado fu retidu.
Koloku fu ala den sma di e tan wakti en.*
19 Te sma kon tan baka na Sion èn na Yerusalem, dan den no o krei srefsrefi. Te a yere unu e bari kari en, a o du bun gi unu nomonomo. Fa a o yere unu, a o piki unu. 20 Yehovah o meki bigi problema de leki n’nyan gi unu èn nowtu o de leki watra fu dringi. Ma dan a Bigi Leriman fu unu no o kibri moro èn nanga un eigi ai unu o si un Bigi Leriman. 21 Efu unu ben o kmoto na a reti pasi èn beni go na ret’anusei noso na kruktu-anusei, dan un eigi yesi o yere wan sten na un baka e taki: „Disi na a pasi. Waka na tapu.”
22 Un musu broko den popki di unu ben anbegi èn di unu ben tapu nanga solfru èn nanga gowtu.* Un musu trowe den gwe neleki a duku fu wan uma di abi en munsiki. Dan un musu taki: „Trowe a morsu sani disi gwe!”* 23 Dan Gado o meki alen fadon na tapu den siri di unu sai na un gron èn unu o abi furu bun n’nyan.* Na a ten dati den meti fu unu o abi bun furu presi pe den kan nyan grasi. 24 Den kaw nanga den buriki di e wroko na den gron o kisi ala sortu bun n’nyan di moksi nanga makandra. Den o nyan srefi na aleisi di sma drai nanga skopu fu puru den buba. 25 Na tapu ibri hei bergi nanga pkin bergi yu o abi kriki, na a dei te furu sma o dede èn te den toren o broko fadon. 26 Te Yehovah o tai a soro fu en pipel èn te a o dresi a hebi mankeri di a ben gi den di a naki den, dan a leti fu a furu mun o kon de leki a leti fu a son. A leti fu a son o skèin seibi tron moro tranga leki fa a gwenti skèin. Iya, a o skèin a leti di a e skèin na ini seibi dei.
A e taki nanga atibron
èn en tongo de leki wan faya di e pori ala sani.
28 A yeye fu en* de leki a fruduwatra fu wan liba di e doro te na a neki fu den pipel.
A o seki den na ini wan zeef teleki nowan fu den no de moro.
Neleki fa wan sma e poti wan t’tei na ini wan asi en mofo fu tyari en, na so a o poti wan t’tei na ini a mofo fu den pipel, ma a o tyari den go lasi.
29 Dan unu o singi wan singi neleki fa unu gwenti singi
na a neti te unu e sreka* fu hori wan santa fesa.
Unu o prisiri
neleki wan sma di e bro wan froiti
te a e go na a bergi fu Yehovah, a Stonbergi fu Israel.
30 Yehovah o meki sma yere a kfalek sten fu en
èn a o meki den si te a e opo en anu fu naki den feanti nanga bigi atibron.
A o kon nanga wan faya di e pori ala sani,
nanga wan bigi sibibusi, nanga dondru èn nanga pispisi ijs di e fadon kmoto na hemel.
31 A sten fu Yehovah o meki Asiria frede srefsrefi.
A o naki Asiria nanga wan tiki.
32 Ibri leisi te Yehovah naki Asiria
nanga en tiki fu strafu en,
sma o yere tamboerijn nanga harpu
te a opo en anu fu feti nanga den.
A meki wan dipi bradi olo fu bron udu.
Wan lo faya nanga udu de.
A blo fu Yehovah de leki wan liba fu faya*
di o bron en.