NAHUM
1 Wan krutuboskopu gi Ninefei. A buku disi e taki fu a fisyun fu Nahum,* wan man fu Elkos. Disi na san skrifi na ini a buku:
2 Yehovah na wan Gado di wani taki sma anbegi en w’wan èn a e strafu sma te den e du ogri.
Yehovah e strafu den feanti fu en èn a de srekasreka fu puru atibron na den tapu.
Yehovah e pai den gensman fu den ogri di den e du
èn a e puru atibron tapu den feanti fu en.
3 Yehovah ati no e bron esi èn a abi furu krakti.
Ma Yehovah o strafu den sma di musu kisi strafu.
A e kon nanga draiwinti nanga bigi winti.
Den wolku de leki stof na ondro en futu.
4 A e pir’ai gi a se èn a e meki a se kon drei.
A e meki ala den liba lon drei.
Basan nanga Karmel e kon drei
èn den bromki fu Libanon e kon drei tu.
5 A e meki den bergi seki
èn a e meki den pkin bergi smèlter.
Te a e kon, grontapu e seki.
Heri grontapu nanga ala sma di e tan drape e beifi gi en.
6 Suma man tan tnapu te en ati bron?
Suma man tan na libi te a de nanga bigi atibron?
Neleki faya a o kanti en atibron na den tapu
èn a o broko den bigi ston pispisi.
7 Yehovah bun èn a de wan fortresi* na ini muilek ten.
A e prakseri* den sma di e kon suku kibri na en.
8 A o meki wan frudu psa na ini a foto* fu pori en krinkrin.
Dungru o de na ala sei pe den feanti fu en e go.
9 Sortu ogri unu man du nanga Yehovah?
Te a o tyari pori kon, dan neks no o tan abra.
A no o abi fu du en ete wan leisi.
10 Den sma fu Ninefei de leki wan skotu fu makabon pe sma no man psa na mindri.
Den de leki sma di kon drungu fu di den dringi biri.*
Ma den o bron gwe leki drei grasi.
11 Wan sma fu unu o kon di o abi na prakseri fu du ogri nanga Yehovah en pipel.
A o gi rai di no warti noti.
12 Disi na san Yehovah taki:
Mi ben meki yu pina, Yuda, ma mi no o pina yu moro.
13 Now mi o broko a tyatyari di Asiria poti na yu tapu
èn mi o hari den bui fu yu koti.
Mi o broko den popki di de na ini den oso* fu yu gado.
Mi o meki wan grebi gi yu fu di yu na noti.’
15 Luku den futu di e waka tapu den bergi fu tyari bun nyunsu kon,
den futu fu a sma di e tyari wan boskopu fu freide.
Yuda, yu musu hori den fesa fu yu èn yu musu du san yu ben sweri fu du.
Bika noiti moro wiswasi sma o psa na ini yu foto.
Den alamala o dede gwe.”
2 Wan sma o kon na unu* fu yagi unu go na ala sei.
Hori wakti na den skotu fu a foto.
Luku a pasi bun.
Seti unsrefi fu go na feti.* Meki unsrefi kon moro tranga.
2 Yehovah o meki Yakob kisi glori baka
èn a o du a srefi gi Israel.
Bika den feanti pori a kondre fu den
èn den pori den taki fu den droifibon fu den.
3 A schild fu den tranga man fu en abi wan redi kloru.
Den srudati fu en weri redi krosi.
Te den e go na feti,
den isri sani na den fetwagi fu den e brenki leki faya
èn den hari den peiri di meki fu yaneifer-udu.
4 Den fetman e rèi den fetwagi fu den leki lawman na tapu strati.
Es’esi den e rèi go-kon na tapu den pren* fu a foto.
Den e skèin leki a faya fu frambo* èn den gaw leki bliksem.
5 A kownu fu den o kari den ofsiri fu en.
Ala yuru den o naki den futu te den e waka.
Den lon go na a skotu fu a foto
èn den bow sani fu meki a skotu kon moro tranga.
7 A besroiti teki kba: Den sma fu a foto o kisi bigi syen.
Sma o tyari den gwe èn den umasrafu drape o geme leki doifi.
Den o naki na tapu den borsu* fu di den e sari.
8 Sensi di Ninefei de, a de leki wan watrapeti.
Ma now den sma e lon gwe fu en.
Son sma e bari: „Tan tnapu! Tan tnapu!”
Ma nowan sma e drai kon baka.
9 Teki solfru, teki gowtu!
Bika den lai gudu.
Ala sortu diri sani de fu teki bogobogo.
10 A foto leigi! Nowan sma de drape moro. A tron wan brokopresi.
Den sma ati e smèlter, den kindi e beifi èn den futu e seki.
Na ala den sma fesi a de fu si taki den e bruya srefsrefi.
11 Pe a tanpresi fu den lew* de now? Pe a presi de pe den yongu lew* ben e nyan?
Pe a presi de pe den lew ben kmopo nanga den pkin fu den
èn pe nowan sma ben meki den frede?
12 A lew ben e priti furu meti pispisi fu gi en pkin n’nyan teleki a sari den.
A ben e kiri tra meti gi den umalew fu en.
Den bergi-olo fu en ben furu nanga dede meti
èn na den tanpresi fu en a ben kibri furu meti di a ben priti pispisi.
13 „Mi o strafu unu”, na so Yehovah di e tiri den legre taki.
„Mi o bron den fetwagi fu unu nanga faya.
Wan fet’owru o kiri den yongu lew fu unu.
Mi o sorgu taki unu no man onti moro na grontapu
èn sma no o yere a sten fu den boskopuman fu unu moro.”
3 A kba gi a foto di e kiri sma!
A lai soso bedrigiman nanga fufurman.
Ala ten a e onti sma fu kiri den.
2 Drape yu kan yere fa sma e wipi den asi èn fa den asi e lon.
Yu kan yere fa den asiwagi e rèi èn fa den e meki b’bari na tapu den strati.
3 Srudati na tapu asi de drape nanga den fet’owru di e brenki èn den lansri di e koti faya.
Den kiri bun furu sma. Wan lo dede sma de fu si.
Dedeskin de na ala sei.
Den e stotu den futu na den dedeskin di de na pasi.
4 Ala den sani disi e psa nanga a foto fu di a de leki wan huru-uma di e huru na ala sei.
A e hari sma fu di a moi. A sabi bonu.
Nanga a hurulibi fu en a e kori den pipel èn nanga bonu a e kisi difrenti lo.
5 „Mi o strafu yu”,* na so Yehovah di e tiri den legre taki.
„Mi o opo yu koto tapu yu fesi,
dan den pipel o si yu nanga sososkin
èn den kownukondre o si yu syenpresi.
7 Ala sma di o si yu, o lon gwe fu yu.
Den o taki: ’Ninefei kisi pori!
Suma o firi sari gi en?’
Pe mi o feni sma fu trowstu yu?
8 Yu denki taki yu bun moro a foto No-Amon* di ben de na den kriki fu Nijl-liba?
Furu watra ben lontu en.
A se ben de a gudu fu en. A se ben de leki wan skotu gi en.
9 Etiopia nanga Egepte ben gi en bun furu makti.
Den sma fu Put nanga Libia ben e yepi en tu.
10 Ma en srefi ben musu go na ini katibo.
Den tyari den sma fu en gwe nanga tranga.
Na wan ogr’ati fasi sma kiri den pkin fu en na ala den uku fu den strati.*
Sma iti lot fu sabi sortwan fu den heihei man fu en den musu teki leki srafu
èn den bui ala den prenspari man fu en.
11 Yu o kon drungu tu.
Yu o go kibri.
Yu o go suku wan presi fu kibri gi den feanti fu yu.
12 Ala den foto fu yu di abi bigi skotu de leki figabon di abi den fosi lepi froktu.
Na seki wan sma abi fu seki den nomo, dan den e fadon na ini en mofo.
13 Den srudati fu yu de leki umasma.
Den portu fu yu foto o opo bradi gi den feanti fu yu.
Faya o bron den bowtu fu den portu fu yu.
14 Go kisi watra, so taki yu kan abi watra te den o lontu yu!
Meki den foto fu yu di abi bigi skotu kon moro tranga.
Go na ini a tokotoko, trapu na tapu kleidoti
èn teki yu wrokosani fu meki ston.
15 Awinsi yu du disi, tòg faya o bron yu.
Wan fet’owru o kiri yu.
Den o nyan yu neleki fa yongu sprenka e nyan den w’wiri fu den bon.
Meki a pipel fu yu kon de so furu leki yongu sprenka.
Iya, meki den sma fu yu kon de so furu leki sprenka.
16 Yu meki den bisnisman fu yu kon furu moro leki den stari na hemel.
A yongu sprenka e puru en buba, dan a e frei gwe.
17 Den waktiman fu yu de leki sprenka.
Den ofsiri de leki wan bigi grupu sprenka.
Na wan kowru dei, den e kibri na ini den ston-olo.
Ma te a son e skèin, den e frei gwe.
Nowan sma sabi pe den de.
18 Ai, kownu fu Asiria, den skapuman fu yu e dyonko.
Den heihei man fu yu e tan na ini den oso fu den.
A pipel fu yu panya go na ala sei fu den bergi
èn nowan sma de fu tyari den kon makandra.
19 Nowan sma o yepi yu te ogri miti yu.
A soro fu yu no man dresi.
Ala den sma di yere san psa nanga yu o naki anu fu prisiri,
bika ala ten yu ben du ogri nanga den alamala.”
Nahum wani taki „Wan sma di e trowstu trawan”.
Luku Wortubuku.
Noso: „A e sorgu”. Hebrewtongo: „A sabi”.
Dati na Ninefei.
Noso: „biri di meki fu tarwe”.
Hebrewtongo: „Den”.
Noso kande: „èn hari psa na den mindri”.
Dati na Asiria.
Noso: „tempel”.
Dati na Ninefei.
Hebrewtongo: „Meki un dyonku kon tranga”.
Luku Wortubuku.
Bakratongo: „fakkel”.
Noso: „o smèlter gwe”.
Hebrewtongo: „den ati”.
Dyaso den e agersi Ninefei nanga wan lew.
Noso: „yongu lew di abi w’wiri na den neki kba”.
Dati na Ninefei.
Dati na Teibes.
Hebrewtongo: „na a ede fu ala strati”.