Gi den Romesma

3 Sortu wini wan sma abi te a de wan Dyu noso te a besnèi?* 2 Na ala fasi furu wini de. Na a fosi presi, Gado gi den Dyu a santa wortu fu en. 3 Ma fa a de nanga son sma di no abi bribi? Efu den no abi bribi, dan disi wani taki dati sma no man fertrow Gado moro? 4 Kwetkweti! Gado e taki san tru, awinsi ala sma e lei. A de soleki fa Gado Buku taki: „A o kon na krin taki yu abi leti te yu e taki. Te den o taki ogri fu yu, dan a o de fu si taki yu abi leti.” 5 Te wi e du ogri, dan a retidu fu Gado e kon na krin. Ma te Gado e strafu wi, dan disi wani taki dati a no e du san reti? (Na dati son sma e denki.) 6 Kwetkweti! Efu Gado no e du san reti, dan fa a o krutu grontapu dan?

7 Ma efu a lei di mi lei e sori moro krin taki Gado e taki san tru èn sma e prèise en fu a sani dati, dan fu san ede Gado e si mi leki wan sondari? 8 Dan a moro bun fu taki: „Meki wi du ogri, so taki wan bun kan kon fu dati.” Na dati son sma e taki dati wi taki, ma den e lei gi wi. Dati meki a strafu di den o kisi fiti gi den.

9 Disi wani taki dati wi bun moro den? Kwetkweti! Bika wi taki kba dati Dyu nanga Grikisma na sondusma. 10 A de soleki fa Gado Buku taki: „Nowan ret’ati sma de, nôno, nowan no de. 11 Nowan sma abi ferstan, nowan sma e suku Gado. 12 Ala sma gwe libi a reti pasi, den alamala kon de sma di no bun gi noti. Nowan fu den e du bun, nôno, nowan fu den.” 13 „A gorogoro fu den de leki wan opo grebi èn den e bedrigi sma nanga den mofo.” „A vergif fu wan takru sneki de na ini den mofo.” 14 „Den mofo furu nanga fluku èn den e taigi sma soso hati sani.” 15 „Den futu e lon go kiri sma.” 16 „Ala presi pe den e go, den e du ogri nanga sma èn den e pina den. 17 Den no sabi fa fu libi bun nanga sma.” 18 „Den no abi nowan lespeki gi Gado.”

19 Now wi sabi taki ala sani di a Wet taki, na gi den sma di e hori a Wet. Dati meki nowan fu den kan taki dati den no e meki fowtu. Heri grontapu o kisi strafu fu Gado. 20 Fu dati ede, a no te wan sma e du san a Wet e taki, dan Gado o si en leki wan ret’ati sma. A Wet e meki wi kon sabi nomo taki wi na sondusma.

21 Ma now a kon na krin fu san ede Gado kan si wan sma leki wan ret’ati sma awinsi a no e hori a Wet. A Wet nanga den buku fu den Profeiti ben taki fu a sani disi. 22 Ja, Gado kan si wan sma leki wan ret’ati sma te a e bribi na ini Yesus Krestes. Na so a de gi ala den sma di e bribi. Bika ala sma na a srefi. 23 Ala sma sondu èn den no man de leki Gado di no e meki fowtu. 24 Ma na a bun-ati fu Gado meki a seni Krestes Yesus fu pai nanga en brudu so taki sma kan kon fri. A sani disi e meki taki Gado man si sma leki ret’ati sma. Disi de leki wan kado di Gado gi sma. 25 Gado gi Krestes leki wan ofrandi so taki sma kan kon bun baka nanga en te den e bribi na ini a brudu fu Krestes. Gado du disi fu sori taki a e du san reti, bika a sori pasensi èn a gi sma pardon fu den sondu di den du na ini a ten di psa. 26 Na so Gado sori sma na ini a ten disi taki a e du san reti èn taki a e si sma leki ret’ati sma te den e bribi na ini Yesus.

27 We dan, wan sma kan meki bigi ete? Kwetkweti. A kan meki bigi fu di a e hori ensrefi na a Wet? Nôno. Fu san ede? Fu di na a bribi fu wan sma prenspari. 28 Bika wi sabi taki na te wan sma abi bribi, Gado e si en leki wan ret’ati sma. A no te a e du san a Wet e taki. 29 Gado na a Gado fu den Dyu w’wan? A no de a Gado fu tra pipel tu? Iya, en na a Gado fu tra pipel tu. 30 Fu di Gado na wán Gado, meki a o si sma leki ret’ati sma te den e bribi, awinsi den besnèi noso den no besnèi. 31 We, a de so taki wi no e teri a Wet moro fu di wi e bribi? Kwetkweti! Na presi fu dati wi e hori a Wet hei.