HABAKUK
1 A profeiti Habakuk* ben yere wan boskopu na ini wan fisyun.
2 Yehovah, o langa mi musu bari, fosi yu yepi mi? O ten yu o arki mi?
O langa yu o meki sma du ogri nanga mi, fosi yu ferlusu mi? O ten yu o du wan sani?
3 Fu san ede yu e meki mi si fa sma e du ogri?
Fu san ede yu e tan luku nomo fa sma e pina trawan?
Fu san ede mi musu si fa sma e fufuru èn fa den e feti nanga makandra?
Fu san ede so furu trobi nanga feti de?
4 Dati meki a wet no abi krakti moro
èn retidu no e teri srefsrefi.
Sani no e psa na wan reti fasi
fu di den ogrisma e lontu den ret’ati sma.
5 „Un luku den pipel. Luku den bun!
Nanga opo mofo unu o luku den èn unu o skreki.
Bika na ini a ten fu unu wan sani o psa
di unu no o bribi, awinsi sma ferteri unu dati.
6 Mi o meki den Kaldeyasma kon.
Den e kon es’esi èn den no e sari nowan sma.
Den e go na furu presi na grontapu
fu teki sma oso.
7 Sma e beifi gi den èn sma e frede den srefsrefi.
Den e meki den eigi wet èn den abi furu makti.*
8 Den asi fu den e lon moro esi leki penitigri.
Den ogri moro busdagu di e onti na neti.
Den asi fu den e lon bun tranga.
Den asi fu den e kon fu farawe.
Den e saka kon leki wan aka di o grabu wan meti fu nyan.
9 Den alamala e kon fu du soso ogri.
Den e kon leki wán man èn den e tyari furu sma gwe,
neleki fa a winti fu owstusei e tyari furu santi gwe.
10 Den e spotu den kownu
èn den e lafu den heihei man.
Den e lafu te den e si den foto di abi bigi skotu.
Nanga santi den e meki wan bergi, so taki den kan teki den foto disi abra.
11 Den e kon leki winti èn den e psa na ini a kondre.
Ma den o kisi strafu
fu di den e taki dati na a gado fu den gi den krakti.”*
12 Yehovah, ala ten yu ben de kba.
Mi Gado, mi Santawan, yu no o dede noiti.*
Yehovah, yu poti den fu strafu wi.
Mi Stonbergi, yu seni den kon fu strafu wi.*
13 Yu ai soifri tumsi fu si san ogri
èn yu no man si te sma e du sani di no bun.
We dan fu san ede yu no e du noti te sma e bedrigi trawan?
Fu san ede yu e tan pî te wan ogri sma e pina wan sma di bun moro en?
14 Fu san ede yu e meki libisma kon de leki den fisi fu se
èn leki den meti di e kroipi na gron èn di no abi tiriman?
15 Den* e fanga ala den sma nanga wan fisi-aka.
Den e fanga den nanga den tyasnet fu den
èn den e tyari den kon na wán na ini den fisinet fu den.
Dati meki den breiti srefsrefi.
16 Dati meki den e tyari srakti-ofrandi gi den tyasnet fu den
èn den e tyari ofrandi* gi den fisinet fu den.
Bika na den sani disi e meki taki den abi bun n’nyan*
èn a n’nyan fu den gosontu.
17 Fu san ede yu e gi den pasi fu leigi den tyasnet fu den ibri tron baka?*
Fu san ede yu e libi den fu kiri den pipel sondro fu abi sar’ati gi den?
2 Mi o tan tnapu na a presi pe mi musu hori wakti.
Mi o tan wakti na tapu a skotu fu a foto.
Mi o tan hori wakti fu luku san a* o taigi mi fu taki
èn mi o prakseri san mi o piki en te a gi mi pir’ai.
2 Ne Yehovah piki mi:
„Skrifi san yu e si na ini a fisyun. Skrifi en* krin na tapu plata ston,
so taki sma man leisi en makelek* gi trawan.
3 A fisyun o kon tru na wan spesrutu ten.
A e hasti ensrefi fu doro a kba fu en* èn a no de wan leitori.
Awinsi a no psa ete,* un musu tan ferwakti en!*
A o kon tru nomonomo.
A no o kon lati!
4 Luku a sma di abi bigifasi.
A no abi wan krin ati.
Ma a ret’ati sma o tan na libi fu di a abi bribi.
5 Iya, win kan meki wan sma du don sani.
Dati meki wan man di abi bigifasi no man du san a abi na prakseri.
A gridi leki Grebi*
èn neleki dede, noti no e sari en.
A e tyari ala pipel kon makandra
èn a e teki den alamala gi ensrefi.
6 Na den srefi sma dati o spotu en, den o koti odo gi en èn den o taki en tori.
Den o taki:
’Bigi ogri o miti a sma di e teki sani di no de fu en
èn di e poti ensrefi na wan moro bigi paiman!
O langa disi musu go doro ete?
7 Wantronso sma o opo èn den o aksi yu fu pai a paiman di yu abi na den.
Den o wiki yu èn den o seki yu bun tranga.
Den o teki ala sani fu yu tyari gwe.
8 Yu ben teki ala sani fu furu pipel
èn yu kiri furu sma.
Yu pori a gron fu den nanga den foto fu den
èn yu du ogri nanga ala den sma na ini den foto.
Dati meki ala den tra pipel di tan abra o teki ala sani fu yu.
9 Bigi ogri o miti a sma di e du ogri fu kisi wini gi den sma fu en!
A e poti en oso hei leki wan fowrunesi,
so taki ogri no miti en.
10 A sani di yu abi na prakseri na wan syen gi den sma fu yu.
Yu sondu fu di yu kiri furu pipel.
11 Srefi wan ston na ini a muur fu na oso o bari
èn wan udu postu na a dak o piki en.
12 Bigi ogri o miti a sma di e kiri trawan
èn di e du ogri fu di a wani bow wan foto!
13 Yehovah di e tiri den legre e meki den pipel wroko tranga fu kisi sani di o bron na ini faya.
Na fu soso den e wroko teleki den kon weri.
14 Neleki fa a se lai nanga watra,
na so grontapu o lai nanga sma di sabi taki Yehovah abi bigi makti.
15 Bigi ogri o miti a sma di e gi den mati fu en wan sani fu dringi,
aladi en ati e bron nanga den èn a abi bita-ati gi den!
A e meki den kon drungu fu di a wani si den nanga sososkin.
16 Soso syen yu o kisi na presi fu glori.
Now yu srefi o dringi èn sma o si taki yu no besnèi.*
Yu srefi o dringi fu a kan di de na ini Yehovah en ret’anu.
Na presi fu glori yu o kisi syen.
17 Den ogri di psa nanga Libanon o psa nanga yu tu.
Sma o kiri yu neleki fa yu ben kiri den busmeti di ben e frede yu.
Den sani disi o miti yu fu di yu kiri furu sma,
yu pori a gron nanga den foto fu den
èn yu du ogri nanga ala den sma na ini den foto.
18 Sma e fertrow den popki di den meki,
popki fu udu, ston, solfru nanga gowtu.
Ma den rai di den e kisi fu den, na soso lei.
Den gado disi no man taki.
Dan sortu bun den man tyari gi den sma di e meki den?
19 Bigi ogri o miti a sma di e taigi wan pisi udu: „Wiki!”
Bigi ogri o miti a sma di e taigi wan ston di no man taki: „Wiki! Gi wi rai!”
Unu tapu den nanga gowtu èn nanga solfru,
ma den no man hari blo srefi.
20 Yehovah de na ini en santa tempel.
Meki heri grontapu tan pî na en fesi!’”
3 Disi na a begi fu a profeiti Habakuk di a singi leki wan sari singi:*
2 „Yehovah, mi ben yere fu yu.
Yehovah, den sani di yu du meki mi kisi bigi lespeki gi yu.
Na ini a ten fu wi,* yu musu du dati baka!
Na ini a ten fu wi,* yu musu meki sma kon sabi san yu du.
Te yu o puru atibron tapu sma,* yu no musu fergiti fu sori sar’ati.
A glori fu en ben tapu heri hemel
èn heri grontapu ben e prèise en.
4 A leti fu en ben e skèin leki a leti fu a son.
Tu faya ben e skèin kmoto fu en anu
èn na drape a krakti fu en ben de.
5 Ala sortu takru siki ben e waka na en fesi
èn hebi korsu ben e waka na en baka.
6 Ne a tan tnapu èn a seki grontapu.
Na luku a luku nomo, dan den pipel bigin dyompo.
A masi den bergi di de sensi ten.
Den pkin bergi di de sensi owruten, boigi go na gron.
A e waka den pasi di de bun langa kba.
7 Mi si bigi problema na ini den tenti fu Kusan.
Den tentikrosi fu a kondre Midian ben e seki.
8 Yehovah, yu ati bron nanga den liba?
Na bron yu ati bron nanga den kriki?
Noso yu wani puru atibron tapu a se?
Yu rèi na tapu den asi fu yu
èn den asiwagi fu yu wini den feanti.*
9 Yu hari yu bo èn yu seti yusrefi fu sutu nanga en.
Den fetsani* de klarklari fu du san yu sweri.* (Sela)
Nanga liba yu priti grontapu.
10 Di den bergi si yu, den kisi hebi pen.
Wan hebi alen fadon èn a sungu grontapu.
A dipi watra meki furu b’bari.
A opo en anu go na loktu.
11 A son nanga a mun tan tnapu na den presi na hemel.
Yu peiri frei es’esi leki bliksem.
Den lansri fu yu e brenki srefsrefi.
12 Nanga bigi atibron yu ben e waka na heri grontapu.
Nanga atibron yu traptrapu den pipel.*
13 Yu go fu ferlusu yu pipel. Yu go fu ferlusu a salfuwan fu yu.
Yu masi na edeman* fu na oso fu na ogriwan.
Yu broko a heri oso fu a dak* te na gron, so taki a fundament kon de fu si. (Sela)
14 Yu boro na ede fu den feanti nanga den eigi fetsani*
di den lon kon leki wan bigi winti fu yagi mi go na ala sei.
Nanga prisiri den swari den mofinawan na wan kibripresi.
15 Nanga den asi fu yu, yu hari psa na ini a se
èn yu waka psa na ini den bigi skwala fu a se.
16 Di mi yere ala den sani disi, mi bere bigin trubu.
Di mi yere a boskopu, mi mofo bigin beifi.
Mi bonyo bigin pori gwe.
Mi futu ben e beifi.
Ma nanga pasensi mi o wakti a dei
te bigi ogri o miti a pipel di kon feti nanga wi.
17 Awinsi den figabon no gi bromki
èn den droifibon no abi froktu,
awinsi den olèifbon no gi bun froktu
èn den gron no gi n’nyan,
awinsi skapu no de na ini den skapukoi moro
èn kaw no de na ini den koi moro,
18 tòg mi o de nanga bigi prisiri fu Yehovah ede.
Mi o prisiri nanga a Gado di o ferlusu mi.
19 A Moro Hei Masra Yehovah na a sma di e gi mi krakti.
A o meki mi futu kon de leki den di fu dia.
A o meki mi waka na tapu hei presi.”
Gi a fesiman fu den pokuman: A singi disi musu prei nanga den harpu* fu mi.
Kande Habakuk wani taki „Wan steifi brasa”.
Noso: „glori”.
Noso kande: „a krakti fu den na den gado”.
Noso kande: „wi no o dede noiti”.
Noso: „fu pir’ai gi wi”.
Dati na den Kaldeyasma, den feanti fu den.
Noso: „den e bron switismeri”.
Hebrewtongo: „n’nyan di abi furu oli”.
Noso kande: „fu hari den fet’owru ibri tron baka”.
A sori leki Habakuk e taki dyaso fu Gado.
Noso: „Krabu en”.
Noso: „grati”.
Noso: „fu doro a ten di a o kon tru”.
Noso: „Awinsi a gersi leki a no o psa ete”.
Noso: „wakti en fayafaya”.
Hebrew wortu: syeol. Luku Wortubuku.
Noso kande: „èn yu o seiriseiri leki wan drunguman”.
Noso: „rowsingi”.
Hebrewtongo: „Na mindri fu den yari”.
Hebrewtongo: „Na mindri fu den yari”.
Noso: „Te dyugudyugu de”.
Luku Wortubuku.
Noso: „den asiwagi fu yu tyari ferlusu kon”.
Noso kande: „peiri”.
Noso kande: „Den lo meki wan sweri”.
Hebrewtongo: „yu masi den pipel neleki fa sma e masi aleisi”.
Hebrewtongo: „ede”.
Hebrewtongo: „neki”.
Hebrewtongo: „den tiki fu en”.
Noso: „instrument di gersi harpu”.