MIKA
1 Na ini a ten di Kownu Yotam, Kownu Akas nanga Kownu Heskia ben e tiri Yuda, Yehovah sori Mika* fu a foto Moreset wan fisyun di abi fu du nanga Samaria èn nanga Yerusalem. Disi na san Mika yere:
2 „Meki ala pipel arki!
Meki grontapu nanga ala sani di de na ini poti prakseri.
Meki a Moro Hei Masra Yehovah krutu unu.
Yehovah de na ini en santa tempel.
3 Yehovah o kmoto na en presi.
A o saka kon èn a o waka na tapu den hei presi fu grontapu.
4 Den bergi o smèlter na ondro en futu
èn den lagipresi o priti opo.
A o de leki kandrafatu di e smèlter na ini faya
èn leki watra di e fadon fu wan hei presi kon na gron.
5 Na fu di Yakob opo ensrefi teige mi
èn fu di den sma fu Israel sondu, meki ala den sani disi o psa.
Suma meki Yakob opo ensrefi?
A no Samaria du dati?
Suma meki den hei presi na Yuda pe sma e anbegi tra gado?
A no Yerusalem du dati?
6 Mi o meki Samaria tron wan brokopresi na ini a sabana.
A o tron wan presi pe sma e prani droifi.
Mi o trowe* den ston fu en na ini a lagipresi
èn mi o meki den fundament fu en kon de fu si.
7 Ala den popki di a e anbegi, mi o naki panya.
Ala den kado di Samaria kisi fu a wroko di a e du,* mi o bron na ini faya.
Mi o pori ala den falsi gado fu en.
Bika a ben kisi den sani disi leki pai fu a huru di a e huru.
Ma mi o meki sma teki den sani disi tyari gwe fu pai tra huru-uma.”
8 Dati meki mi o bari èn mi o krei.
Mi o waka sosofutu èn sososkin.
Mi o bari leki wan sabanadagu
èn mi o bari leki wan stroisifowru di e sari.
9 Bika a soro fu en no man dresi.
A siki fu en doro te na Yuda,
te na den portu fu a foto fu mi pipel èn te na Yerusalem.
10 „No taki a tori disi na ini Gat.
Un no musu krei srefsrefi.
Lolo na ini doti na Bet-Afra.*
11 Den sma di e tan na Safir kisi syen èn den gwe libi a kondre nanga sososkin.
Den sma di e tan na Sanan no go na dorosei.
Bet-Heisel ben de un kibripresi, ma now ala sma drape o bari krei.
12 Den sma di e tan na Marot ben e wakti bun sani,
ma ogri sani saka kmoto fu Yehovah kon na a portu fu Yerusalem.
13 Den sma di e tan na Lakis musu tai den asi na fesi na asiwagi.
Na unu meki taki na umapkin fu Sion bigin sondu.
Yu opo yusrefi teige mi neleki fa Israel du dati.
14 Dati meki yu musu gi Moreset-Gat kado te a e gwe.
Den oso fu Aksib kori den kownu fu Israel.
15 Un sma fu Maresa, mi o tyari a feanti kon na unu èn den o teki ala sani fu unu.
A glori fu Israel o doro te na Adulam.
16 Koti un ede-w’wiri èn krebi un ede, fu di rampu o miti den lobi manpkin fu unu.
Un piri un ede neleki na ede fu wan tingifowru*
fu di sma o tyari den manpkin fu unu gwe nanga tranga.”
2 „Bigi ogri o miti den sma di e prakseri soso ogri
èn den sma di e d’don na tapu den bedi e prakseri sortu ogri den o du!
Te m’manten doro, dan den e go du na ogri dati
fu di den abi a makti fu du en.
2 Te den wani wan gron, den e teki en
èn te den wani wan oso, den e teki en tu.
Den e bedrigi wan man fu teki en oso.
Den e kori en fu kan teki a famirigudu fu en.
3 Fu dati ede Yehovah taki:
’Mi o tyari wan rampu kon na tapu a pipel disi èn nowan fu unu o man wai pasi gi dati.*
Unu no o abi bigifasi moro fu di a o de wan ten fu rampu.
4 Na a ten dati sma o meki odo fu unu
èn den o bari krei te den si san miti unu.
Den o taki: „Sma fufuru ala den sani fu wi!
A teki den gron fu wi pipel èn a gi den na tra sma!
A prati den gron fu wi gi sma di no e dini Gado.”
6 Den e taki: „Un no musu taki nowan profeititori!
Un no musu taki fu den sani disi moro.
Wi no o kisi syen!”
7 Un sma fu Yakob, sma e taki:
„A yeye fu Yehovah no abi pasensi moro?
Na en e du den sani disi?”
Den sani di mi e taki e tyari soso bun gi den sma di e arki mi, a no so?
8 Ma wan pisi ten kba mi eigi pipel tron wan feanti.
Te sma e waka psa sondro fu frede leki srudati di drai kon baka fu wan feti,
dan unu e hari a moi sani puru fu* a krosi fu den.
9 Unu e yagi den uma fu mi pipel puru na ini den eigi oso pe den abi wan bun libi.
Un teki den bun sani di mi gi den pkin fu den èn un no o gi den dati noiti moro.
10 Un opo dan unu gwe, bika dyaso a no wan presi fu rostu.
Fu di a kondre no krin, meki a e kisi pori. A de wan hati sani fu si fa a kondre e kisi pori.
11 Efu wan wiswasi man e bedrigi sma èn a e taki a lei disi:
„Mi o taigi unu profeititori di abi fu du nanga win nanga sopi”,
dan wantewante a pipel disi o teki en leki profeiti.
12 Un sma fu Yakob, un kan de seiker taki mi o tyari un alamala kon makandra.
Mi musu fu tyari den Israelsma di tan abra, kon makandra.
Mi o tyari den kon na wán leki skapu na ini wan pen
èn leki wan ipi skapu na den weigron.
Furu b’bari o de fu yere drape.’
13 A sma di e broko ala sani puru na pasi, o waka na den fesi.
Den o broko kon na doro èn den o psa a portu go na dorosei.
A kownu fu den o psa na a portu fosi
èn Yehovah o de na den fesi.”
3 Dan mi taki: „Arki, un edeman fu den sma fu Yakob
èn un fesiman fu Israel.
A no unu musu sabi san bun?
2 Ma unu no lobi san bun. Na soso ogri unu lobi.
Unu e hari a buba puru na a skin fu mi pipel èn unu e hari a meti puru na den bonyo fu den.
3 Unu e nyan a meti fu mi pipel
èn unu e hari a buba puru na den skin.
Unu naki den bonyo fu den na pispisi
leki bonyo nanga meti di sma e bori na ini wan patu.*
4 Na a ten dati unu o bari kari Yehovah fu yepi unu,
ma a no o piki unu.
Na a ten dati a o drai baka gi unu,
fu di unu e du wan lo ogri.
5 Sonwan fu den profeiti e meki a pipel lasi pasi.
Te den feni wan sani fu nyan,* den e taki: ’Ala sani e go bun!’
Ma te wan sma no gi den wan sani fu nyan, dan den wani feti nanga a sma dati. Disi na san Yehovah taigi den:
6 ’A o de neti gi unu èn unu no o kisi fisyun.
Unu o de na ini dungru èn unu no o man taki san o psa na fesi.
A son o saka gi den profeiti
èn deiten o kon dungru gi den.
7 Den sma di e si fisyun o kisi syen
èn den sma di e taki san o psa na fesi o firi brokosaka.
Den alamala o abi fu tapu a snor fu den,*
bika Gado no e piki den.’”
8 Ma mi kisi furu krakti, fu di a yeye fu Yehovah kon na mi tapu.
Mi o du san reti èn mi o abi dek’ati
fu taigi Yakob sortu ogri a e du èn fu taigi Israel sortu sondu a e du.
9 Un edeman fu den sma fu Yakob
èn un fesiman fu Israel, un arki grantangi.
Unu no lobi retidu srefsrefi èn ala sani di reti unu e meki kon kron.
10 Unu e kiri sma fu bow Sion èn unu e du ogri sani fu bow Yerusalem.
11 Den fesiman* fu a foto disi e koti krutu, soso te den kisi tyuku.
Den priester drape e gi leri, soso te sma pai den.
Den profeiti drape e taki san o psa na fesi, soso te den e kisi moni.*
Ma tòg den e ferwakti taki Yehovah o yepi den.* Den e taki:
„Yehovah de nanga wi, tòg?
Nowan rampu o miti wi.”
12 Na fu unu ede
sma o plugu Sion leki wan gron
èn Yerusalem o tron wan brokopresi.
A bergi pe a tempel de* o tron leki wan bergi na ini wan busi.*
a bergi fu na oso fu Yehovah
o tnapu steifi èn a o hei moro den ede fu den bergi.
A o hei moro den pkin bergi
èn na drape ala den pipel o hari go.
2 Furu pipel o go drape èn den o taki:
„Kow go na a bergi fu Yehovah
èn na a oso fu a Gado fu Yakob.
A o leri wi san na den pasi fu en
èn wi o waka den pasi fu en.”
Bika a wet* o kmoto fu Sion
èn a wortu fu Yehovah o kmoto fu Yerusalem.
Den o naki den fet’owru kon tron plugu
èn den lansri kon tron grasinefi.
Nowan pipel o teki fet’owru fu go feti nanga wan tra pipel
èn den no o leri fu feti moro.
4 Ibri sma o sdon* na ondro en eigi droifibon nanga en eigi figabon.
Nowan sma o meki den frede,
bika na a mofo fu Yehovah di e tiri den legre, taki so.
5 Bika ibri pipel o tyari a nen fu en gado èn den o du san a gado fu den wani.
Ma wi o tyari a nen fu Yehovah wi Gado èn wi o du san a wani fu ala ten, iya, fu têgo.
6 Yehovah taki: „Na a ten dati,
mi o tyari a pipel di ben malengri, kon na wán.
Mi o tyari den sma di ben panya na ala sei
nanga den sma di mi ben strafu, kon makandra.
7 Mi o meki wan tu sma tan abra fu a pipel di ben malengri.
Mi o meki a pipel di sma ben tyari go farawe, tron wan tranga pipel.
Yehovah o tiri den leki kownu na tapu Sion-bergi
now èn fu ala ten.
8 Ai, toren fu na ipi skapu,
ai, bergi fu a foto Sion,
na yu o kisi makti fu tiri.
Iya, na a foto Yerusalem o tiri a kownukondre neleki fosten.
9 Fu san ede yu e bari so tranga?
Na fu di yu no abi wan kownu?
Na fu di a raiman fu yu dede?
Na fu dati ede yu abi pen neleki wan uma di de fu meki wan pkin?
10 Umapkin fu Sion, yu o abi hebi pen èn yu o bari
neleki wan uma di e kisi wan pkin.
Now yu o abi fu kmoto na ini a foto fu go tan na dorosei fu a foto.
Yu o abi fu go te na Babilon.
Na drape yu o kisi ferlusu.
Na drape Yehovah o bai yu baka fu den feanti fu yu.
11 Now furu pipel o kon makandra fu feti nanga unu.
Den o taki: ’Meki Sion kisi pori,
dan wi o luku fa dati o psa nanga en.’
12 Ma den no sabi san Yehovah e denki
èn den no sabi san a abi na prakseri.*
A o tyari den kon na wán leki bosu aleisi di sma e tyari go na a presi pe den e masi aleisi.
13 Umapkin fu Sion, opo go masi aleisi.
Bika mi o meki den tutu fu yu kon tron isri tutu
èn den futu fu yu kon tron kopro futu.
Dan yu o masi furu pipel.
Yu musu gi Yehovah den sani di den ben fufuru.
Iya, yu musu gi a tru Masra fu heri grontapu ala den gudu fu den.”
5 „Un sma di e tan na ini a foto di feanti wani teki abra,
unu e kotkoti un skin now.
Feanti kon lontu un foto.
Nanga wan tiki den e naki a krutuman fu Israel na en seifesi.
2 Ai, Betlehem Efrata,
yu pkin so te, taki den no e teri yu srefi leki wan fu den foto* fu Yuda.
Ma na fu yu wan sma o kon di mi o poti leki tiriman na ini Israel.
A tiriman disi de bun langa kba, sensi owruten.
3 Gado o libi en pipel gi den feanti fu den,
teleki a ten doro taki na uma di de nanga bere, meki en pkin.
Den tra brada fu a tiriman o drai kon baka na den Israelsma.
4 Dan a o opo tnapu èn a o tiri a pipel leki wan skapuman.
A o du dati nanga a krakti fu Yehovah èn na ini a nen fu Yehovah en Gado.
Den o libi sondro brok’ede,
bika a o abi furu makti te na den moro fara presi fu grontapu.
5 A tiriman disi o tyari freide kon.
Te den Asiriasma kon na ini wi kondre èn te den broko den tranga toren fu wi,
dan wi o seni seibi skapuman gi den. Iya, wi o seni aiti man di o tiri leki granman.*
6 Nanga fet’owru den o feti nanga den sma fu Asiria.
Den o go te na den grens fu a kondre fu Nimrod.
A tiriman o ferlusu wi fu den Asiriasma
te den kon na ini wi kondre èn na ini a kontren pe wi e tan.
7 Na mindri furu pipel, den sma fu Yakob di tan abra o de
leki dow fu Yehovah
èn leki furu alen di e fadon na tapu den bon.
Den no e howpu tapu libisma
èn den no e wakti nowan libisma.
8 Na mindri furu pipel èn na mindri sma fu furu kondre,
den sma fu Yakob di tan abra o de
leki wan lew na mindri den meti di de na busi
èn leki wan yongu lew* na mindri ip’ipi skapu.
Te a e kon na insei, a e naki den trowe èn a e priti den pispisi.
Nowan sma de fu ferlusu den.
9 Unu o wini den feanti fu unu
èn ala den feanti fu unu o dede.”
10 Yehovah taki: „Na a dei dati,
mi o puru den asi fu unu na un mindri èn mi o broko den asiwagi fu unu.
11 Mi o pori den foto na ini un kondre
èn mi o broko ala den foto fu unu di abi bigi skotu.
13 Mi o broko ala den popki di unu e anbegi èn den santa pilari fu unu.
Unu no o boigi moro gi wan sani di unu meki nanga un eigi anu.
15 Nanga atibron, iya, nanga bigi atibron
mi o strafu den pipel di no arki mi.”
6 Arki san Yehovah e taki.
Opo, un kon na fesi den bergi èn opo taki na fesi krutu.
Meki den pkin bergi yere san unu abi fu taki.
2 Meki den bergi nanga den steifi fundament fu grontapu
arki a krutu-afersi fu Yehovah.
Bika Yehovah tyari en pipel go na fesi krutu.
A o taki sortu ogri den Israelsma du. A taki:
3 „Mi pipel, san mi du nanga unu?
San mi du taki unu kon weri so?
Un taigi mi sortu ogri mi du.
4 Mi ben tyari unu kmoto na ini a kondre Egepte.
Mi ben ferlusu unu puru na ini a kondre pe unu ben de srafu.
Mi ben seni Moses, Aron nanga Meriam fu yepi unu.
5 Mi pipel, memre san Kownu Balak fu Moab ben wani du nanga unu
èn san Bileam, a manpkin fu Beor, ben taigi en.
Memre san psa di unu ben e waka fu Sitim go na Gilgal.
Dan unu o sabi taki Yehovah e du san reti.”
6 San mi musu tyari te mi o kon na fesi Yehovah?
San mi musu tyari te mi o boigi gi Gado di de na hemel?
Mi musu tyari heri bron-ofrandi gi en,
noso pkin kaw fu wán yari?
7 Yehovah o prisiri efu mi tyari dusundusun manskapu gi en,
noso efu mi tyari so furu oli taki a kan furu dusundusun liba?
Mi musu gi en mi fosi manpkin fu di mi trangayesi en?
Mi musu gi en mi eigi pkin* fu di mi sondu?
8 Un libisma, Yehovah taigi unu san bun.
Ma san a e aksi fu unu?
A e aksi nomo taki unu du san reti,* taki unu lobi fu du bun,*
èn taki unu abi sakafasi aladi unu e waka nanga un Gado!
9 Yehovah e kari den sma fu a foto.
Den koni sma o lespeki yu nen.
Poti prakseri na a fonfon-tiki èn a sma di e gebroiki en fu strafu unu.
10 Te now ete den oso fu den ogrisma lai nanga gudu di den kisi fu di den e du ogri.
Te now ete den e marki sani nanga baki* di pkin tumsi. Gado no lobi a sani disi srefsrefi.
11 Mi ben o abi wan krin ati* efu mi ben o gebroiki wan wegi di no bun,
noso efu mi ben o abi wan saka nanga wegiston fu bedrigi trawan?
12 Den guduman na ini a foto e du wan lo ogri.
Den sma fu a foto e lei
èn den e taki sani fu kori trawan.
13 Dati meki mi o naki unu fu gi un mankeri.
Mi o meki unu kisi pori, fu di unu du sondu.
14 Unu o nyan, ma a no o sari unu.
Soso angri o kiri unu.
Unu o tyari sani go kibri, ma unu no o man hori den gi unsrefi,
bika feanti o kon feti nanga unu èn den o teki den sani fu unu.
15 Unu o sai siri, ma unu no o koti n’nyan.
Unu o masi olèif, ma unu no o gebroiki na oli fu den.
Unu o masi droifi, ma unu no o dringi a win fu den.
16 Unu e hori den wet fu Omri, unu e du den sani di den sma fu Akab e du
èn unu e teki den rai fu den.
Fu dati ede sma o skreki te den si san mi o du nanga unu.
Sma o froiti te den e spotu unu di e tan na ini a foto.
Den tra pipel o wiswasi unu.”
7 Pôti fu mi! Mi kon de leki wan sma di lostu droifi nanga figa,
ma nowan bosu droifi de
èn nowan switi figa de fu nyan.
Sma piki ala den droifi
nanga ala den froktu di e gro na a waran ten fu a yari.
Den alamala e luru fu kiri sma.
Ibriwan fu den e poti wan nèt fu fanga en brada.
3 Den sabi du ogri heri bun.
Den edeman wani taki sma musu gi den sani,
den krutuman e du den wroko soso te sma pai den,
èn den heihei man e taki sortu sani den wani.
Dati meki den e seti sani makandra fu du ogri.
4 Srefi a moro bun sma na den mindri de leki wan makabusi.
Srefi a moro ret’ati sma na den mindri e dyuku moro wan skotu fu makabon.
Ma a dei o kon te Gado o krutu unu, soleki fa den waktiman fu unu ben taki.
Dan unu o bruya.
5 No bribi yu mati.
Srefi yu bun mati yu no musu fertrow.
Luku bun san yu e taigi yu frow di e d’don na yu sei.
6 Bika den manpkin e wiswasi den p’pa
èn den umapkin e meki trobi nanga den m’ma.
Den uma e meki trobi nanga a m’ma fu den masra.
Sma abi feanti na ini den eigi osofamiri.
7 Ma mi dati, mi o tan luku Yehovah.
Nanga pasensi mi o wakti mi Gado* di o ferlusu mi.
Mi Gado o yere mi.
8 Mi feanti,* yu no musu prisiri taki den sani disi e miti mi.
Mi fadon, ma mi o opo baka.
Mi e tan na ini dungru, ma Yehovah o de wan leti gi mi.
9 Mi o teki na atibron fu Yehovah na mi tapu,
bika mi sondu teige en.
Mi o du dati teleki a krutu a tori fu mi na wan reti fasi.
A o tyari mi kon na ini a leti baka
èn mi o si a retidu fu en.
10 Mi feanti o si dati tu.
Dan a o firi syen, bika a ben taigi mi:
„Pe Yehovah yu Gado de?”
Nanga mi eigi ai mi o si fa ogri o miti mi feanti.
Sma o trapu en leki tokotoko na tapu strati.
11 Na a dei dati den o bow den ston skotu fu yu.
Na a dei dati den o skoifi a grens fu yu kondre go moro fara.
12 Na a dei dati sma o kmoto fu ala sei kon na yu.
Den o kmoto fu Asiria èn fu den foto fu Egepte.
Den o kmoto fu a heri kontren fu Egepte te na a Gran Liba,*
fu a wan se te na a tra se, èn fu a wan bergi te na a tra bergi.
14 Tyari yu pipel leki wan skapuman di e tyari en skapu nanga en tiki.
Den na skapu fu yu di ben e tan den w’wan na ini wan froktudyari na mindri busi.
Meki den nyan grasi na Basan nanga Gilead leki fa den ben e du fosi.
15 „Mi o meki unu si wondru,
neleki fa mi ben du dati di unu kmoto fu a kondre Egepte.
16 Te den tra pipel o si den sani disi, den o firi syen
fu di den o si taki a bigi makti fu den na noti.
Nanga den anu den o tapu den mofo èn den o kon dofu.
17 Neleki sneki den o nyan doti.
Neleki sneki di bruya den o kmoto fu den kibripresi.
Beifbeifi den o kon na wi Gado Yehovah.
Den o frede yu.”
18 Sortu gado de leki yu?
Yu e gi yu pipel di tan abra, pardon fu den sondu èn yu no e tan prakseri a fowtu di den meki.
Yu no o tan nanga atibron fu ala ten,
bika yu lobi du bun.*
19 Yu o abi sar’ati gi wi baka èn yu o tapu* den fowtu fu wi.
Yu o trowe ala den sondu fu wi na ini a dipi se.
20 Ala sani di yu taigi Yakob ben tru
èn yu ben du bun* gi Abraham.
Na so yu o libi nanga wi tu, bika na dati yu ben pramisi den afo fu wi sensi owruten.
Mika na a syatu fasi fa sma e skrifi a nen Mikael (di wani taki „Suma de leki Gado?”), noso Mikaya (di wani taki „Suma de leki Yehovah?”).
Hebrewtongo: „kanti”.
Noso: „Ala a pai di a e kisi fu a huru di a e huru”.
Noso: „na ini na oso fu Afra”.
A kan taki a Hebrew wortu gi „tingifowru” wani taki „aka” tu.
Hebrewtongo: „nowan fu unu o man puru un neki”.
Hebrewtongo: „a gemeente fu Yehovah”.
Noso: „makandra nanga”.
Noso: „bradimofo patu”.
Hebrewtongo: „fu beti nanga den tifi”.
Noso: „a mofo fu den”.
Hebrewtongo: „edeman”.
Noso: „solfru”.
Noso: „den e taki dati den e fertrow tapu Yehovah”.
Noso: „a bergi fu na Oso”.
Noso: „wan bergi di lai busi”.
Noso: „Na ini a kbapisi fu den dei”.
Noso: „den leri”.
Noso: „a o meki sani kon bun baka”.
Noso: „tan”.
Noso: „den no sabi san a o du”.
Noso: „lo”.
Noso: „fesiman”.
Noso: „yongu lew di abi w’wiri na en neki kba”.
Hebrewtongo: „a bonuwroko di de na ini un anu”.
Luku Wortubuku.
Hebrewtongo: „a froktu fu mi skin”.
Noso: „taki un musu de eerlijk”.
Hebrew wortu: kesed. Luku Wortubuku.
Hebrew wortu: efa. Luku „Tra prenspari sani” B14.
Noso: „de sondro fowtu”.
Noso: „Ala bun-ati sma dede gwe”.
Noso: „Mi o sori taki mi e wakti mi Gado”.
Dyaso a Hebrew wortu di gebroiki gi „feanti” abi fu du nanga wan umasma.
Dati na Eufraat-liba.
Hebrewtongo: „Den froktu fu den sani di den e du”.
Hebrew wortu: kesed. Luku Wortubuku.
Noso: „trapu”, „wini”.
Hebrew wortu: kesed. Luku Wortubuku.