YONA

1 Yehovah taigi Yona,* a manpkin fu Amitai: 2 „Opo go na a bigi foto Ninefei èn taigi den sma drape taki mi o strafu den fu di mi si ala den ogri di den e du.”

3 Ma Yona ben wani lowe go na Tarsis fu kibri gi Yehovah. Di a doro na Yope, a si wan sipi di ben o go na Tarsis. A pai fu go na Tarsis, dan a go nanga den tra sma na ini a sipi. Na so a ben wani lowe gi Yehovah.

4 Ne Yehovah meki wan bigi winti wai tapu a se. Den skwala ben bigi so te, taki a sipi ben de fu sungu. 5 Den botoman ben e frede so te, taki ibriwan fu den bigin bari suku yepi na a gado fu en. Ne den bigin trowe den lai fu a sipi go na ini a se fu meki a sipi kon moro lekti. Ma Yona ben e d’don na ondrosei fu a sipi. A ben e sribi dipi. 6 Ne a kapten fu a sipi go na en, dan a taki: „Fa yu kan sribi now? Opo! Begi a gado fu yu! Kande a tru Gado o sari wi èn wi no o dede.”

7 Ne den taigi makandra: „Kow iti lot fu sabi suma meki a bigi ogri disi miti wi.” Di den du dati, dan a lot sori go na Yona. 8 Ne den taigi en: „Taigi wi, suma meki a rampu disi miti wi? Sortu wroko yu e du? Pe yu kmoto? Fu sortu kondre yu de? Fu sortu pipel yu de?”

9 A taigi den: „Mi na wan Hebrew man. Mi e anbegi* Yehovah, a Gado fu hemel, a sma di meki a se nanga a drei gron.”

10 Den man bigin frede srefsrefi fu di Yona ben ferteri den taki a ben e lowe gi Yehovah. Dan den aksi en: „Fu san ede yu du a sani disi?” 11 A ten dati den skwala ben kon moro bigi. Dati meki den man aksi Yona: „San wi musu du nanga yu fu meki a se kon tiri baka?” 12 A taigi den: „Opo mi trowe go na ini a se, dan a se o kon tiri baka. Bika mi sabi taki na fu mi ede a bigi rampu disi e miti unu.” 13 Tòg den man ben e meki muiti fu tyari a sipi go na syoro.* Ma den no ben man du dati fu di a se ben e rigeri moro nanga moro.

14 Ne den bari kari Yehovah. Den taki: „Yehovah, na yu e meki ala den sani disi psa. Ma wi e begi yu, no meki wi dede fu a man disi ede! No meki wi kisi brudu-paiman, Yehovah!” 15 Baka dati den opo Yona èn den trowe en go na ini a se. Na so a se kon tiri baka. 16 Ne den man kisi bigi lespeki gi Yehovah. Dati meki den tyari wan srakti-ofrandi gi Yehovah èn den pramisi en fu dini en.

17 Dan Yehovah seni wan bun bigi fisi fu swari Yona. Na so Yona tan dri dei nanga dri neti na ini a bere fu a fisi.

2 Na ini a fisibere, Yona begi Yehovah en Gado. 2 A taki:

„Mi ben de na ini bigi nowtu di mi bari kari Yehovah. Ne a piki mi.

Mi ben de na ini a bere fu Grebi* di mi bari fu kisi yepi.

Ne yu yere mi sten.

Ala den bigi skwala fu yu ben wasi kon na mi tapu.

 4 Mi taki: ’Yu yagi mi kmoto na yu fesi!

Fa mi o si yu santa tempel baka?’

Den w’wiri di e gro na ini a se ben de lontu mi ede.

 6 Mi ben saka go te na ondrosei fu den bergi.

Grontapu ben tapu den portu fu en gi mi fu ala ten.

Ma dan yu, Yehovah mi Gado, puru mi libilibi na ini a dipi presi dati.*

 7 Di mi ben firi taki mi ben o dede, na yu mi ben e denki Yehovah.

Dan yu yere a begi fu mi na ini yu santa tempel.

 8 Den sma di e anbegi falsi gado, gwe libi a Gado di sori trutru lobi* gi den.*

 9 Ma mi o taki yu tangi èn mi o tyari srakti-ofrandi gi yu.

San mi pramisi, na dati mi o du.

Na Yehovah w’wan e tyari ferlusu kon.”

10 Bakaten Yehovah meki a fisi spiti Yona puru na sesyoro.

3 Dan Yehovah taki nanga Yona ete wan leisi. A taki: 2 „Opo go na a bigi foto Ninefei èn ferteri den sma san mi taigi yu.”

3 Ne Yona opo go na Ninefei, soleki fa Yehovah taki. Ninefei ben de wan foto di bigi srefsrefi.* A ben bigi so te, taki wan sma ben abi fu waka dri dei fu man doro na a tra sei fu a foto. 4 Sobun, Yona waka go na ini a foto. A waka wan heri dei èn a ben e taigi sma: „Ete 40 dei, dan Ninefei o kisi pori.”

10 Ne a tru Gado si san den du. A si taki den tapu nanga den ogri di den ben e du. A ben taki dati a ben o figi den puru, ma dan a kenki prakseri* èn a no du dati moro.

4 Ma Yona no ben lobi a sani disi srefsrefi. Dati meki a kisi wan bigi atibron. 2 A begi Yehovah: „Yehovah, di mi ben de na ini mi kondre, mi ben sabi kba taki a sani disi ben o psa. Dati meki mi ben wani lowe go na Tarsis. Mi ben sabi taki yu na wan Gado di e firi gi sma* èn yu abi sar’ati. Yu ati no e bron esi, yu abi bigi lobi* èn yu no lobi tyari rampu kon na tapu libisma. 3 Yehovah, mi e begi yu, meki mi dede, bika a moro bun fu dede leki fu tan na libi.”

4 Dan Yehovah aksi en: „Yu denki taki yu abi leti fu atibron so?”

5 Ne Yona kmoto na ini a foto. Di a ben de na owstusei fu a foto, a saka sdon. A meki wan kampu fu man feni pkinso kowru, dan a go sdon fu si san ben o psa nanga a foto. 6 Ne Yehovah Gado meki wan krabasibon* gro fu meki Yona firi moro bun. Na so Yona ben kan kisi pkinso kowru. Yona ben breiti srefsrefi nanga a krabasibon.

7 Ma a tamara fu en, di dei broko, a tru Gado meki wan woron nyan a krabasibon. Te fu kba a bon kon drei. 8 Di a son bigin skèin Gado meki wan faya winti fu owstusei wai. A faya son ben e skèin na tapu Yona ede èn a ben e bron en so te, taki bijna a flaw. A tan aksi fu dede èn a taki: „A moro bun fu mi dede leki fu tan na libi.”

9 Dan Gado aksi Yona: „Yu denki taki yu abi leti fu atibron so, fu di a krabasibon dede?”

Yona taki: „Iya, mi abi leti fu atibron. Mi ati e bron so te taki mi wani dede srefi.” 10 Ma Yehovah taki: „Yu e sari fu di a krabasibon dede, ma a no yu prani en èn a no yu meki a gro. A no yu meki a kon bigi. Na ini wán neti nomo a gro èn na ini wán neti a dede. 11 We dan mi no musu sari den sma fu a bigi foto Ninefei? Moro leki 120.000 sma e tan drape nanga den furu meti fu den. Den no sabi srefi san bun èn san no bun.”*