ESTER

1 A tori disi psa na ini a ten fu Kownu Ahasferos* di ben e tiri moro leki 127 kontren* fu India te go miti Etiopia.* 2 Na a ten dati, Kownu Ahasferos ben de na a fortresi* Susan.* Na fu drape a ben e tiri a kownukondre fu en. 3 Na ini a di fu dri yari di a ben e tiri, a hori wan bigi fesa gi den edeman nanga den futuboi fu en. A legre fu Media nanga Persia, den heihei man nanga den tiriman fu den difrenti kontren* ben de na a fesa tu. 4 Omeni dei langa a sori sma den gudu fu a bigi kownukondre fu en. Wán hondro aititenti dei langa a sori den ala sani di meki taki a kisi biginen nanga glori. 5 Di den dei disi psa, Kownu Ahasferos hori wan bigi fesa gi ala prenspari sma nanga ala den tra sma di ben de na a fortresi* Susan.* Seibi dei langa, Kownu hori a fesa na ini a dyari fu en oso. 6 Fu moi a presi, sma anga garden fu linnen-krosi, fini katun nanga blaw krosi di den ben tai nanga diri t’tei èn paars t’tei di meki fu skapu-wiwiri. Den ben fasi den t’tei disi na solfru linga èn na pilari fu marmer-ston. Boiti dati, den ben abi langa bangi fu gowtu nanga solfru. Den bangi disi ben de na tapu wan vloer di ben meki fu wan spesrutu sortu redi ston, weti marmer-ston, parelmoer* nanga blaka marmer-ston.

7 Na a fesa den ben e prati win na ini gowtu kan. Nowan fu den kan ben de a srefi. A win fu Kownu ben lai na a fesa. Na soso wan kownu ben kan prati so furu win. 8 Kownu ben taki dati nowan sma ben musu dwengi wan trawan fu dringi win. A ben taigi den edeman fu den futuboi na ini en oso taki ala sma ben mag dringi omeni den wani.

9 Na uma fu Kownu ben nen Fasti. En srefi ben hori wan fesa gi den uma na a oso fu Kownu Ahasferos.

10 Na a di fu seibi dei, Kownu Ahasferos ben e firi prisiri fu di a ben dringi furu win. Dati meki a kari Mehuman, Bista, Harbona, Bikta, Abakta, Seitar nanga Karkas. Kownu taigi den seibi man disi di ben e wroko gi en 11 fu tyari en uma Fasti kon na en. A ben wani taki sma ben musu si fa Fasti moi, bika a ben moi fu tru. Fasti ben musu weri a spesrutu tai-ede di fiti na uma fu wan kownu. 12 Wan tu leisi Kownu seni den man di ben e wroko gi en fu kari en uma Fasti kon, ma Fasti ben weigri fu kon. Dati meki Kownu mandi srefsrefi èn a kisi bigi atibron.

13 Ne Kownu taki nanga den koniman di ben sabi furu fu den sortu tori disi. (Kownu ben abi a gwenti fu taki fu den afersi fu en nanga ala den man di ben sabi a wet nanga tra sani di abi fu du nanga a wet. 14 Den raiman di Kownu ben gwenti kari ben de Karsena, Setar, Admata, Tarsis, Meres, Marsena nanga Memukan. Den seibi man disi ben de granman na ini Persia nanga Media. Na den ben kan go na fesi Kownu èn na den ben abi den moro hei posisi na ini a kownukondre.) 15 Kownu taigi den: „Mi, Kownu Ahasferos, seni den futuboi fu mi fu kari mi frow Fasti kon, ma a no ben wani kon. San a wet e taki fu a tori disi? San musu psa nanga Fasti?”

16 Ne Memukan taigi Kownu nanga den tra edeman: „Kownu-uma Fasti no opo ensrefi teige Kownu w’wan. A opo ensrefi tu teige ala den edeman nanga ala sma di e libi na ini ala den kontren* di Kownu Ahasferos e tiri. 17 Te ala den tra uma na ini a kondre kon yere a tori disi fu na uma fu Kownu, dan den o wis’wasi den masra fu den. Den o taki: ’Kownu Ahasferos seni kari en frow Fasti, ma Fasti no ben wani go.’ 18 Te den uma fu den edeman fu Persia nanga Media yere san na uma fu Kownu du, dan den o gi den masra fu den bigitaki. Dan den edeman nanga den frow fu den no o abi lespeki gi makandra moro èn den ati o bron srefsrefi nanga makandra. 19 Efu Kownu feni en bun, dan Kownu kan meki wan wet di e taki dati Fasti no musu kon na fesi Kownu Ahasferos noiti moro. Dan wi o skrifi a wet dati pe den tra wet fu Persia nanga Media skrifi, so taki a no kan kenki noiti. Na presi fu Fasti, Kownu musu teki wan tra uma di bun moro en. 20 A wet fu Kownu musu meki bekènti na ini a heri kondre fu en di bigi srefsrefi. Dan ala den tra uma na ini a kondre o sori lespeki gi den masra fu den, awinsi den na prenspari sma, noso sma di no prenspari.”

21 Kownu nanga den tra edeman ben feni a sani disi bun. Dati meki Kownu du soleki fa Memukan taki. 22 Ne Kownu seni brifi go na ala den kontren* na ini a kondre fu en. Ibriwan fu den brifi ben skrifi na a fasi fa den sma fu den kontren* disi ben gwenti skrifi. Den brifi ben skrifi tu na ini den tongo di den sma ben e taki. Na ini a brifi ben skrifi taki ibri masra ben o de basi* na ini en eigi oso èn a ben o taki a tongo fu en eigi pipel.*

2 Bakaten di na atibron fu Kownu Ahasferos kon kowru, a memre san Fasti du èn san den ben besroiti fu du nanga en. 2 Dan den futuboi fu Kownu taki: „Meki sma go suku yongu uma gi Kownu. Den musu de moi uma di no d’don nanga wan man ete. 3 Na ini ala den kontren* fu a kondre, Kownu musu seni wan tu man fu suku moi yongu uma di no d’don nanga wan man ete. Meki den tyari den kon na a fortresi* Susan,* dan den poti den na ini na oso fu den uma pe Kownu poti Hegai leki edeman* fu sorgu den uma. Meki sma lobi switismeri-oli gi den skin,* so taki den kon moro moi. 4 A yongu uma di Kownu feni bun o teki a presi fu Fasti.” Fu di Kownu ben lobi a tori disi, meki a teki a rai fu den futuboi fu en.

5 Na a ten dati wan Dyu di ben nen Mordekai ben de na a fortresi* Susan.* A man disi ben de a manpkin fu Yahir èn a granpkin fu Simei. Simei ben de a manpkin fu Kes, wan man fu a lo fu Benyamin. 6 Kes ben de wan fu den man di Kownu Nebukadnesar fu Babilon ben tyari gwe fu Yerusalem nanga tranga, makandra nanga Kownu Yekonya* fu Yuda. 7 Mordekai ben e kweki* Hadasa* di ben nen Ester tu, fu di Ester no ben abi papa nanga mama moro. Ester ben de na umapkin fu Mordekai en papa brada. Di Ester en papa nanga mama dede, dan Mordekai teki en leki en eigi umapkin. A yongu uma Ester ben abi wan moi skin èn a ben e fiti ai. 8 Di sma yere san Kownu taki èn sortu wet a poti, dan den tyari furu yongu uma kon na a fortresi* Susan.* Na so den tyari Ester go na a oso pe Hegai ben de na edeman di ben abi a frantwortu fu sorgu den uma.

9 Hegai ben breiti nanga a yongu uma disi èn a ben lobi fa a de.* Dati meki a sreka sani es’esi fu meki sma lobi switismeri-oli* gi Ester èn fu gi en spesrutu n’nyan. Dan a poti seibi yongu uma fu na oso fu Kownu fu sorgu gi Ester. Baka dati a meki Ester nanga den yongu uma di ben e yepi en, go tan na a moro bun presi na ini na oso fu den uma. 10 Ma Ester no taki noti fu en pipel noso en famiri, bika Mordekai ben taigi en krin taki a no musu du dati. 11 Ibri dei, Mordekai ben e waka psa a dyari fu na oso fu den uma, fu di a ben wani sabi fa a e go nanga Ester èn san ben e psa nanga en.

12 Ibriwan fu den yongu uma ben musu go na fesi Kownu Ahasferos baka den 12 mun di sma ben sreka den fu kon moro moi. Soleki fa a gwenti ben de, dan siksi mun langa sma ben musu lobi den skin fu den uma* nanga mirre-oli èn siksi mun langa den ben musu lobi den skin nanga balsem-oli èn tra sortu oli. 13 Baka te wan yongu uma ben kba du den sani disi, a ben kan kon na fesi Kownu. Te a ben o kmoto na a oso fu den uma fu go na a oso fu Kownu, dan sma ben o gi en iniwan sani di a ben aksi. 14 Na mofoneti, na uma disi ben e go na a oso fu Kownu èn m’manten a ben e go na wan tra oso. Dati ben de a di fu tu oso pe den uma ben e tan. Na edeman fu na oso dati ben de Sasgas. Na en ben e sorgu den tra uma fu Kownu. Efu wan uma ben go na ini na oso dati, dan a no ben o kon na fesi Kownu moro, boiti efu Kownu ben feni en bun èn efu a kari na uma dati na en nen.

15 Ne a ten doro gi Ester, na umapkin fu Abihayil di ben de na omu fu Mordekai, a man di kweki Ester leki en eigi umapkin. Di Ester go na fesi Kownu, a no aksi nowan sani, boiti den sani di Hegai, na edeman di ben e sorgu den uma, taigi en fu aksi. (A heri pisi ten dati, ala sma di ben si Ester ben kon lobi en.) 16 Ne den tyari Ester go na a oso fu Kownu Ahasferos na ini a di fu tin mun. Dati ben de a mun Teibet* na ini a di fu seibi yari di Kownu Ahasferos ben e tiri. 17 Kownu ben kon lobi Ester moro ala den tra uma. Dati meki a ben e prisiri moro nanga Ester èn a ben e sori moro switifasi* gi en leki gi den tra yongu uma. Ne Kownu teki a spesrutu tai-ede di na uma fu wan kownu gwenti weri èn a poti en na tapu na ede fu Ester. Na so Ester tron na uma fu Kownu na presi fu Fasti. 18 Dan Kownu hori wan bigi fesa spesrutu gi Ester. Ala den prenspari man nanga den futuboi fu Kownu ben de drape. Ne Kownu seni boskopu go na ala sei taki den sma na ini den kontren* di a ben e tiri, ben o kon fri.* A ben e prati kado di soso wan kownu ben kan prati.

19 A di fu tu leisi di sma tyari yongu uma kon di no ben d’don nanga wan man ete, Mordekai ben e sdon na a portu fu Kownu. 20 Ma Ester no ben e taki fu en pipel noso en famiri, bika Mordekai ben taigi en taki a no musu du dati. Ester ben e du ala san Mordekai taki, neleki fa a ben e du di Mordekai ben e sorgu en.

21 Na a ten dati, Mordekai ben abi a gwenti fu sdon na a portu fu Kownu Ahasferos. Yu ben abi tu man, Biktan nanga Teres, di ben e hori wakti na a doro fu na oso fu Kownu. Den man disi ben kisi atibron èn dati meki den ben e suku fu du ogri nanga Kownu. 22 Di Mordekai yere a tori disi, dan wantewante a go ferteri Ester. Ne Ester go taigi Kownu. A taigi en taki na Mordekai ferteri en a tori disi. 23 Sobun, sma go ondrosuku a tori èn den kon si taki a tru. Dati meki den anga ala tu man na wan postu. Baka dati sma skrifi a tori disi na ini a buku di e taki fu sani di psa fosten. Kownu ben de leti drape di den skrifi a tori disi.

3 Baka wan pisi ten Kownu Ahasferos gi bigi grani na Haman, a manpkin fu Hamedata, wan bakapkin fu Agak. Kownu ben gi en wan moro hei posisi leki ala den tra heihei man na ini a kownukondre. 2 Te Haman ben e psa, dan ala den futuboi fu Kownu di ben de na a portu fu Kownu ben e saka kindi gi en èn den ben e boigi go na gron, bika na dati Kownu ben taigi den fu du. Ma Mordekai ben e weigri fu saka kindi gi Haman èn a no ben e boigi go na gron. 3 Ne den futuboi fu Kownu di ben de na a portu fu Kownu, taigi Mordekai: „Fu san ede yu no e du san Kownu taki?” 4 Ala dei den ben e aksi Mordekai a sani disi, ma a no ben e arki den. A taigi den taki en na wan Dyu. Dati meki den go taigi Haman, bika den ben wani si o langa Mordekai ben o man du a sani disi.

5 Di Haman si taki Mordekai ben weigri fu saka kindi gi en èn taki a no ben e boigi go na gron, dan Haman kisi bigi atibron. 6 Dati meki a ben wani kiri Mordekai. Ma a no ben wani kiri Mordekai w’wan, a ben wani kiri a heri pipel fu en tu fu di sma ben taigi en taki Mordekai ben de wan Dyu. Na so Haman bigin suku wan fasi fu kiri a pipel fu Mordekai. A ben wani kiri ala den Dyu na ini a heri kondre fu Ahasferos.

7 Na ini a fosi mun Nisan,* na ini a di fu 12 yari di Kownu Ahasferos ben e tiri, den iti Pur (noso lot) gi Haman, fu di a ben wani sabi na sortu dei èn na ini sortu mun a ben kan du san a ben abi na prakseri. Te fu kba a lot sori go na Adar,* a di fu 12 mun. 8 Dan Haman taigi Kownu Ahasferos: „Wan pipel de na mindri den sma di e tan na ini ala den kontren* fu yu kondre. Den wet fu den de heri tra fasi leki den di fu ala den tra pipel èn den no e hori den wet fu Kownu. A no bun taki Kownu libi a pipel disi fu du san den wani. 9 Efu Kownu feni en bun, dan meki sma skrifi wan wet taki a pipel disi musu dede. Dan mi o gi den wrokoman fu Kownu 342.000 kilo solfru* fu poti na a presi pe sma e kibri a moni fu Kownu.”*

10 Ne Kownu puru en linga na en finga èn a gi dati na Haman, a manpkin fu Hamedata, a bakapkin fu Agak, di ben de wan feanti fu den Dyu. 11 Dan Kownu taigi Haman: „Yu kan du san yu wani nanga a solfru èn nanga a pipel.” 12 Na a di fu 13 dei fu a fosi mun, den kari den sekretarsi fu Kownu kon fu skrifi brifi gi den satrap,* den granman di ben e tiri den difrenti kontren* na ini a kondre fu Kownu nanga den edeman fu den difrenti pipel. Den sekretarsi skrifi ala san Haman ben wani. Ibriwan fu den brifi ben skrifi na a fasi fa den sma fu den kontren* ben gwenti skrifi. Den brifi ben skrifi tu na ini den tongo di den sma ben e taki. Nanga a linga di Kownu Ahasferos gi Haman, den poti wan stampu na tapu den brifi fu sori taki na Ahasferos seni den brifi disi.

13 Ne den meki boskopuman tyari den brifi go na ala den kontren* na ini a kondre fu Kownu. Na so den seni boskopu taki sma ben musu kiri den Dyu. Den ben musu puru den alamala na pasi. Nowan fu den ben musu tan na libi. Yongusma nanga owrusma, umasma nanga pkin-nengre, den alamala ben musu dede na ini wán dei. Disi ben o psa na a di fu 13 dei fu a di fu 12 mun, Adar. Dan sma ben kan teki ala den gudu fu den tu. 14 Den sani di skrifi na ini den brifi disi, ben musu tron wan wet na ini ala den difrenti kontren na ini a kondre. Ala sma ben musu kon sabi a tori disi, so taki den ben kan sreka densrefi gi a dei disi. 15 Den boskopuman ben musu go es’esi, bika na Kownu ben taki so. A wet disi ben meki bekènti na a fortresi* Susan.* Ne Kownu nanga Haman go sdon fu dringi, ma na ini a foto Susan* soso bruya ben de.

4 Di Mordekai yere ala san Haman du, a priti en krosi, a weri krosi di sma gwenti weri te den e sari èn a trowe asisi na tapu en skin. Dan a go na mindrisei fu a foto èn a bari krei bun tranga. 2 Ma a doro te na a portu fu Kownu, fu di nowan sma ben mag psa a portu fu Kownu efu a ben weri krosi di sma gwenti weri te den e sari. 3 Na ini ala den difrenti kontren pe boskopuman meki bekènti san Kownu taki èn sortu wet a poti, den Dyu ben de nanga bigi sari. Den ben e bari krei èn den ben e faste.* Furu fu den ben e d’don na ini asisi èn na tapu krosi di sma gwenti weri te den e sari. 4 Di den yongu uma nanga den man di ben e wroko gi Kownu-uma Ester, ferteri en san psa, a skreki srefsrefi. Dati meki a seni tra krosi gi Mordekai fu a weri na presi fu den krosi di a ben weri fu sori taki a e sari. Ma Mordekai no ben wani den krosi di Ester seni gi en. 5 Ne Ester seni Hatak, wan fu den man di Kownu poti leki dinari fu Ester, fu go aksi Mordekai san psa.

6 Sobun, Hatak go na Mordekai di ben de na a pren* fu a foto na fesi a portu fu Kownu. 7 Dan Mordekai ferteri Hatak ala san psa nanga en. A ferteri en tu omeni moni Haman ben pramisi fu tyari go na a presi pe sma ben e kibri a moni fu Kownu, so taki den ben kan pai sma fu kiri den Dyu. 8 Baka dati Mordekai gi Hatak wan brifi di e taki fu a wet di ben meki na a foto Susan.* Dati na a wet di e taki dati sma musu kiri ala den Dyu. Hatak ben musu sori Ester a brifi disi èn a ben musu taigi Ester taki a ben musu go langalanga na Kownu fu begi en meki a sori sar’ati gi en pipel èn fu aksi Kownu fu yepi en pipel.

9 Baka dati Hatak go na Ester èn a taigi en san Mordekai taki. 10 Dan Ester seni Hatak go taigi Mordekai a sani disi: 11 „Ala futuboi fu Kownu èn ala sma na ini den difrenti kontren* fu a kondre sabi taki Kownu poti wán wet nomo gi sma di e kon na ini a pkin dyari na fesi na oso fu Kownu: Efu wan man noso uma kon na ini a pkin dyari na fesi na oso fu Kownu, sondro taki Kownu kari en, dan a sma dati musu dede. Soso te Kownu langa en gowtu tiki gi a sma, a sma dati o tan na libi. Na 30 dei kba Kownu no seni kari mi.”

12 Di Mordekai kisi a boskopu fu Ester, 13 a seni piki Ester: „ No denki taki na fu di yu de na ini na oso fu Kownu, dan noti no o psa nanga yu te sma o kiri ala den Dyu. 14 Efu yu no taki noti now, dan den Dyu o kisi yepi nanga ferlusu na wan tra fasi. Ma yu nanga yu papa famiri o dede. Kande na fu dati ede yu tron na uma fu Kownu, so taki yu kan yepi yu pipel now.”

15 Ne Ester seni piki Mordekai: 16 „A bun. Go kari ala den Dyu di e libi na ini a foto Susan* èn faste* gi mi. Dri dei nanga dri neti langa un no musu nyan noso dringi wan sani. Mi nanga den yongu uma di e wroko gi mi, o du dati tu. Baka dati mi o go na Kownu, awinsi a wet no e gi mi primisi fu du dati. Efu mi musu dede, dan mi o dede.” 17 Dan Mordekai gwe èn a du ala san Ester taigi en fu du.

5 Na a di fu dri dei, Ester weri moi krosi di fiti na uma fu wan kownu, dan a go tnapu na ini a pkin dyari leti na fesi na oso fu Kownu.* Kownu ben e sdon na tapu en kownusturu na ini en oso. A ben kan luku langalanga go na dorosei. 2 Di Kownu si Ester tnapu na ini a dyari, a ben breiti fu si en. Ne Kownu langa en gowtu tiki gi Ester. Ester kon krosbei, dan a fasi na ede fu a tiki.

3 Ne Kownu taki: „San psa Ester, mi uma? San yu wani aksi mi? Awinsi na afu fu mi kownukondre, yu o kisi en.” 4 Dan Ester taki: „Efu Kownu feni en bun, dan meki Kownu nanga Haman kon tide fu nyan a n’nyan di mi sreka spesrutu gi yu.” 5 Dati meki Kownu taki: „Un go kari Haman. Meki a du es’esi san Ester taki.” Bakaten Kownu nanga Haman go nyan a n’nyan di Ester sreka.

6 Di den ben e dringi win, Kownu aksi Ester: „San yu wani? Ala san yu wani, yu o kisi. San yu wani aksi mi? Awinsi na afu fu mi kownukondre, mi o gi yu dati.” 7 Ester piki en: „Disi na san mi wani aksi Kownu: 8 Efu Kownu e prisiri nanga mi èn efu Kownu feni en bun fu gi mi san mi wani èn fu du san mi aksi, dan meki Kownu nanga Haman kon tamara fu nyan a n’nyan di mi o sreka gi unu. Dan tamara mi o taigi Kownu san mi wani.”

9 Na so Haman gwe a dei dati. A ben breiti èn a ben e prisiri srefsrefi. Ma fa Haman si Mordekai e sdon na a portu fu Kownu, a kisi bigi atibron fu di Mordekai no ben opo tnapu gi en èn a no ben frede en srefi. 10 Ma Haman hori ensrefi, dan a go na en oso. Ne a seni kari den mati fu en nanga en frow Seres. 11 Dan Haman bigin dyaf fa a abi furu gudu nanga manpkin. A ferteri tu fa Kownu gi en bigi grani èn fa a gi en wan posisi di hei moro di fu den tra heihei man nanga futuboi fu Kownu.

12 Haman taki tu: „Boiti dati, Ester, na uma fu Kownu, sreka wan bigi n’nyan. Na mi nanga Kownu w’wan ben de drape. A kari mi fu kon nyan nanga en tamara tu. 13 Ma nowan fu den sani disi switi gi mi, solanga mi e si a Dyu Mordekai e sdon na a portu fu Kownu.” 14 Dan Haman en frow Seres nanga den mati fu en taki: „Taigi sma fu seti wan postu fu 22 meter* fu anga Mordekai. Dan tamara m’manten yu musu taigi Kownu meki den anga Mordekai na a postu dati. Baka dati yu kan go nyan nanga Kownu nanga prisiri.” Haman ben lobi a tori disi. Sobun, a taigi sma fu seti a postu.

6 A neti dati, Kownu no ben man sribi.* Dati meki a seni sma go teki a buku pe sani ben skrifi di psa fosten. Ne den leisi a buku gi Kownu. 2 Den leisi a pisi di e ferteri fa Mordekai ben taki dati Biktana nanga Teres, den tu man di ben e hori wakti na a doro fu na oso fu Kownu Ahasferos, ben suku fu du ogri nanga Kownu. 3 Dan Kownu aksi: „Sortu grani wi gi Mordekai èn sortu bun wi du gi en di a du a sani disi?” Ne den futuboi fu Kownu piki en: „Wi no du noti gi en.”

4 Bakaten Kownu aksi: „Suma de na dorosei?” Na a momenti dati Haman ben de na ini a bigi dyari fu na oso fu Kownu,* fu di a ben wani taigi Kownu fu anga Mordekai na a postu di a ben taigi sma fu meki. 5 Ne den futuboi fu Kownu taigi Kownu: „Na Haman e tnapu na ini a dyari.” Dan Kownu taki: „Meki a kon na insei.”

6 Di Haman go na insei, Kownu aksi en: „San wi musu du gi wan man di Kownu wani gi grani?” Ne Haman prakseri: „Sortu tra sma Kownu ben o wani gi grani? A musu de taki na mi a e taki.” 7 Dati meki Haman taigi Kownu: „Efu Kownu wani gi wan man grani, 8 dan meki sma teki wan krosi di Kownu srefi gwenti weri. Boiti dati, den musu teki wan asi di Kownu gwenti rèi èn den musu poti wan moi sani tapu na ede fu na asi. 9 Dan Kownu musu meki wan fu den heihei man fu en tyari a krosi nanga na asi go na a man disi di Kownu wani gi grani. Den musu weri a krosi gi a man èn den musu meki a rèi tapu na asi na a pren* fu a foto. Dan den musu waka na en fesi èn den musu bari: ’Na so den e du nanga wan man di Kownu wani gi grani!’” 10 Wantewante Kownu taigi Haman: „Es’esi, go teki a krosi nanga na asi, dan yu musu go na Mordekai, a Dyu di e sdon na a portu fu Kownu. Ala sani di yu taki, na dati yu musu du gi en. Sorgu taki yu du ala sani precies leki fa yu taki.”

11 Ne Haman teki a krosi nanga na asi, dan a weri a krosi gi Mordekai èn a meki Mordekai rèi tapu na asi na a pren* fu a foto. A ben e waka na Mordekai fesi èn a ben e bari: „Na so den e du nanga wan man di Kownu wani gi grani!” 12 Baka dati Mordekai drai go baka na a portu fu Kownu. Ma Haman go na oso es’esi. A ben e sari srefsrefi èn a ben tapu en ede nanga wan duku. 13 Dan Haman ferteri en frow Seres nanga ala den mati fu en, ala san psa nanga en. Ne den mati fu en di ben e gi en rai nanga en frow Seres taigi en: „Efu Mordekai, di hei moro yu nownow kba, na wan Dyu, dan yu no o man wini en. Na lasi yu o lasi.”

14 Den ben e taki nanga Haman ete, di den dinari fu Kownu kon teki en fu tyari en es’esi go na Ester di ben sreka wan bigi n’nyan.

7 Sobun, Kownu nanga Haman go nyan nanga Ester, na uma fu Kownu. 2 Na a di fu tu dei di den ben e dringi win, Kownu aksi Ester ete wan leisi: „San yu wani, Ester, mi uma? Ala san yu wani, yu o kisi. San yu wani aksi mi? Awinsi na afu fu mi kownukondre, mi o gi yu dati.” 3 Ne Ester piki: „Efu Kownu e prisiri nanga mi èn efu Kownu feni en bun, dan mi wani aksi Kownu fu meki mi tan na libi. Mi e begi yu, meki mi pipel tan na libi tu, 4 bika sma seri mi nanga mi pipel, fu di den wani puru wi na pasi. Den wani kiri wi alamala. Den no wani taki wi tan na libi. Efu na soso seri den ben seri wi leki srafu, mi no ben o taki noti. Ma efu na ogri disi psa, dan Kownu o lasi tu.”

5 Wantewante Kownu Ahasferos aksi Ester: „Pe a man de di prefuru fu du a sani dati? Suma na en?” 6 Dan Ester taki: „Na Haman! Na en na a feanti di du na ogri disi.”

Ne Haman kon frede srefsrefi gi Kownu nanga na uma fu en. 7 Nanga bigi atibron, Kownu opo kmoto na ini a kamra pe den ben e dringi win, dan a go na ini a dyari fu en oso. Ne Haman opo go begi Ester fu meki a tan na libi, bika a ben si kba taki Kownu ben o strafu en. 8 Dan Kownu kmoto na ini a dyari fu na oso fu kon baka na ini a kamra pe den ben e dringi win. Ne a si taki Haman trowe ensrefi na tapu a langa bangi pe Ester ben e d’don. Kownu taki: „San! Dan a wani d’don nanga mi frow ini mi eigi oso tu?” Fa Kownu taki a sani disi, sma tapu Haman en fesi nanga wan duku. 9 Dan Harbona, wan fu den man di ben e wroko gi Kownu, taki: „Haman ben taigi sma fu meki wan postu fu anga Mordekai, a man di ben warskow Kownu taki sma ben wani kiri en. A postu de na Haman en oso èn a hei sowan 22 meter.”* Ne Kownu taki: „Anga en na a postu dati.” 10 Na so den anga Haman na a postu pe a ben o anga Mordekai. Baka dati na atibron fu Kownu saka.

8 A dei dati, Kownu Ahasferos gi en uma Ester na oso fu Haman, a feanti fu den Dyu. Mordekai ben musu kon na fesi Kownu tu fu di Ester ben ferteri Kownu suma Mordekai ben de fu en. 2 Dan Kownu puru en linga di a ben teki baka fu Haman èn a gi dati na Mordekai. Ne Ester poti Mordekai fu luku na oso fu Haman.

3 Baka dati Ester go taki nanga Kownu ete wan leisi. A trowe ensrefi na Kownu futu èn a bigin krei. A begi Kownu fu du wan sani, so taki na ogri di Haman, a bakapkin fu Agak, ben wani du nanga den Dyu, no psa. 4 Ne Kownu langa en gowtu tiki gi Ester èn Ester opo tnapu na fesi Kownu. 5 Ester taki: „Efu Kownu feni en bun èn efu Kownu e prisiri nanga mi, iya, efu a de wan bun sani gi Kownu èn efu Kownu lobi mi trutru, dan meki Kownu skrifi taki sma no musu du san skrifi na ini den brifi fu a bedrigiman Haman, a manpkin fu Hamedata di de wan bakapkin fu Agak. Bika Haman ben skrifi na ini den brifi taki sma musu kiri den Dyu na ini ala den difrenti kontren* na ini a kownukondre. 6 Mi no o man si fa ogri e miti mi pipel èn fa sma e kiri den famiri fu mi.”

7 Dati meki Kownu Ahasferos taigi en uma Ester nanga a Dyu Mordekai: „Luku, mi gi Ester na oso fu Haman èn mi meki den anga Haman na wan postu, fu di a ben wani du ogri nanga den Dyu.* 8 Now un musu skrifi wan wet di o yepi den Dyu. Skrifi ala sani di unu feni bun èn teki a linga fu Kownu, dan un poti wan stampu na tapu a papira pe unu skrifi a wet. Bika te wan sani skrifi na ini a nen fu Kownu èn te a sani stampu nanga a linga fu Kownu, dan nowan sma man kenki dati.”

9 Sobun, na a di fu 23 dei fu a di fu dri mun, dati na a mun Sifan,* sma kari den sekretarsi fu Kownu kon fu skrifi ala sani di Mordekai ben abi fu taki. Dan den seni brifi gi den Dyu, den satrap,* den granman nanga den edeman di ben e tiri den 127 kontren* fu India te go miti Etiopia. Ibriwan fu den brifi ben skrifi na a fasi fa den sma fu den kontren* ben gwenti skrifi. Den ben skrifi na ini den tongo di den sma ben e taki. Den brifi gi den Dyu ben skrifi na a fasi fa den Dyu ben e skrifi èn na ini den eigi tongo.

10 Mordekai meki den sekretarsi skrifi den brifi na ini a nen fu Kownu Ahasferos, dan a teki a linga fu Kownu èn a poti stampu na tapu den brifi. Baka dati a meki boskopuman di e rèi asi, tyari den brifi gwe. Den asi ben de spesrutu asi fu Kownu di ben man lon es’esi. 11 Den brifi ben e taki dati Kownu gi primisi taki den Dyu na ini ala den difrenti foto ben kan kon makandra fu feti gi den libi. Den ben mag kiri ala den sma di ben wani kon feti nanga den, awinsi na ini sortu kontren den ben e libi. Iya, den ben mag puru den alamala na pasi, srefi den umasma nanga den pkin-nengre. Nowan fu den ben musu tan na libi. Den ben kan teki den gudu fu den tu. 12 Na ini ala den kontren* di Kownu Ahasferos ben e tiri, den sani disi ben musu psa na a srefi dei. A dei dati ben de a di fu 13 dei fu a di fu 12 mun, Adar.* 13 Den sani di skrifi na ini den brifi ben musu tron wan wet na ini ala den difrenti kontren.* Ala sma ben musu kon sabi a tori disi, so taki te a dei ben o doro, den Dyu ben o de srekasreka fu du a srefi sani di den feanti fu den ben wani du nanga den. 14 Den boskopuman di ben e rèi den spesrutu asi fu Kownu, gwe wantewante èn den rèi es’esi fu di Kownu ben taki so. A wet disi ben meki bekènti tu na a fortresi* Susan.*

15 Dan Mordekai gwe fu Kownu. A ben weri den krosi di wan kownu gwenti weri. Den krosi disi ben meki fu blaw nanga weti titei. Boiti dati, a ben weri wan moi kroon fu gowtu èn wan diri dyakti di meki fu skapu-wiwiri di ferfi kon paars. Den sma fu a foto Susan* ben e bari fu prisiri. 16 Ala den Dyu drape ben e firi leki wan hebi kmoto na den tapu.* Den ben breiti srefsrefi èn sma ben e lespeki den. 17 Na ini ala den kontren* èn na ini ala den foto pe sma yere san Kownu taki èn sortu wet a meki, den Dyu ben breiti srefsrefi èn den ben e bari fu prisiri. Den ben e hori bigi fesa èn furu n’nyan ben de. Furu sma fu a kondre ben taki dati den na Dyu, fu di den ben kon frede den Dyu.

9 Den feanti fu den Dyu ben e wakti a di fu 13 dei fu a di fu 12 mun Adar* fu feti nanga den Dyu soleki fa Kownu ben taki èn soleki fa a ben skrifi na ini a wet. Den ben denki taki den ben o wini den Dyu, ma di a dei doro, sani waka tra fasi. Den Dyu wini den sma di ben abi bita-ati gi den. 2 Na ini ala den kontren* di Kownu Ahasferos ben e tiri, den Dyu kon makandra na ini den foto pe den ben e libi. Ne den go feti nanga den sma di ben wani du den ogri. Ma nowan sma ben man feti nanga den Dyu, bika ala sma ben kon frede den. 3 Ala den edeman fu den kontren,* den satrap,* den granman nanga den man di ben e luku den afersi fu Kownu, ben kon frede Mordekai. Dati meki den man disi yepi den Dyu. 4 Mordekai ben kisi furu makti na ini na oso* fu Kownu. Fu di a ben e kisi moro makti, meki sma ben kon yere fu en na ini ala den kontren* di Kownu e tiri.

5 Na so den Dyu kiri ala den feanti fu den nanga fet’owru. Den puru den alamala na pasi èn nowan fu den tan na libi. Den du san den wani nanga den sma di ben abi bita-ati gi den. 6 Na a fortresi* Susan* den Dyu kiri 500 sma. 7 Boiti dati, den kiri Parsandata, Dalfon, Aspata, 8 Porata, Adalia, Aridata, 9 Parmasta, Arisai, Aridai nanga Waisata. 10 Dati na den tin manpkin fu Haman, a feanti fu den Dyu di ben de a manpkin fu Hamedata. Ma baka di den kiri den, den no teki nowan gudu fu den.

11 Na a dei dati, Kownu yere omeni sma den kiri na a fortresi* Susan.*

12 Dan Kownu taigi en uma Ester: „Na a fortresi* Susan* den Dyu kiri 500 sma nanga den tin manpkin fu Haman. Ma san den du na den tra kontren* na ini a kownukondre? Sortu tra sani yu wani ete? Ala san yu wani, yu o kisi. San moro yu wani aksi? Ala san yu aksi, mi o du gi yu.” 13 Dati meki Ester taki: „Efu Kownu feni en bun, dan gi den Dyu na a foto Susan* primisi fu du a srefi sani tamara di a wet ben taigi den fu du tide. Meki den anga den skin fu den tin manpkin fu Haman na postu tu.” 14 Sobun, Kownu gi den Dyu primisi fu du den sani dati. Den meki wan wet na a foto Susan* èn den anga den tin manpkin fu Haman na postu.

15 Na so den Dyu na a foto Susan* kon makandra baka na a di fu 14 dei fu a mun Adar. Ne den kiri 300 sma na a foto Susan,* ma den no teki nowan gudu fu den sma disi.

16 Den tra Dyu di ben e libi na den kontren* di Kownu e tiri, kon makandra tu èn den feti gi den libi. Den puru den feanti fu den na pasi. Ala nanga ala, den Dyu kiri 75.000 sma di ben abi bita-ati gi den. Ma den no teki nowan gudu fu den sma disi. 17 Den sani disi psa na a di fu 13 dei fu a mun Adar. Na a di fu 14 dei den rostu. Den poti a dei dati leki wan fesadei èn wan dei fu meki prisiri.

18 Den Dyu na a foto Susan* kon makandra fu feti gi den libi na a di fu 13 dei èn na a di fu 14 dei fu a mun. Dan den rostu na a di fu 15 dei. Den poti a dei dati leki wan fesadei èn wan dei fu meki prisiri. 19 Na fu dati ede den Dyu di ben e tan na ini den foto na den distrikt, meki a di fu 14 dei fu a mun Adar tron wan fesadei. A ben o de wan prisiri dei èn sma ben o seni n’nyan gi makandra.

20 Ne Mordekai skrifi ala den sani di psa. A seni brifi gi ala den Dyu na den kontren* di Kownu Ahasferos ben e tiri, awinsi den ben e libi krosbei noso farawe. 21 Na ini den brifi a skrifi taki ibri yari den musu memre a di fu 14 dei nanga a di fu 15 dei fu a mun Adar, 22 bika na den dei dati den Dyu ben kon fri fu den feanti fu den. Na ini a mun dati sari kon tron prisiri èn a dei di ben o de wan rowdei tron wan prisiri dei. Den dei dati ben o de fesadei. Sma ben o meki prisiri, den ben o seni n’nyan gi makandra èn den ben o gi den pôtiwan kado.

23 Den Dyu ben agri fu tan hori a fesa disi ala yari. Den ben o du tu san skrifi na ini a brifi fu Mordekai. 24 Ala den sani disi den ben o du, fu di Haman, a feanti fu den Dyu di ben de wan manpkin fu Hamedata èn wan bakapkin fu Agak, ben suku wan fasi fu kiri den. A ben taigi sma fu iti Pur (noso lot), fu di a ben wani bruya den Dyu èn fu di a ben wani kiri den. 25 Ma di Ester go na fesi Kownu, dan Kownu taki: „A srefi ogri di Haman ben wani du nanga den Dyu, na dati sma musu du nanga en.” Dan sma skrifi a sani di Kownu taki na tapu papira èn den anga Haman nanga den manpkin fu en na postu. 26 Fu dati ede den e kari den fesadei disi Purim. A nen disi kmoto fu a wortu pur.* Mordekai ben skrifi ala den sani disi na ini a brifi disi èn den Dyu srefi si fa sani ben waka na a ten dati. 27 Dati meki den Dyu agri taki den srefi, den bakapkin fu den èn ala sma di ben o libi na den mindri, ben o tan memre den tu dei disi ibri yari na a srefi ten, soleki fa a brifi ben taki. 28 Ala den pkin nanga bakapkin fu den, ala den famiri èn ala sma na ini den difrenti kontren nanga foto ben musu memre den dei disi. Ala ten den Dyu ben musu hori a Purimfesa na den dei dati èn den bakapkin fu den ben musu tan memre den dei disi tu.

29 Ne Ester, na uma fu Kownu di ben de na umapkin fu Abihayil, nanga a Dyu Mordekai skrifi a di fu tu brifi pe den ben taki krin taki den Dyu musu hori a Purimfesa. 30 Baka dati Mordekai seni brifi gi ala den Dyu na ini den 127 kontren* na ini a kownukondre fu Kownu Ahasferos. Na ini den brifi a skrifi taki sani musu go bun nanga den èn taki den sani di a skrifi, ben de tru. 31 A Dyu Mordekai nanga Ester, na uma fu Kownu, ben skrifi na sortu dei den Dyu ben musu hori a Purimfesa. Den taigi den Dyu tu taki na a ten dati den ben musu faste* èn den ben musu begi Gado fayafaya. Sobun, den Dyu pramisi taki den nanga den bakapkin fu den ben o du ala den sani disi. 32 Ne sma skrifi na ini wan buku taki Ester ben taki dati a Purimfesa musu hori na a fasi disi.

10 Kownu Ahasferos ben meki sma wroko leki srafu na ini a kownukondre. Srefi sma fu den èilanti na ini a se ben e wroko gi en leki srafu.

2 A heri fasi fa Kownu Ahasferos sori a makti fu en èn den bigi sani di a du, skrifi na ini a Historiabuku di e taki fu den tori fu den kownu fu Media nanga Persia. A buku dati e taki finfini tu sortu bigi grani Kownu ben gi Mordekai. 3 Boiti Kownu Ahasferos, a Dyu Mordekai ben de a moro prenspari man na ini a kondre. Den Dyu ben e si en leki wan bigi man èn furu fu den kondreman fu en ben e lespeki en. A ben e du bun gi en pipel èn a ben meki muiti fu sani waka bun gi ala den bakapkin fu den.