Preikiman

1 Den sani di e kon now, na san a leriman,* a manpkin fu David, taki. A ben de kownu na Yerusalem.

 3 Sortu wini wan sma e kisi fu ala a tranga wroko di a e du dyaso na grontapu?*

 7 Ala den liba e lon go na se, ma tòg a se no e furu.

Na a presi pe den liba e kmoto, na drape den e drai go baka, so taki den kan lon go baka na se.

10 Wan sani de di wan sma kan taki fu en: „Luku, disi na wan nyun sani”?

12 Mi, a leriman, ben de kownu fu Israel na Yerusalem. 13 Mi gebroiki ala mi koni fu kon sabi èn fu ondrosuku ala sani di sma du na grontapu. Dati na ala den sani di Gado gi libisma fu du, ma di e tyari brok’ede kon gi den.

16 Mi ben taki na ini mi ati: „Luku, mi kon kisi furu koni, moro leki iniwan sma di ben de na Yerusalem fosi mi. Mi kon ferstan san na koni nanga sabi.” 17 Nanga mi heri ati mi ben wani kon sabi san na koni, san na law èn san na don. Ne mi kon si tu taki den sani disi de leki winti di sma e feti fu fanga.

2 Mi taki na ini mi ati: „Kon meki mi pruberi fu si san na prisiri. Meki mi si sortu bun dati e tyari kon.” Ma disi srefi ben de fu soso.

 2 Mi ben taki: „Na wan don sani* fu e laflafu nomo!”

Mi ben aksi misrefi: „Sortu wini prisiri e tyari kon gi sma?”

3 Mi ben e dringi win fu kan firi prisiri, aladi mi ben e tan waka nanga koni. Mi ben e ondrosuku tu san e psa nanga sma te den e du dondon sani. Na so mi ben kan si san na a moro bun sani di libisma kan du na ini a syatu pisi ten di den de na libi. 4 Mi bigin du bigi sani. Mi bow furu oso èn mi prani furu droifigron. 5 Mi meki bigi dyari di moi èn di abi furu bon. Mi prani ala sortu froktubon na ini den dyari disi. 6 Mi meki watra-olo so taki den yongu bon di ben prani na ini a busi fu mi ben kan kisi watra. 7 Mi ben kon kisi furu mansrafu nanga umasrafu. Den pkin di den kisi, ben kon de mi srafu tu. Mi kon kisi furu meti, iya, bun furu kaw, skapu, nanga krabita. Mi ben kon abi moro sani leki iniwan sma di ben e tiri fosi mi na Yerusalem. 8 Mi tyari solfru nanga gowtu kon na wán, sosrefi ala den gudu di wan kownu gwenti kisi fu den kontren di a e tiri. Mi meki mansma nanga umasma wroko gi mi leki singiman. Mi kon abi a sani di e gi mansma bigi prisiri, dati na wan uma. Iya, mi kon abi furu uma. 9 Mi ben kon abi moro sani leki iniwan sma di ben de fosi mi na Yerusalem. Ma tòg mi ben e tan waka nanga koni.

10 Ala sani di mi ben wani du,* na dati mi ben e du. Mi no ben tapu misrefi fu meki prisiri na ala sortu fasi. Mi ben e prisiri tu nanga ala a tranga wroko di mi ben e du. Na a prisiri disi mi ben kisi leki pai fu ala a tranga wroko di mi ben e du. 11 Ma di mi luku ala den sani di misrefi du èn ala a tranga wroko fu mi, ne mi si taki ala sani ben de fu soso. A ben de leki na winti mi ben e feti fu fanga. Nowan sani de na grontapu di warti* trutru.

12 Ne mi go ondrosuku san na koni, san na law èn san na don. Mi aksi misrefi: „San a sma di e kon baka a kownu disi o du?” We, a o du den srefi sani di sma du kba. 13 Ne mi kon si taki neleki fa leti bun moro dungru, na so a moro bun te wan sma koni leki te a e du dondon sani.

14 Konisma e si sani krin, ma donsma e waka na ini bigi dungru. Mi kon ferstan tu taki den alamala e dede te fu kba. 15 Dan mi taki na ini mi ati: „A srefi sani di psa nanga den donsma o psa nanga mi tu.” Dan fu san ede mi kon abi someni koni? Dati meki mi taki na ini mi ati: „A sani disi srefi ben de fu soso.” 16 Sma no o tan memre den donwan, ma den no o memre den koniwan tu. Na ini a ten di e kon, den o fergiti ala sma. Èn fa den konisma o dede? Neleki fa den donsma e dede, na so den konisma o dede tu.

17 Mi no ben lobi a sortu libi disi, bika ala den sani di libisma e du na grontapu ben e meki mi sari. Ala den sani di den ben e du na fu soso. A ben de leki na winti sma ben e feti fu fanga. 18 A ben hati mi taki mi wroko so tranga, fu di mi sabi taki mi o abi fu libi ala sani na baka gi a man di o kon baka mi. 19 Suma sabi efu a o du sani nanga koni noso efu a o du dondon sani? Tòg a o teki ala sani abra di mi ben wroko tranga fu den, iya, ala sani di mi du nanga koni. Srefi dati na fu soso. 20 Mi bigin firi brokosaka di mi prakseri ala a tranga wroko di mi du na grontapu. 21 Wan sma kan wroko tranga. A kan wroko nanga koni, a kan sabi san a e du èn a kan du en wroko bun. Ma tòg a o abi fu libi ala den sani fu en na baka gi wan sma di no wroko tranga fu den. Disi srefi na fu soso èn na wan sari sani.

22 Awinsi wan sma e wroko tranga na grontapu noso a e meki ala muiti fu kisi san a wani, sortu wini dati e tyari kon gi en? 23 En heri libi langa a wroko fu en e tyari soso sari nanga span-ede kon. Te neti srefi a no man rostu. Disi srefi na fu soso.

24 A moro bun sani di wan libisma kan du fu dati ede, na fu nyan, fu dringi èn fu prisiri nanga a tranga wroko fu en. Mi si taki srefi disi e kon fu a tru Gado. 25 Bika suma e nyan den moro bun n’nyan leki mi èn suma e dringi den moro bun sani leki mi?

26 A tru Gado e gi den sma di a feni bun, koni nanga sabi èn a e meki den prisiri. Ma a e gi sondari a wroko fu tyari sani kon na wán èn fu kibri den gi den sma di a feni bun. Disi srefi na fu soso. Na winti nomo sma e feti fu fanga.

9 Sortu wini wan wrokoman e kisi gi ala a muiti di a e meki? 10 Mi si sortu wroko Gado gi libisma fu du, so taki den abi wan sani fu du. 11 Ala sani a meki moi* na a yoisti ten. A meki libisma srefi nanga a firi fu libi fu têgo.* Tòg noiti den no o man kon sabi finfini fa a tru Gado meki ala sani.

12 Mi kon si taki a moro bun sani di libisma kan du na fu prisiri èn fu du bun na ini a libi fu den. 13 Mi kon sabi tu taki ibri sma musu nyan, taki a musu dringi èn taki a musu prisiri nanga ala a tranga wroko di a e du. Dati na wan kado fu Gado.

14 Mi kon sabi taki ala den sani di a tru Gado e meki o tan fu ala ten. Sma no kan poti noti moro na tapu èn den no kan puru noti fu den tu. A tru Gado meki den, so taki libisma kan abi bigi lespeki gi en.

15 San e psa ben psa kba èn san musu kon ete ben de kba. A tru Gado e suku* den sani di trawan ben feti fu kisi.*

16 San mi si tu na grontapu, na taki pe sma ben musu koti krutu na wan reti fasi, den ben e du ogri. Pe den ben musu du san reti, den ben e du ogri tu. 17 Mi taki na ini mi ati: „A tru Gado o koti krutu gi den ret’ati sma èn gi den ogrisma, bika wan ten de gi ala sani di musu psa èn gi ala sani di musu du.”

18 Na ini mi ati mi taki dati a tru Gado o tesi libisma èn a o sori den taki den de a srefi leki meti. 19 Bika a sani di e psa nanga libisma, na dati e psa tu nanga den meti. A srefi sani e psa nanga den alamala te fu kba. Soleki fa a wan e dede, na so a trawan e dede tu. Den alamala abi a srefi libikrakti. Dati meki libisma no bun moro meti. Iya, ala sani na fu soso. 20 Den alamala e go na a srefi presi. Den alamala meki fu doti èn den alamala o tron doti baka. 21 Suma sabi efu a libikrakti fu libisma e opo go na loktu, noso efu a libikrakti fu meti e saka go ondro gron? 22 Mi si taki nowan sani moro bun leki te wan sma e prisiri nanga en wroko, fu di dati na a pai di a o kisi. Bika suma man meki a si san o psa baka te a dede?

4 Mi bigin poti prakseri baka na ala den sani di sma e du fu pina trawan na grontapu. Mi si den watra-ai fu den sma di trawan ben e pina, ma nowan sma ben de fu trowstu den. Iya, nowan sma ben de fu trowstu den, fu di den sma di ben e pina den ben abi furu makti. 2 Di mi prakseri den dedewan, mi kon si taki a moro bun fu de wan sma di dede, leki fu de wan sma di de na libi. 3 Iya, a moro bun srefi fu de wan sma di no gebore ete èn di no si den ogri di sma e du na grontapu.

4 Mi si o furu muiti sma e du fu du den wroko bun, soso fu di den e strei nanga makandra. Disi srefi na fu soso. Na winti nomo sma e feti fu fanga.

5 Den donsma e fow den anu èn na so den e pori den libi.*

6 A moro betre fu rostu pkinso* leki fu du furu tranga wroko* èn fu feti fu fanga a winti.

7 Mi go denki fu wan tra sani di sma e du na grontapu èn di de fu soso tu. 8 Son sma no abi pkin, den no abi brada èn den no abi nowan mati. Den de den w’wan, ma tòg den e tan wroko tranga. Noiti den gudu fu den e sari den. Ma noiti den e aksi densrefi: „Gi suma mi e wroko so tranga? Fu san ede mi no e prisiri?” Na fu soso den e meki so furu muiti èn a wroko fu den e gi den soso brok’ede.

9 Tu sma moro bun leki wán, bika den o feni wan bun pai* gi a tranga wroko fu den. 10 Efu wan fu den ben o fadon, dan a trawan kan opo en. Ma san o psa te a wan fadon, ma wan trawan no de fu opo en?

11 Boiti dati, efu tu sma e d’don nanga makandra, dan den o tan waran. Ma fa wán sma nomo kan tan waran? 12 Kande wan sma ben kan fon wan trawan di de en w’wan. Ma te tu sma de, dan den man feti nanga en. Dri t’tei di frekti kon na wán, no man hari koti so makelek.

13 Wan pôti pkin di koni, betre moro wan owru kownu di don èn di no wani arki moro te sma e warskow en. 14 A koni pkin disi kmoto na straf’oso fu tron kownu, aladi a ben gebore leki wan pôti pkin na a ten di na owru kownu ben e tiri. 15 Mi luku ala den sma di de na libi, iya, den sma di e waka lontu na grontapu. Ne mi si fa a ben e go nanga a yonguman di ben kon na ini a presi fu a kownu. 16 Aladi furu sma de di e horbaka gi en, tòg den sma di o kon bakaten no o prisiri nanga en moro. Iya, disi srefi na fu soso. Na winti nomo sma e feti fu fanga.

5 Luku bun fa yu e tyari yusrefi te yu e go na a oso fu a tru Gado. A moro bun fu arki leki fu tyari wan ofrandi soleki fa den donsma e du, bika den no sabi taki na ogri den e du.

2 No de tumsi gaw fu taki. Te yu de na fesi a tru Gado, no de tumsi gaw fu taki san yu e prakseri. Bika a tru Gado de na hemel, ma yu de na grontapu. Dati meki yu musu denki fosi yu taki. 3 Tumsi furu brok’ede* e meki sma dren èn sma di e taktaki tumsi furu e taki dondon sani. 4 Te yu sweri gi Gado taki yu o du wan sani, dan yu no musu draidrai fu du en, bika a no e prisiri nanga donsma. San yu sweri fu du, na dati yu musu du. 5 A moro betre taki yu no sweri fu du wan sani, leki fu sweri taki yu o du wan sani, ma yu no du en. 6 No meki yu mofo taki wan sani di kan meki yu sondu. No taki na fesi na engel* taki na wan fowtu yu meki. Fu san ede a tru Gado en ati musu bron nanga yu fu wan sani di yu taki? Fu san ede a musu pori den sani di yu du? 7 Bika neleki fa furu brok’ede e meki sma dren, na so a de taki te sma e taki tumsi furu, den o taki lawlaw sani. Ma abi bigi lespeki gi a tru Gado.

8 No skreki te yu si taki wan heihei man e pina den pôtiwan. Iya, no skreki te a no e koti krutu na wan reti fasi noso te a no e du san reti na ini a kontren fu yu. Bika wan sma di hei moro a heihei man dati e si san e psa èn yu abi tra sma tu di hei moro den man disi.

9 Boiti dati, den sani di e gro na den gron den e prati nanga makandra. Srefi a n’nyan fu a kownu e kmoto fu en gron.

10 Noiti solfru o sari a sma di lobi solfru èn efu wan sma lobi gudu, dan noiti a moni di a e meki o sari en. A sani disi srefi na fu soso.

11 Te wan sma e kisi moro gudu, dan den sma di e gebroiki den o kon moro furu tu. Sortu wini den sani disi e tyari gi a sma di abi den, boiti taki a man luku den nomo nanga en ai?

12 Wan futuboi e sribi switi, awinsi a e nyan pkinso noso awinsi a e nyan furu. Ma wan gudusma no man sribi bun, fu di a abi furu sani.

13 Mi si wan sari sani na grontapu: Wan man e kibri den gudu fu en nomo. Ma den gudu disi e tyari takru bakapisi gi en. 14 A lasi ala den gudu fu en, fu di a du wan bisnis* di no waka bun. Di a kisi wan pkin a no ben abi noti fu libi na baka gi en.

15 Neleki fa wan sma kmoto na ini en m’ma bere sososkin, na so a o drai gwe baka sososkin. Iya, a o gwe leki fa a ben kon. A no o man tyari noti gwe di a wroko tranga fu en.

16 Disi tu na wan trutru sari sani: Leki fa wan sma kon, na so a o drai gwe baka. Sobun, sortu wini wan sma e feni te a e wroko tranga soso fu fanga winti? 17 Boiti dati, a de leki na ini dungru a e nyan ibri dei. Heri dei a e stress, a e siki èn a e atibron.

18 Mi kon si taki a sani disi bun fu du: Wan sma musu nyan, dringi èn prisiri nanga ala a tranga wroko di a e du na grontapu na ini a syatu pisi ten di a tru Gado gi en fu libi. Dati na a pai* fu en. 19 Boiti dati, te a tru Gado gi wan sma gudu èn te a gi en na okasi fu prisiri nanga den, dan a musu teki a pai* disi èn prisiri nanga a tranga wroko fu en. Disi na a kado fu Gado. 20 A sma disi no o tan prakseri fa a libi fu en e psa gwe, fu di a tru Gado gi en furu sani fu du di e meki taki a e prisiri.

6 Mi si wan tra sari sani di e psa furu leisi nanga libisma na grontapu: 2 A tru Gado e gi wan sma gudu nanga glori, so taki a no e mankeri nowan sani di a ben sa wani. Tòg a tru Gado no e gi en na okasi fu prisiri nanga den gudu disi. Ma a kan taki wan sma di a no sabi e prisiri nanga den. Disi na wan sari sani trutru èn a de fu soso. 3 Kande wan man abi wán hondro pkin, a e libi furu yari èn a e kon owru te fu kba. Ma efu a no e prisiri nanga den bun sani di a abi fosi a doro en grebi, dan wan pkin di dede fosi a gebore betre moro a man disi. 4 Na fu soso a pkin disi kmoto na ini en m’ma bere. A dede na ini dungru èn a no abi wan nen. 5 Aladi noiti a pkin disi no si a son èn a no sabi noti, tòg a betre* moro a man disi. 6 Sortu wini a abi gi wan sma efu a e libi tu dusun yari ma a no e prisiri fu a libi? A no na a srefi presi ala sma e go?

7 Ala a tranga wroko fu wan sma na fu span en bere. Tòg noiti en bere e furu. 8 Fa wan konisma betre moro wan donsma? Sortu wini wan mofinasma e feni te a sabi san a musu du fu man tan na libi?* 9 A moro betre fu prisiri nanga den sani di yu man si leki fu angri fu sani di yu no man kisi. A sani disi srefi na fu soso. A de leki na winti sma e feti fu fanga.

10 Ala den sani di de ben kisi wan nen kba èn a de krin fa libisma de trutru. Te wan libisma de na fesi wan tra sma di tranga moro en, dan a no man opo taki gi ensrefi. 11 O moro yu e taki, o moro yu o taki lawlaw sani. Sortu wini dati e tyari gi wan libisma? 12 Suma sabi san na a moro bun sani di wan libisma kan du na ini a syatu pisi ten di a de na libi? A libi fu en na fu soso èn a de leki wan skaduw di e psa gwe. Suma kan taigi wan libisma san o psa na grontapu, baka te a dede?

7 Wan bun nen* bun moro diri oli èn a dei di wan sma dede bun moro a dei di a gebore. 2 A moro bun fu go na wan oso pe sma e row, leki fu go na wan oso pe fesa de, bika dati na a kba fu ibri libisma. Den sma di de na libi musu hori a sani dati na prakseri. 3 A moro bun fu sari leki fu lafu, bika wan sari fesi e meki wan sma ati kon moro bun. 4 Te wan konisma de na ini wan oso pe sma e row, dan a e prakseri bun fu a libi. Ma a wan-enkri sani di wan donsma e prakseri, na fa a kan meki prisiri.

5 A moro bun fu arki te wan konisma e pir’ai gi yu, leki fu arki a singi fu donsma. 6 A lafu fu wan donsma de leki a b’bari fu maka di e bron na ondro wan patu. A sani disi srefi na fu soso. 7 Ma te sma e pina wan konisma, dan a kan du lawlaw sani. Tyuku kan meki wan sma du kruka sani.

8 A kba fu wan tori moro bun leki a bigin fu en. A moro bun fu abi pasensi leki fu abi bigifasi. 9 No de wan sma di e mandi esi, bika na soso donsma e mandi esi.*

10 No taki: „Fosi, sani ben betre moro now”, bika a no wan koni sani fu taki so.

11 Te wan sma e kisi koni nanga gudu, dan dati bun. A e tyari wini gi den sma di de na libi. 12 Koni e kibri sma, neleki fa moni e kibri sma. Ma te wan sma abi sabi èn a abi koni tu, dan dati o hori en na libi.

13 Luku san a tru Gado du. Te a meki wan sani kron, dan suma man meki a sani dati kon reti baka? 14 Te yu abi wan bun dei, dan yusrefi musu du bun. Ma te a dei fu yu takru,* dan hori na prakseri taki a tru Gado e gi pasi taki bun dei de èn taki takru dei de. Dati meki libisma no o man kon sabi* san o psa nanga den na ini a ten di e kon.

15 Ala sortu sani mi si na ini a syatu libi fu mi.* Ret’ati sma e dede, aladi den e tyari densrefi na wan reti fasi, ma ogrisma e libi langa, aladi den e du den ogri fu den.

16 No denki taki yu na a moro bun sma di de. No denki taki yu sabi ala sani. Fu san ede yu musu pori yu libi? 17 No besroiti fu libi wan ogri libi. No kon de wan sma di e du don. Fu san ede yu musu dede, fosi a ten fu yu doro? 18 A moro betre fu arki den tu warskow disi. No poti nowan fu den na wan sei. Bika a sma di abi lespeki gi Gado o arki ala den tu rai disi.

19 Koni e meki taki wan konisma tranga moro leki tin tranga man na ini wan foto. 20 Nowan ret’ati sma de na grontapu di e du bun ala ten èn di noiti no e sondu.

21 Boiti dati, no poti tumsi furu prakseri na ala sani di sma e taki. Noso yu o yere fa yu futuboi e taki takru fu* yu. 22 Bika yu sabi heri bun omeni leisi yu srefi taki takru fu tra sma.

23 Nanga ala a koni di mi abi mi sdon prakseri ala den sani disi èn mi taki: „Mi o kon koni.” Ma tòg mi no kon koni. 24 Libisma no man ferstan ala sani. Son sani muilek tumsi fu ferstan. Suma man ferstan ala sani? 25 Ne mi besroiti fu kon sabi san na koni èn fu san ede sani de leki fa den de. Mi ben wani ferstan fu san ede a de wan ogri fu du don sani èn fu san ede a de wan don sani fu du lawlaw sani. Iya, mi go ondrosuku den sani disi, so taki mi ben kan kon sabi den. 26 Ne mi kon ferstan a sani disi: Wan uma de di ogri moro dede. A de leki a net fu wan ontiman, en ati de leki wan fisinet èn den anu fu en de leki bui. A sma di e du a wani fu a tru Gado o lowe gi na uma disi. Ma na uma o fanga a sma di e du sondu.

27 A leriman* taki: „Disi na san mi kon si, baka di mi ondrosuku a wan sani baka a trawan. 28 Mi tan suku, ma mi no feni san mi ben e suku. Na mindri wán dusun sma mi feni wán krin-ati man nomo, ma mi no feni nowan krin-ati uma. 29 Iya, na disi nomo mi kon si: A tru Gado meki libisma nanga wan krin ati, ma densrefi go prakseri fu du tra sani.”

8 Suma de leki a koniwan? Suma sabi fa fu lusu wan problema?* Na a koni fu wan sma e meki en fesi brenki. A seryusu fesi fu en o kenki kon tron wan prisiri fesi.

2 Mi taki: „Du san a kownu taki. Na so yu e sori lespeki gi a sweri di yu meki na fesi Gado. 3 No hasti yusrefi fu kmoto na en fesi. No go du wan sani di no bun, bika a kownu kan du ala san a wani. 4 San a kownu taki, na dati e psa tu. Suma kan aksi en: ’San yu e du?’”

5 Nowan ogri o miti a sma di e du san a kownu taki. Wan konisma o sabi o ten a musu du wan sani èn fa a musu du en. 6 Libisma abi furu problema, ma ibri afersi abi en ten èn a fasi fa fu lusu en. 7 Efu nowan sma sabi san o psa, dan suma kan taki fa sani o waka?

8 Neleki fa nowan sma man tiri a libikrakti* èn neleki fa nowan sma man hori a libikrakti fu a no gwe, na so nowan sma abi makti tapu a dei fu dede. Neleki fa nowan srudati e kisi primisi fu go na oso te feti de, na so den sma di e du ogri no o man lon gi den bakapisi fu den ogri di den du.*

9 Ala den sani disi mi si èn mi poti prakseri na ibri sani di sma du na grontapu. Mi si taki sensi di libisma bigin tiri tra libisma sani no waka bun gi den.* 10 Mi si fa sma ben e beri den ogriwan, iya, den wan di ben gwenti go na ini a santa presi èn di ben e kmoto drape baka. Heri esi den sma fu a foto pe den ben e du den ogri fu den fergiti den. A sani disi srefi na fu soso.

11 Fu di den no strafu ogrisma es’esi gi den ogri fu den, meki na ati fu libisma e kon tranga èn den e tan du ogri. 12 Wan sondari e du ogri wán hondro leisi èn tòg a e libi langa. Ma mi sabi taki a o go bun nanga den sma di abi lespeki gi a tru Gado, fu di den e lespeki en. 13 Ma a no o go bun kwetkweti nanga den ogrisma. A libi fu den o psa gwe leki wan skaduw. Den no o libi langa, bika den no e lespeki Gado.

14 Wan sani e psa na grontapu di muilek fu ferstan. Dati na taki sma e libi nanga den bun sma leki den na ogrisma èn taki den e libi nanga den ogrisma leki den na bun sma. Disi srefi na fu soso.

15 Mi ben taigi sma taki a bun fu prisiri, bika a moro bun sani di libisma kan du na grontapu, na fu nyan, fu dringi èn fu prisiri nanga a tranga wroko di den e du a heri pisi ten di a tru Gado gi den fu libi na grontapu.

16 Sobun, mi ben de nomonomo fu kon sabi san na koni. Mi ben wani kon si a wroko di sma e du na grontapu, fu di den e wroko so tranga taki den no e sribi srefi na deiten noso na neti. 17 Dan mi luku ala den sani di a tru Gado du. Ne mi si taki libisma no man kon sabi finfini san Gado du na grontapu. Awinsi omeni muiti sma e du fu kon sabi san a du, tòg den no man ferstan den sani dati. Srefi efu den ben o taki dati den koni nofo fu kon sabi san Gado du, tòg den no o man ferstan san a du.

9 Mi go prakseri ala den sani disi. Ne mi si taki den ret’ati sma nanga den konisma èn ala san den e du, de na ini na anu fu a tru Gado. Libisma no sabi o furu lobi nanga bita-ati den sma di ben libi fosi den ben abi. 2 Te fu kba a srefi sani e miti ala sma. A e miti den ret’ati sma nanga den ogrisma. A e miti den bunsma, den sma di e libi wan krin libi èn den sma di no e libi wan krin libi, den sma di e tyari ofrandi èn den sma di no e tyari ofrandi. A srefi sani di e miti bunsma e miti sondari. A srefi sani di e miti a sma di e meki wan sweri e miti a sma di e denki bun fosi a meki wan sweri. 3 Wan tumsi sari sani e psa na grontapu. Fu di a srefi sani e psa nanga ala libisma, meki den e prakseri soso ogri. Den heri libi langa den e prakseri soso lawlaw sani èn te fu kba den e dede!*

4 Gi ala sma di de na libi howpu de, bika wan dagu di de na libi betre moro wan lew di dede. 5 Den libiwan sabi taki den o dede. Ma den dedewan no sabi notnoti èn den no e kisi pai moro tu, bika nowan sma e memre den moro. 6 Den no man sori lobi, bita-ati, nanga dyarusu moro èn den no man du den sani moro di sma e du na grontapu.

7 Go, nyan yu n’nyan nanga prisiri. Dringi yu win nanga wan prisiri ati, bika a tru Gado breiti nanga den sani di yu e du. 8 Ala ten yu musu weri krosi di weti* èn noiti no fergiti fu poti oli na tapu yu ede. 9 Prisiri fu a libi nanga a wefi di yu lobi. Du dati ibri dei fu a syatu libi fu yu di Gado gi yu na grontapu, iya, a libi fu yu di de fu soso. Bika dati na a pai di yu o kisi na ini a libi èn gi a tranga wroko di yu du na grontapu. 10 Ala san yu anu feni fu du, du dati nanga ala yu krakti, bika na ini Grebi,* a presi pe yu o go, nowan sma man wroko, den no man denki, den no abi koni èn den no sabi noti.

11 Mi kon si wan tra sani di e psa na grontapu: A no ala ten den wan di gaw e wini a streilon, a no ala ten den trangawan e wini a feti èn a no ala ten den koniwan abi a n’nyan. A no ala ten sma di koni gudu èn a no ala ten sani e waka bun gi den sma di sabi sani, bika iniwan momenti sani di den no e ferwakti kan miti den alamala. 12 Wan libisma no sabi o ten a o dede. Neleki fisi di kon fasi na ini wan net èn neleki fowru di e go fasi na ini wan krafana, na so libisma kan dede wantronso te ogri miti den.

13 Mi si wan tra eksempre fu koni na ini wan sani di psa na grontapu èn a sani dati naki mi ati. 14 Wan pkin foto ben de èn wan tu man nomo ben de drape fu feti gi a foto. Ne wan makti kownu kon, dan a lontu a foto èn a meki bigi wrokosani fu broko den skotu. 15 Wan pôtiman ben de na ini a foto, ma a ben de wan koniman. Nanga a koni fu en a yepi den sma fu a foto, so taki a kownu no ben man teki a foto abra. Ma bakaten nowan sma ben memre a pôtiman dati. 16 Ne mi taki: „A moro bun fu abi koni, leki fu abi makti. Tòg nowan sma e lespeki wan pôtiman di koni èn den no wani arki san a abi fu taki.”

17 A moro bun fu arki te konisma e taki sani na wan tiri fasi, leki fu arki a b’bari fu wan sma di e tiri donsma.

18 Koni betre moro fetsani, ma wán sondari nomo kan pori furu bun sani.

10 Neleki fa dede freifrei kan pori switismeri oli èn meki a bigin tingi, na so pkinso don kan pori a bun nen fu wan sma di koni èn di sma e lespeki.

2 Na ati fu wan konisma e meki a du san reti,* ma na ati fu wan donsma e meki a du sani di no bun.* 3 Awinsi sortu pasi wan donsma e waka, a no e gebroiki en ferstan.* A e meki ala sma sabi taki a don.

4 Efu wan tiriman ati e bron nanga yu, no waka gwe libi yu presi. Bika efu yu e tan tiri, dan bigi sondu no o du.

5 Mi si wan sari sani e psa na grontapu. A sari sani disi na wan fowtu di tiriman gwenti meki. 6 Donsma e kisi ala sortu hei posisi, ma den sma di abi furu koni* e tan na den lagi posisi.

7 Mi si futuboi e rèi asi, ma mi si granman tu di e waka nanga futu neleki futuboi.

8 A sma di e diki wan olo kan fadon go na ini. Sneki kan beti a sma di e broko psa wan ston skotu.

9 Efu wan sma e koti ston puru na ini bergi, dan den ston kan gi en mankeri. A sma di e priti udu kan kisi mankeri.*

10 Efu wan aksi dede èn a sma di e wroko nanga en no srapu en, dan a o abi fu wroko moro tranga. Ma koni e yepi sma fu abi bun bakapisi.

11 Efu wan sneki beti wan bonuman, fosi a taki wan sani fu basi a sneki, dan na fu soso a sabi fa fu basi sneki.*

12 Den wortu fu wan konisma e meki taki sma lobi en,* ma a tongo fu wan donsma e pori en libi. 13 Te a e bigin taki, dan na soso don sani a e taki èn te a kba taki, dan a taki soso law sani di kan pori en libi. 14 Ma tòg a donsma e tan taki go doro.

Wan libisma no sabi san o psa. Suma kan ferteri en san o psa baka te a dede?

15 A tranga wroko fu a donsma e meki a kon weri. A no sabi srefi fa a musu go na a foto.

16 Na soso rampu o miti wan kondre te a kownu na wan boi ete èn te den granman e nyan den bigi n’nyan fruku m’manten kba! 17 Ma den sma fu a kondre o de koloku te a kownu na a manpkin fu wan heiheisma èn te den granman e nyan na a yoisti ten fu kan kisi krakti, na presi fu dringi sopi teleki den kon drungu!

18 Efu wan sma lesi srefsrefi, dan den postu fu a dak fu en oso o saka èn efu wan sma e fow en anu e du noti, dan dati o meki taki na oso fu en leki.

19 Brede* e meki sma lafu èn win e gi prisiri na ini a libi, ma moni e tapu ala nowtu.

20 No fluku* a kownu na ini yu ati* èn no fluku wan gudusma te yu de na ini yu sribikamra. Noso wan fowru o yere san yu taki, dan a o frei go ferteri san a yere.

11 Trowe yu brede na tapu a watra,* bika baka wan heri pisi ten yu o feni en baka. 2 Gi wan pisi fu san yu abi na seibi sma, noso na aiti sma srefi, bika yu no sabi sortu ogri o psa na grontapu.

3 Efu den wolku furu nanga watra, dan wan hebi alen o fadon kon na grontapu. Efu wan bon fadon go na zuidsei noso na noordsei, dan a o tan d’don na a presi pe a fadon.

4 A sma di e luku a winti, no o sai siri. A sma di e luku den wolku, no o koti n’nyan.

5 Neleki fa yu no sabi fa den bonyo fu wan pkin e gro* na ini en m’ma bere, na so yu no sabi tu fa a tru Gado e du ala den sani fu en.

6 Sai yu siri na m’manten èn no meki yu anu rostu fosi neti tapu, bika yu no sabi pe a siri o gro. A kan de dyaso noso a kan de drape, noso a kan taki a o gro bun na ala tu presi.

7 A leti switi èn a bun te na ai e si son. 8 Efu wan sma libi langa, dan meki a prisiri nanga ibri dei fu en libi. Ma a no musu fergiti taki furu dungru dei kan kon. Ala sani di o psa na fu soso.

9 Yonguman, prisiri nanga den yongu yari fu yu èn meki yu ati firi bun te yu yongu ete. Du san yu ati firi fu du. Go pe yu ai e tyari yu go. Ma sabi taki gi ala den sani disi a tru Gado o aksi yu frantwortu.* 10 No feti baka sani di kan tyari problema kon gi yu. Wai pasi gi ogri di kan miti yu, bika a pisi ten te yu yongu èn te yu tranga ete, na fu soso.

12 Sobun, memre yu Bigi Mekiman na ini yu yongu yari, fosi den dei kon di lai nanga sari, noso fosi den yari doro pe yu o taki: „Mi no e prisiri nanga a libi.” 2 Memre en, fosi a leti fu a son, a mun, nanga den stari kon dungru èn fosi den dungru wolku kon, baka te hebi alen fadon.* 3 Memre en, fosi a ten doro taki den waktiman fu na oso e beifi èn taki den tranga man kon swaki èn den kon beni. Memre en, fosi den uma di e mara sani tapu fu wroko fu di den no furu moro èn fosi den uma di de na den fensre e luku go na dorosei feni taki a dungru. 4 Memre en, fosi den doro di de na stratisei tapu èn fosi a b’bari fu a miriston kon swaki. Memre en, fosi a ten doro taki yu e opo te yu yere wan fowru e froiti èn te ala umapkin e singi nanga wan safri sten. 5 Memre en tu fosi yu kon frede gi sani di hei èn fosi yu kon frede gi ogri di kan miti yu na strati. Na amandrabon abi bromki èn a sprenka e waka nanga bun furu muiti. Noti no e tesi switi* moro. Bika libisma e waka go na den oso pe den o tan wan langa ten èn sma e waka na strati e sari. 6 Memre Gado, fosi den puru a solfru t’tei, fosi den naki a gowtu komki broko pispisi, fosi den broko a watrakan di de na a watra-olo èn fosi den naki a sani broko di e hari a watra na ini a watrabaki kon na loktu. 7 Dan libisma di meki fu doti o drai go baka na a doti èn a libikrakti o drai go baka na a tru Gado di ben gi en na libisma.

8 „Na fu soso!”, na so a leriman taki. „Iya, ala sani na fu soso.”

9 Boiti taki a leriman ben kon koni, a ben e tan leri a pipel san a sabi. A ben e prakseri dipi fu sani èn a ben e ondrosuku sani finfini, so taki a ben kan skrifi furu odo poti tapu papira. 10 A leriman ben e suku fu feni switi wortu èn fu skrifi soifri san tru.

11 Den sani di konisma e taki de leki srapu tiki di sma e gebroiki fu dyuku kaw meki den waka. Den wortu di den tyari kon na wán de leki spikri di naki go na ini udu. Den odo disi kmoto fu wán skapuman nomo. 12 Mi boi, boiti ala den sani disi, mi e warskow yu: Noiti sma o kba skrifi furu buku èn te yu e poti tumsi furu prakseri na den, dan dati e weri yu skin.

13 Now di mi taki ala sani kba, a moro prenspari sani na disi: Lespeki a tru Gado èn hori den wet fu en, fu di dati na san libisma musu du. 14 Bika a tru Gado o krutu ala sani di sma e du èn a o krutu ibri sani tu di sma no man si, awinsi na wan bun sani noso wan takru sani.