Wan toe wortoe na fesi

„Mi ben gro na wan pikin foto na a noordsei distrikt”, na so Dauda foe Sierra Leone e froeteri. „Di mi ben de wan boi, wan kesekese foe wan pisi gron ben de wan leisi a mindri mi famiri nanga wan tra famiri. Ala toe famiri ben taki, dati den abi reti tapoe a srefi pisi gron. Foe tjari wan loesoe kon ini a tori, den ben meki wan obiaman kon. Na obiaman ben gi wan tra man wan spikri, èn ben tapoe a man nanga wan weti krosi. Heri esi a man na ondro a krosi ben bigin beifi èn broko sweti. Di a ben loekoe na ini a spikri a ben bari tranga, taki: ’Mi e si wan owroe man e waka kon! A weri weti krosi. A langa èn a owroe, a abi weti wiwiri, a e beni pikinso te a e waka.’

A ben e froeteri fa mi granpapa ben tan! Dan a man ben bigin kisi senwe èn a ben bari tranga, taki: ’Efoe oenoe no e bribi san mi e taki, dan oensrefi kon loekoe!’ A no de foe taki, dati no wan foe wi ben abi a deki-ati foe doe dati! Na obiaman ben kowroe a senwe foe a man, foe di a ben iti-iti wan obia wiwiri watra na en tapoe, di a ben abi na ini wan krabasi.

’Granpapa’, di ben e taki nanga mofo foe a man di ben loekoe na ini a spikri, ben taki dati a pisi gron ben de foe wi famiri. A ben taigi mi granmama taki a ben moesoe wroko a gron sondro foe broko en ede. A tra famiri ben teki san ben taki. Ne a trobi ben koti.”

Den sortoe ondrofenitori disi de foeroe na West-Afrika. Drape, neleki tra presi foe grontapoe, foeroe miljoenmiljoen sma e bribi taki dedesma e go na a jejekondre, pe den man si sma na grontapoe èn abi krakti na tapoe a libi foe den. A bribi disi de troe? Den dedewan de troetroe a libi? Efoe dati no de so, dan soema na den sma di e taki, dati den na den jeje foe den dedewan? A de toemoesi prenspari foe kon sabi den joisti piki tapoe den aksi disi. A de wan afersi foe libi nanga dede.