SARI SINGI
א [Alef]*
1 Nowan sma no de moro na ini a foto di ben lai nanga sma fosi!
A foto di ben lai nanga sma kon de leki wan uma di masra dede kba!
Fosi, a ben de wan uma di ala tra pipel* ben e lespeki, ma now a kon de wan srafu!
ב [Bet]
2 Te neti a e bari krei èn watra-ai e lon na en fesi.
Nowan fu den sma di ben hori nanga en de fu trowstu en.
Ala den mati fu en bedrigi en. Den tron feanti fu en.
ג [Gimel]
3 Sma tyari Yuda gwe leki strafman, a e pina èn a musu wroko tranga leki wan srafu.
A musu tan na mindri trakondre sma. A no feni nowan presi fu rostu.
Ala den feanti di ben de na en baka grabu en di a ben de na ini bigi problema.
ד [Dalet]
4 Den pasi fu Sion e sari fu di nowan sma e kon na den fesa moro.
Ala den portu fu a foto broko. Den priester e soktu.
Den yongu uma* e sari srefsrefi èn Sion e firi brokosaka.
ה [He]
5 Den feanti fu en tron en basi* now. Den no e broko den ede nanga noti.
Na Yehovah meki taki a e sari fu di a du furu ogri.
Feanti tyari den pkin fu Sion gwe leki strafman.
ו [Waw]
6 Na umapkin fu Sion lasi ala en glori.
Den granman fu en de leki dia di no feni weigron fu nyan grasi.
Den e waka fu di den no abi krakti moro fu lon gi den feanti fu den di de na den baka.
ז [Sayin]
7 Na a ten di Yerusalem ben e pina èn di a no ben abi wan presi fu tan,
a memre ala den moi sani di a ben abi sensi owruten.
A pipel fu en fadon na ini na anu fu den feanti èn nowan sma ben de fu yepi den.
Di den feanti si san psa nanga en, den lafu en* fu di a fadon.
ח [Het]
8 Yerusalem du wan bigi sondu.
Dati meki a kon de wan fisti sani.
Ala den sma di ben e gi en glori fosi, kon si en leki wan bunkopu sani fu di den si en nanga sososkin.
En srefi e soktu èn a drai en fesi fu di a e syen.
ט [Tet]
9 Den koto fu en doti.
A no ben prakseri a tamara fu en.
Ala sma skreki di a fadon. Nowan sma no de fu trowstu en.
Tye Yehovah, luku fa mi e pina. Den feanti fu mi kon kisi heimemre.
י [Yod]
10 Den feanti teki ala den gudu fu Yerusalem tyari gwe.
Yerusalem si fa den trakondre sma kon na ini a santa presi fu en,
aladi yu ben taki dati den sma disi no musu kon makandra nanga a pipel fu yu.
כ [Kaf]
11 Ala den sma fu Yerusalem e soktu. Den e suku brede fu nyan.
Den seri den gudu fu den fu kan bai wan sani fu nyan, soso fu kan tan na libi.*
Tye Yehovah, luku san e psa. Mi kon de leki wan uma di no warti noti.*
ל [Lamed]
12 Unu di e waka psa, un no e broko un ede nanga mi?
Un luku, dan unu srefi o si!
Wan pen kan de di hebi moro a pen di mi e firi fu a strafu di mi kisi?
Na Yehovah meki mi pina fu di en ati e bron srefsrefi nanga mi.
מ [Mem]
13 A seni faya kmoto fu hemel fu bron ibriwan fu den bonyo na ini mi skin.
A bradi wan net fu meki mi futu fasi na ini. Mi no ben abi nowan tra fasi leki fu drai gwe baka.
A meki mi tron wan uma di no abi nowan sma.
Heri dei mi e firi siki.
נ [Nun]
14 Den sondu fu mi tai na mi neki leki wan tyatyari. Na en tai den nanga en eigi anu.
Den sondu tai na mi neki èn mi no abi nowan krakti moro.
Yehovah gi mi abra na sma di tranga moro mi. Mi no man opo feti nanga den.
ס [Samek]
15 Yehovah puru ala den tranga fetman fu mi na mi anu, dan a trowe den go na wan sei.
A kari sma kon makandra fu feti nanga mi, so taki den kan broko den yonguman fu mi pispisi.
Yehovah masi den yongu uma* fu Yuda nanga en futu, neleki fa sma e masi droifi.
ע [Ayin]
16 Na den sani disi e meki mi krei. Mi ai e lon watra.
Nowan sma no de fu trowstu mi èn nowan sma no de fu gi mi dek’ati.
Den manpkin fu mi no abi howpu fu di a feanti wini wi.
פ [Pe]
17 Sion langa en anu suku yepi, ma nowan sma no de fu trowstu en.
Yehovah taigi ala den feanti di e tnapu lontu Yakob fu go feti nanga en.
Yerusalem kon tron wan fisti sani gi den.
צ [Tsade]
18 Yehovah ben abi leti fu strafu mi fu di mi trangayesi den wet* fu en.
Un arki èn luku fa mi e sari.
Sma teki den yongu uma* nanga den yonguman fu mi tyari gwe leki strafman.
ק [Kof]
19 Mi kari den sma di ben hori nanga mi, ma den kori mi.
Den priester fu mi nanga den owru man fu a foto dede
di den ben e suku wan sani fu nyan fu kan tan na libi.*
ר [Resj]
20 Tye Yehovah, luku, mi de na ini bigi nowtu.
Mi bere* e drai.
Mi ati broko, bika mi no ben arki yu srefsrefi.
Na dorosei, sma e kiri den pkin fu mi nanga fet’owru, ma na ini den oso sma e dede tu.
ש [Syin]
21 Sma yere fa mi e geme. Nowan sma no de fu trowstu mi.
Ala den feanti fu mi yere sortu ogri miti mi.
Den breiti srefsrefi fu di na yu du disi nanga mi.
Ma wan dei o kon, taki yu o du san yu ben pramisi fu du nanga den. Na a dei dati den o kon de leki mi.
ת [Taw]
22 Poti prakseri na ala den ogri di den du èn strafu den hebi,
neleki fa yu strafu mi gi ala den sondu fu mi.
Mi e geme furu èn mi ati siki.
א [Alef]
2 Yehovah tapu Sion nanga wan blaka wolku, fu di en ati e bron nanga en!
A trowe a glori fu Israel kmoto fu hemel kon na grontapu.
Na a dei fu en atibron a no prakseri a futubangi fu en.
ב [Bet]
2 Yehovah swari ala den tanpresi fu Yakob. A no sari nowan fu den.
Fu di Gado ati bron, meki a broko den fortresi* fu Yuda puru.
A trowe a kownukondre nanga den granman fu en na gron èn a meki den lasi a santafasi fu den.
ג [Gimel]
3 Nanga bigi atibron a broko ala a makti* fu Israel.
A no yepi Israel di en feanti kon feti nanga en.
A rigeri na ini Yakob leki wan faya di e bron ala sani na en lontu.
ד [Dalet]
4 A boigi* a bo fu en leki wan feanti. A sreka en ret’anu fu feti nanga den neleki wan feanti.
A tan kiri ala den lobiwan fu wi.
Neleki wan faya a puru atibron na tapu a tenti fu Sion.
ה [He]
5 Yehovah kon de leki wan feanti.
A swari Israel.
A swari ala den toren fu en.
A broko den fortresi* fu en te na gron.
A meki soso geme nanga krei de fu yere na ini Yuda.
ו [Waw]
6 Neleki fa sma e broko wan kampu puru na ini wan dyari, na so a broko en eigi kampu puru.
A tyari wan kba kon na* den fesa fu en.
Yehovah meki taki den sma na Sion fergiti san na fesa èn san na Sabat-dei.
Nanga bigi atibron a drai baka gi den kownu nanga den priester.
ז [Sayin]
7 Yehovah no wani sabi noti moro fu na altari fu en.
A e fisti gi a santa presi fu en.
A gi den feanti pasi fu broko den skotu fu den fortresi* fu a foto.
Den ben e bari bun tranga na ini na oso fu Yehovah, neleki fa sma e bari na wan fesadei.
ח [Het]
8 Yehovah ben de nomonomo fu broko a skotu fu Sion puru.
A marki en nanga wan t’tei.
A no meki noti tapu en fu pori* a foto.
A meki taki a dan nanga a skotu e sari.
Den ala tu broko fadon.
ט [Tet]
9 Den portu fu en sungu gwe na ini a gron.
A broko den balk fu a portu pispisi.
A kownu nanga den granman fu en e libi na mindri den trakondre sma.
Nowan wet* no de. Srefi den profeiti fu a foto no e kisi fisyun fu Yehovah moro.
י [Yod]
10 Den owru man fu Sion e sdon na gron. Den no e taki noti.
Den e trowe santi na tapu den ede èn den weri rowkrosi.*
Den yongu uma* fu Yerusalem saka den ede go te na gron.
כ [Kaf]
11 Mi krei so furu, taki mi ai kon weri.
Mi bere* e drai.
Mi ati e brudu* fu di na umapkin fu mi pipel* fadon,
iya, fu di pkin-nengre nanga beibi e fadon flaw na den pren* fu a foto.
ל [Lamed]
12 Den pkin e tan taigi den m’ma: „Angri e kiri mi, watra e kiri mi.”*
Na disi den e taki aladi den e fadon flaw.
Den de leki sma di trawan gi mankeri nanga wan fet’owru na den pren.
Iya, den pkin e taki disi aladi den e dede gwe na ini na anu fu den m’ma.
מ [Mem]
13 Sortu sani mi kan sori yu leki eksempre?
Yerusalem, nanga san mi o agersi yu?
Sion, nanga sortu sani mi o teki yu gersi, so taki mi kan trowstu yu?
A mankeri di yu kisi bigi leki a se. Suma kan meki yu kon betre baka?
נ [Nun]
14 Den fisyun di den profeiti fu yu ben si no ben tru, den ben de soso lei.
Efu den ben sori yu san na den fowtu fu yu, dan sma no ben o tyari yu gwe leki strafman.
Ma den tan ferteri yu fisyun di no ben tru. Den tan taki sani fu kori yu.
ס [Samek]
15 Ala den sma di e waka psa na tapu a pasi e wiswasi yu èn den e naki anu te den si san psa nanga yu.
Den e froiti èn den e seki den ede te den yere san psa nanga Yerusalem. Den e taki:
„Na a foto disi sma ben e kari a moro moi foto di de? Na fu a foto disi den ben e taki dati heri grontapu breiti nanga en?”
פ [Pe]
16 Ala den feanti fu yu opo den mofo fu taigi yu wan sani.
Den e spotu yu èn nanga atibron den e taki: „Wi swari en.
Na a dei disi wi ben e wakti. A dei doro! Wisrefi si en!”
ע [Ayin]
17 Yehovah du san a ben abi na prakseri. A du san a ben taki.
A du san a ben taki sensi owruten.
A broko a foto puru èn a no ben sari en.
A meki den feanti prisiri fu di den wini yu. A meki den feanti fu yu kisi krakti.*
צ [Tsade]
18 Arki, skotu fu Sion, a pipel e bari kari Yehovah na ini den ati.
Meki watra-ai fadon na gron dei nanga neti.
Tan krei. Meki watra tan lon na yu ai.*
ק [Kof]
19 Opo! Ibri neti yu musu bari krei teleki musdei m’manten.
Nanga watra-ai yu musu taigi Yehovah ala san de na tapu yu ati.
Opo yu anu go na loktu fu begi en meki a kibri a libi fu den pkin fu yu
di e fadon flaw na tapu den uku fu ala strati* fu di angri e kiri den.
ר [Resj]
20 Tye Yehovah, luku san e psa. Mi e begi yu, poti prakseri na den sma di yu strafu so hebi.
Na nyan den uma musu tan nyan den eigi pkin,* iya, den pkin di densrefi kweki?
Na kiri sma musu kiri den priester nanga den profeiti na ini a santa presi fu Yehovah?
ש [Syin]
21 Yongu boi nanga granp’pa e d’don dededede na den strati.
Sma kiri den yonguman nanga den yongu uma* fu mi.
Yu kiri den na a dei di yu ati bron nanga den. Iya, yu kiri den èn yu no sari nowan sma.
ת [Taw]
22 Yu meki feanti kmoto na ala sei leki na wan fesa den e kon.
Na a dei fu Yehovah en atibron nowan sma ben man lowe èn nowan sma tan na libi.
Mi feanti kiri den pkin* di mi meki èn di misrefi kweki.
א [Alef]
3 Mi na wan man di si soso pina, fu di Gado ati ben bron srefsrefi èn a strafu wi.
2 A yagi mi èn a meki mi waka na ini dungru. A no meki mi waka na ini a leti.
3 Iya, heri dei a e gens mi.
ב [Bet]
4 A meki taki a meti nanga a buba fu mi skin pori gwe.
A broko den bonyo fu mi.
5 A bow wan skotu lontu mi. Iya, a meki soso w’wiri di abi vergif gro na mi lontu èn a meki wan lo problema miti mi.
6 Nanga tranga a meki mi sdon na dungru presi, neleki wan man di dede langa ten kba.
ג [Gimel]
7 A meki wan skotu lontu mi, so taki mi no man lowe.
A tai mi anu nanga mi futu nanga hebi kopro bui.
8 Èn te mi e bari kari en fu yepi mi a no wani arki* den begi fu mi.
9 Nanga ston di koti puru na ini bergi a tapu pasi gi mi.
A meki den pasi fu mi kon lai boktu.
ד [Dalet]
10 Leki wan beer di e suku fu nyan wan meti, iya, leki wan lew di e luru na wan kibripresi, na so Gado e seti luru gi mi.
12 A beni* a bo fu en èn a poti mi tnapu fu sutu en peiri na mi tapu.
ה [He]
13 A sutu den niri fu mi nanga den peiri* di ben de na ini en peirikokro.
14 Ala sma e teki mi leki spotpopki now. Heri dei den e singi wan lo sani fu spotu mi.
15 A gi mi soso bita sani fu nyan. A meki mi dringi furu bita fu wan bitabon.
ו [Waw]
16 A e meki mi kaw pkin ston broko mi tifi.
A pusu mi go na ini asisi.
17 Yu meki taki mi no abi rostu moro. Mi kon fergiti san a wani taki fu de nanga prisiri.*
18 Mi taki: „Mi lasi a glori fu mi. Mi no abi howpu moro taki Yehovah o du wan sani.”
ז [Sayin]
19 Memre fa mi e pina èn fa mi no abi wan presi fu tan. Iya, memre fa mi e dringi a bita fu bitabon èn fa mi e nyan w’wiri di abi vergif.
20 Mi de seiker taki yu o memre mi èn taki yu o saka* kon na mi fu yepi mi.
21 Na den sani disi mi e tan prakseri. Dati meki mi o wakti yu.
ח [Het]
23 Ibri m’manten baka a e sori sar’ati. Ala ten yu kan fertrow na en tapu.
24 Mi taki: „Yehovah na a gudu di mi musu kisi. Dati meki mi o wakti en.”
ט [Tet]
25 Yehovah e du bun gi a sma di e wakti en. Iya, a e du bun gi a sma di e suku en ala ten.
26 A bun te wan sma e wakti nanga pasensi teleki Yehovah ferlusu en.
27 A bun te wan sma e nyan pina ini en yongu yari.
י [Yod]
28 Meki a sdon en w’wan èn meki a tan pî te Gado e poti a hebi disi na en tapu.
29 Meki a sutu en mofo go na ini a doti. Kande howpu de ete gi en.
30 Meki a poti en fesi gi a sma di e naki en. Meki a kisi so furu syen leki san a man tyari.
כ [Kaf]
31 Bika Yehovah no o drai en baka gi wi fu ala ten.
32 Aladi a meki den firi sari, tòg a o abi sar’ati nanga den fu di a de wan Gado di lobi sori sma bun-ati.*
33 A no lobi pina libisma èn a no lobi meki den firi sari.
ל [Lamed]
34 Iya, Gado no lobi te sma e pina den wan na grontapu di de strafman.
35 A Moro Heiwan no lobi te sma no e gi trawan a leti di den musu kisi.
36 Yehovah no lobi en srefsrefi te sma no e krutu a tori fu wan tra sma na wan reti fasi.
מ [Mem]
37 Suma kan taki dati wan sani musu psa, efu Yehovah srefi no taki dati a musu psa?
38 A mofo fu a Moro Heiwan no e moksi bun nanga ogri.
39 Fu san ede wan sma musu krutukrutu fu den bakapisi fu den sondu fu en?
נ [Nun]
40 Meki wi ondrosuku san wi du, iya, meki wi luku finfini san wi du. Meki wi drai go baka na Yehovah.
41 Meki wi opo wi anu go na loktu fu begi Gado na hemel nanga wan krin ati. Meki wi taki:
42 „Wi sondu èn wi ben trangayesi yu. Yu no gi wi pardon.
ס [Samek]
43 Nanga atibron yu tapu wi fu kon na yu.
Yu hari kon na wi baka èn yu kiri wi sondro fu sari wi.
44 Nanga wan bigi wolku yu tapu pasi gi wi fu taki nanga yu. Na so den begi fu wi no man doro yu.
45 Yu meki taki den trakondre sma e si wi leki wan fisti sani, iya, leki wan ipi doti.”
פ [Pe]
46 Ala den feanti fu wi opo den mofo fu taki ogri fu wi.
47 Ala ten wi e frede èn a de leki wi de na ini wan dipi olo. Wi kon de wi w’wan èn wi brokosaka.
48 Mi ai e lon watra neleki wan liba fu di mi pipel* brokosaka.
ע [Ayin]
51 A e hati mi te mi e si san e psa nanga den pkin dorpu di de krosbei fu a foto fu mi.
צ [Tsade]
52 Sondro taki mi du den wan sani, den feanti fu mi onti mi neleki fa sma e onti wan fowru.
53 Den trowe mi go na ini a peti fu kiri mi. Den tan trowe ston na mi tapu.
54 Watra ben e sungu mi. Ne mi taki: „Mi o dede!”
ק [Kof]
55 Tye Yehovah, mi bari kari yu nen kmoto fu a dipi peti.
56 Yere mi sten. No tapu yu yesi, ma arki te mi e kari yu fu yepi mi, iya, fu ferlusu mi.
57 A dei di mi ben e bari kari yu, yu kon krosbei. Yu taki: „No frede.”
ר [Resj]
58 Yehovah, yu opo taki gi mi.* Yu kibri mi libi.
59 Yehovah, yu si den ogri di sma du nanga mi. Mi e begi yu, meki mi kisi mi leti.
60 Yu si fa den puru atibron na mi tapu, iya, yu si fa den seti sani fu du mi ogri.
ש [Sin noso Syin]
61 Yehovah, yu yere fa den spotu mi, iya, yu si fa den seti sani fu du mi ogri.
62 Yu yere sortu ogri den taki fu mi. Yu yere fa den e syusyu e taki takru sani fu mi heri dei.
63 Luku den! Awinsi den e sdon noso den e tnapu, den e spotu mi na ini den singi fu den.
ת [Taw]
64 Yehovah, yu o pai den baka fu den sani di den e du.
65 Yu o meki den ati kon tranga. Na so yu o fluku den.
66 Yehovah, nanga atibron yu o hari go na den baka èn yu o kiri den alamala puru na grontapu.
א [Alef]
4 A gowtu di ben e brenki, iya, a soifri gowtu, kon dòf!
Den ston fu a santa presi e d’don na den uku fu ala strati!*
ב [Bet]
2 Fosi, den manpkin fu Sion ben kisi furu grani,
iya, den ben warti leki soifri gowtu.
Now den abi a srefi waarde leki den prapi di wan sma meki fu klei!
ג [Gimel]
3 Srefi den sabanadagu e gi den pkin fu den bobimerki fu dringi.
Ma den umapkin fu mi pipel kon kisi takr’ati neleki den stroisifowru na ini a sabana.
ד [Dalet]
4 A tongo fu den beibi tan fasi na a tapsei fu den inmofo fu di watra e kiri den.
Den pkin e begi sma fu gi den brede fu nyan, ma nowan sma e gi den.
ה [He]
5 Den sma di ben gwenti nyan switi n’nyan e d’don na tapu den strati nanga angribere.
Den sma di ben gwenti weri diri redi krosi sensi di den ben yongu e d’don now na tapu asisi-ipi.
ו [Waw]
6 A strafu* di mi pipel* kisi, hebi moro a strafu di den sma fu Sodom ben kisi fu den sondu fu den.
Gado ben drai a foto disi tapu wantronso èn nowan sma ben man yepi den.
ז [Sayin]
7 Den Nasireisma fu Sion ben krin èn den ben weti moro merki.
Den skin ben redi moro koraal-ston.* Den ben e brenki leki safir-ston.
ח [Het]
8 Now den kon blaka leki krofaya.
Te den e waka na strati nowan sma sabi taki na den.
A buba fu den skin e anga na den bonyo. A kon drei leki wan bon.
ט [Tet]
9 Den sma di trawan kiri nanga fet’owru, betre moro den sma di dede fu angri.
Den e dede gwe fu di den gron fu den no e gi n’nyan. A gersi leki sma boro den nanga wan fet’owru.
י [Yod]
10 Den uma di ben gwenti abi sar’ati nanga sma, bori den eigi pkin.
Na a ten di mi pipel ben de na ini bigi nowtu, den pkin disi kon de leki n’nyan di sma e nyan te den e row.
כ [Kaf]
11 Yehovah kisi bigi atibron.
Iya, a puru atibron tapu Sion.
A leti wan bigi faya di e bron den fundament fu a foto.
ל [Lamed]
12 Nowan fu den kownu fu grontapu nanga den sma di ben e libi na grontapu ben e bribi
taki gensman nanga feanti ben o psa kon na ini den portu fu Yerusalem.
מ [Mem]
13 A sani disi psa fu di den profeiti fu Yerusalem sondu èn fu di den priester du ogri.
Iya, den kiri ret’ati sma na ini a foto.
נ [Nun]
14 Den profeiti nanga den priester wakawaka lontu na strati leki breniman.
Den kon doti nanga brudu.
Dati meki nowan sma kan fasi den krosi fu den.
ס [Samek]
15 „Un gwe fu dya! Unu no krin!”, na so den sma e bari gi den. „Un gwe fu dya! Un gwe fu dya! No fasi wi!”
Den sma e taki disi fu di den profeiti nanga den priester no abi wan presi moro fu tan èn den e wakawaka lontu nomo.
Den trakondre sma e taki: „Den no kan tan dyaso nanga wi.
פ [Pe]
16 Yehovah srefi meki den panya go na ala sei.
A no o luku den moro nanga wan ai.
Sma no o lespeki den priester èn den no o du bun gi den owrusma.”
ע [Ayin]
17 Teleki now wi ai weri, bika na fu soso wi ben e wakti wan sma fu yepi wi.
Wi luku lontu efu yepi ben o kon, ma a kondre di wi ben ferwakti fu yepi wi no ben man ferlusu wi.
צ [Tsade]
18 Awinsi pe wi ben e go, den feanti fu wi ben de na wi baka. Wi no ben man waka na strati srefi.
A ten doro taki wi o dede. A yuru fu wi doro kba, bika wi o dede.
ק [Kof]
19 Den sma di hari kon na wi baka ben gaw moro aka di e frei na loktu.
Na tapu den bergi den hari kon na wi baka. Na ini a sabana den seti luru gi wi.
ר [Resj]
20 A salfuwan fu Yehovah, iya, a wan di de leki a bro di e kmoto na ini wi noso-olo, fadon go na ini wan bigi olo.
Na fu a sma disi wi ben taki: „Wi o tan na ini a skaduw fu en na mindri den trakondre sma.”
ש [Sin]
21 Umapkin fu Edom, yu di e tan na ini a kondre Us, yu kan prisiri èn breiti srefsrefi.
Ma yu srefi o kisi a kan fu dringi. Yu o kon drungu èn yu o de nanga sososkin.
ת [Taw]
22 Umapkin fu Sion, yu no o kisi strafu moro gi a sondu fu yu.
Gado no o meki sma tyari yu gwe baka leki strafman.
Umapkin fu Edom, a o poti prakseri na den sondu fu yu.
A o tyari den sondu fu yu kon na krin.
5 Tye Yehovah, memre san psa nanga wi.
Luku fa wi kisi syen.
2 Trakondre sma teki a kondre di ben de fu wi. Sma fu tra kondre teki den oso fu wi.
3 Wi kon de leki pkin di no abi p’pa moro. Den m’ma fu wi kon de leki uma di masra dede kba.
4 Wi musu pai moni fu kan dringi wi eigi watra èn wi musu pai gi wi eigi udu.
5 Den feanti di e hari kon na wi baka de so krosbei fu wi.
Wi kon weri. Wi no kisi okasi srefi fu teki bro.
6 Wi go suku yepi na Egepte èn na Asiria, so taki wi ben kan feni wan sani fu nyan.
7 Den afo fu wi di ben sondu no de moro, ma na wi abi fu tyari den sondu fu den.
8 Na futuboi e tiri wi now. Nowan sma de fu puru wi na den anu.
9 Wi e go suku n’nyan aladi wi sabi taki wi kan lasi wi libi. Sma de na ini a sabana di kan kiri wi nanga fet’owru.
10 Angri e kiri wi so te taki wi kisi korsu. Dati meki wi buba kon faya neleki wan onfu.
11 Sma meki den wefi na Sion nanga den yongu uma* na den foto fu Yuda kisi syen.*
12 Den anga den granman na wán anu èn den no lespeki den owru man.
13 Den yonguman abi fu syow anumiri èn den boi di e syow hebi udu e suku fu fadon.
14 Den owru man no e sdon na a portu fu a foto moro. Den yonguman no e prei poku moro.
15 Wi ati no e prisiri moro. Fosi, wi ben e dansi meki prisiri, ma now na soso sari wi e sari.
16 A kroon fu wi fadon kmoto na wi ede. Bigi ogri miti wi fu di wi sondu!
17 Dati meki wi ati kon siki.
Iya, na fu den sani disi ede wi ai kon dungru.
18 Fu di sma gwe libi a bergi fu Sion, meki a kon tron wan brokopresi. Now sabanadagu e waka lontu drape.
19 Ma Yehovah, fu têgo yu o tan sdon na tapu yu kownusturu.
Yu kownusturu o tan fu ala ten.
20 Fu san ede yu fergiti wi fu ala ten? Fu san ede yu gwe libi wi so langa?
21 Yehovah, tyari wi kon baka na yu, dan wi o kon baka wantewante.
Meki ala sani kon de leki fa a ben de fosi.
22 Ma wi sabi taki yu drai yu baka gi wi.
Yu ati e bron srefsrefi nanga wi.
Kapitel 1-4 na sari singi pe ibri vers e bigin nanga wan letter fu a Hebrew alfabet.
Noso: „kontren”.
Hebrewtongo: „uma di no sribi nanga wan man ete”.
Hebrewtongo: „ede”.
Noso: „den ben breiti”.
Noso: „fu kisi krakti baka”.
Disi abi fu du nanga Yerusalem.
Hebrewtongo: „uma di no sribi nanga wan man ete”.
Hebrewtongo: „a mofo”.
Hebrewtongo: „uma di no sribi nanga wan man ete”.
Noso: „fu kisi krakti baka”.
Hebrewtongo: „inbere”.
Luku Wortubuku.
Hebrewtongo: „ibri tutu”.
Hebrewtongo: „trapu”.
Luku Wortubuku.
Noso: „A pori”.
Luku Wortubuku.
Hebrewtongo: „swari”.
Noso: „rai”.
Luku Wortubuku.
Hebrewtongo: „uma di no sribi nanga wan man ete”.
Hebrewtongo: „inbere”.
Hebrewtongo: „Mi lever trowe na gron”.
„Na umapkin fu mi pipel” ben de wan fasi fu taki. Disi ben e sori taki a skrifiman ben e sari gi a foto.
Luku Wortubuku.
Hebrewtongo: „Pe na aleisi nanga a win de?”
Noso: „A opo a tutu fu den feanti fu yu”.
Hebrewtongo: „den umapkin fu yu ai”.
Hebrewtongo: „den ede fu ala den strati”.
Noso: „pkin di kmoto na ini den bere”.
Hebrewtongo: „uma di no sribi nanga wan man ete”.
Noso: „den gosontu pkin”.
Noso: „a e tapu”.
Noso kande: „a meki mi d’don plata na gron”.
Hebrewtongo: „trapu”.
Hebrewtongo: „den manpkin”.
Hebrewtongo: „san na bun”.
Noso: „beni”.
Hebrew wortu: kesed. Luku Wortubuku.
Hebrew wortu: kesed. Luku Wortubuku.
Hebrewtongo: „na umapkin fu mi pipel”.
Noso: „opo taki gi mi na fesi krutu”.
Hebrewtongo: „den ede fu ala den strati”.
Hebrewtongo: „sondu”.
Hebrewtongo: „umapkin fu mi pipel”.
Luku Wortubuku.
Hebrewtongo: „uma di no sribi nanga wan man ete”.
Noso: „Nanga tranga sma abi seks nanga den frow fu Sion èn nanga den yongu uma na den foto fu Yuda”.