A di fu dri brifi fu Yohanes

1 Disi na wan brifi gi Gayus di mi lobi trutru. Leki owruman* mi e skrifi a brifi disi gi yu.

2 Mi lobi brada, mi e begi taki yu tan gosontu èn taki sani tan go bun nanga yu soleki fa a de now. 3 Mi ben prisiri srefsrefi di wan tu brada kon ferteri mi taki yu e hori yusrefi na a tru leri èn taki yu e tan du san yu leri. 4 Nowan sani e gi mi moro prisiri* leki te mi e yere taki den pkin fu mi e tan du san den leri.

5 Mi lobi brada, yu e tan yepi den brada, awinsi yu no sabi den. 6 Den ben ferteri a gemeente fu a lobi fu yu. Mi e begi yu, te den o gwe yepi den na wan fasi di Gado feni bun. 7 Bika den go na difrenti presi fu preiki fu Gado nen, sondro fu teki wan sani fu den sma drape.* 8 Fu dati ede wi musu du bun gi den sma disi, so taki wi kan wroko makandra nanga den na ini a tru anbegi.

9 Mi ben skrifi wan tu sani gi a gemeente, ma Diotrefes di wani de a moro prenspariwan na unu mindri, no e teki san wi e taigi en fu di a no abi nowan lespeki gi wi. 10 Dati meki te mi kon, mi o taki fu den sani di a e du. A e waka e taki wan lo ogri fu wi. Èn efu dati no sari, a no wani yepi den brada di kon drape èn a no abi lespeki gi den. A e pruberi tu fu tapu den sma di wani yepi den brada èn a wani yagi den sma disi puru fu a gemeente.

11 Mi lobi brada, no teki na eksempre fu a sma di e du ogri, ma teki na eksempre fu a sma di e du bun. A sma di e du bun na fu Gado, ma a sma di e du ogri no sabi Gado. 12 Ala sma e taki bun fu Demetriyus èn a fasi fa a e libi e sori taki a e hori ensrefi na a tru leri. Wi srefi si krin taki en na wan bun man èn yu sabi taki san wi e taki de tru.

13 Mi musu taigi yu furu sani ete, ma mi no wani skrifi den na ini wan brifi. 14 Ma mi howpu fu si yu heri esi, dan wi o taki.

Meki sani waka bun nanga yu.

Den brada* seni taki yu odi. Taki ibriwan fu den brada drape odi gi mi.