A di fu tu brifi gi Timoteyus

4 Krestes Yesus o krutu den libiwan nanga den dedewan te a o sori ensrefi èn te a o tiri na ini en Kownukondre. Na fesi en èn na fesi Gado mi e taigi yu na wan seryusu fasi: 2 Preiki a wortu. Du disi fayafaya na ini bun ten èn na ini muilek ten. Gi sma rai, warskow den èn gi den dek’ati. Du dati nanga ala pasensi èn nanga a koni fu gi sma leri, 3 bika wan ten o kon taki sma no o wani yere a soifri leri. Den o du san densrefi wani èn den o suku wan lo leriman di o taki sani nomo fu switi den yesi.* 4 Den no o wani arki a tru leri, ma den o arki leitori. 5 Ma yu musu de nanga krin ferstan ala ten. Nyan pina, du a wroko fu wan preikiman fu a bun nyunsu,* du yu wroko finfini.

6 Den kanti mi trowe kba leki wan dringi-ofrandi èn heri esi a ten o doro taki mi o kon fri. 7 Mi feti a bun feti. Mi lon a streilon te na a kba. Mi no lasi bribi. 8 Vanaf now mi e wakti fu kisi a kroon di den reti’ati sma o kisi. Na dati Masra di de wan ret’ati krutuman o gi mi leki pai na a krutudei. A no mi w’wan o kisi a pai dati, ma ala den sma di ben e angri fu Masra sori ensrefi o kisi en tu.

9 Du muiti fu kon es’esi na mi, 10 bika Deimas gwe libi mi, fu di a lobi a grontapu* disi. A go na Tesalonika. Kresens go na Galasia èn Titus go na Dalmasia. 11 Lukas w’wan de nanga mi. Tyari Markus te yu e kon, bika a kan yepi mi nanga a wroko. 12 Mi seni Tikikus go na Efeise. 13 Te yu e kon, tyari a dyakti kon di mi ben libi na Karpus na ini Trowas èn tyari den bukulolo tu, spesrutu den wan di meki fu metibuba.

14 A koprosmeti Aleksander du mi furu ogri, ma Yehovah* o pai en baka gi den sani di a du. 15 Yu srefi musu luku bun nanga en, bika a ben gens wi fayafaya di wi ben preiki a boskopu.

16 A fosi leisi di mi ben abi fu opo taki gi misrefi, nowan sma horbaka gi mi, ma den alamala gwe libi mi. Meki Gado gi den pardon fu dati. 17 Ma Masra tan na mi sei èn a gi mi krakti, so taki mi ben kan du a preikiwroko finfini èn ala pipel ben kan yere a boskopu disi. A ben puru mi na a mofo fu a lew. 18 Masra o puru mi na ini ala ogri èn a o ferlusu mi, so taki mi kan go na ini en Kownukondre na hemel. Meki a kisi glori fu têgo, ja, fu ala ten. Amen.

19 Gi Preska, Akwila nanga na osofamiri fu Oneisiforus odi gi mi.

20 Erastus tan na Korente. Ma mi libi Trofimus na Mileite, fu di a siki. 21 Du muiti fu kon dya fosi a kowru ten fu a yari doro.

Ebulus e seni taki yu odi. Pudens, Linus, Klaudia nanga ala den tra brada e seni taki yu odi tu.

22 Meki Masra de nanga yu fu di yu abi a yoisti fasi fu denki. Meki a sori unu bun-ati.