Wortu di yu e gebroiki te yu e taki

WORTU na prenspari sani di e yepi wi fu taki nanga trawan. Ma efu wi wani meki den wortu di wi e taki, du soifri san wi abi na prakseri, dan wi musu luku bun sortu wortu wi e gebroiki te wi e taki. Wan wortu di kan fiti na wán okasi, kan abi takru bakapisi wan tra leisi. Wan tu wortu moi srefisrefi, ma efu wan sma no e gebroiki den bun, dan den kan tron „wortu di e meki sma sari”. Te wan sma e gebroiki den sortu wortu disi, dan furu tron a de so taki a no e prakseri bun fosi a e taki, èn a no e hori trawan na prakseri. Son wortu wani taki tu difrenti sani. Wán fu den sani di a wani taki kan de grofu, noso a kan lagi wan trawan (Odo 12:18; 15:1). Na a tra sei, dan „wan bun wortu”, noso wan wortu di e gi tra sma deki-ati, na wan wortu di e prisiri na ati fu a sma nanga suma yu e taki (Odo 12:25). Wan sma musu meki muiti fu feni den yoisti wortu, srefi efu a de wan koni sma. Bijbel e taigi wi taki Salomo ben sabi heri bun taki a de fanowdu fu suku „switi wortu” nanga „yoisti wortu fu waarheid”.​—Preik. 12:10.

Na ini son tongo, sma gwenti fu gebroiki spesrutu wortu te den e taki nanga owru sma, noso nanga sma di abi makti. Ma na a tra sei, den e gebroiki tra wortu te den e taki nanga den mati, noso nanga yonguwan. Efu wan sma no ben o hori ensrefi na den sani disi, dan trawan ben kan feni taki a no abi bun maniri. A no fiti tu fu gebroiki nen gi wisrefi fu kisi lespeki, te wi sabi taki sma na ini wi kondre gwenti fu gebroiki dati gi tra sma. Na ini a tori fu gi grani na sma, dan san skrifi na ini Bijbel de moro hei leki san wan wet noso wan gwenti fu a presi pe wi e tan, kan aksi fu wi. Bijbel e gi Kresten deki-ati fu „gi grani na ala sortu sma” (1 Petr. 2:17). Den wan di e du disi nanga den heri ati, e taki na wan lespeki fasi nanga ala sma, awansi o owru den sma dati de.

A no de fu taki dati furu sma di no de tru Kresten, e taki grofu. Kande den e firi taki te den e taki grofu, dan den e poti krakti tapu den sani di den e taki. Noso kande den e taki so, fu di den no sabi furu wortu, noso den no sabi tra fasi fu taki. Efu wan sma ben abi a gwenti fu taki so bifo a leri sabi Yehovah en pasi, dan a kan de wan muilek sani gi en fu broko nanga a grofu fasi fa a ben gwenti taki. Ma toku a kan du dati. A yeye fu Gado kan yepi wan sma fu kenki a fasi fa a e taki. Ma a sma srefi musu wani fu leri sabi bun wortu, noso wortu di de bun gi trawan fu yere èn di e gi trawan deki-ati. Te a sma leri den bun wortu disi kaba, dan a musu gebroiki den ala ten baka.​—Rom. 12:2; Ef. 4:29; Kol. 3:8.

Gebroiki wortu di sma man frustan wantewante. Efu trutru yu wani taki bun, dan yu musu gebroiki wortu di sma kan frustan wantewante (1 Kor. 14:9). Efu yu e gebroiki wortu di den arkiman fu yu no e frustan wantewante, dan yu sa tron gi den leki wan sma di e taki wan tra tongo.

Son sma di e du wan spesrutu sortu wroko, e gebroiki spesrutu wortu di abi fu du nanga a wroko fu den. Kande den e gebroiki den sortu wortu disi ibri dei. Ma efu yu ben o gebroiki den wortu disi na wan fasi di no fiti, dan yu no sa man taki bun nanga trawan. Moro fara, awansi yu e taki leki fa wi gwenti taki ala dei, toku efu yu ben o taki nomonomo fu ala sortu pikinpikin sani di no de fanowdu, dan den arkiman fu yu kan poti den prakseri na tra sani èn den no sa arki yu moro trutru.

Wan takiman di e hori tra sma na prakseri, sa suku fu gebroiki wortu di ala sma kan frustan, srefi den sma di no kisi furu skoroleri. So wan takiman e waka baka Yehovah, fu di a e sori taki a e hori „a mofinawan” na prakseri (Yob 34:19). Efu a takiman feni taki a de fanowdu fu gebroiki wan wortu di furu sma no sabi, dan a musu taki wan tu tra makriki sani tu di e meki den arkiman frustan san a wortu dati wani taki.

Efu yu gebroiki wortu di de makriki fu frustan, dan yu sa man taki sani di abi furu krakti tapu trawan. Te yu e taki sani syatu, dan trawan sa man frustan makriki san yu e taki. Yu kan taki wan tu sani pikinso moro langa tu, so taki a no e gersi leki yu no e taki grati. Ma efu yu wani taki yu arkiman musu memre wan tu spesrutu sani, dan a moro bun fu gebroiki wortu di no muilek fu frustan èn fu taki sani syatu.

Gebroiki difrenti wortu, ma taki den wortu soifri soleki fa den musu taki. Furu bun wortu de di yu kan gebroiki te yu e taki. Na presi fu taki den srefi wortu ibri leisi baka, dan pruberi fu gebroiki tra wortu tu. Te yu e du dati, dan yu sa hari a prakseri fu sma èn den sani di yu e taki sa abi winimarki gi den. Fa yu kan kon sabi moro wortu fu taki?

Te yu e leisi, dan poti wan strepi na ondro ibri wortu di yu no e frustan so bun, èn suku den wortu dati na ini wan wortubuku efu dati de fu kisi na ini a tongo fu yu. Teki wan tu fu den wortu disi di yu no ben sabi, èn meki muiti trutru fu gebroiki den te a fiti fu taki den. Luku bun dati yu e taki den wortu disi soifri leki fa den musu taki. Gebroiki den na okasi pe ala sma sa frustan krin san yu e taki, èn no fu di yu wani taki sma musu poti prakseri na yu. Te yu e leri sabi moro wortu, dan yu sa man gebroiki moro wortu tu te yu e taki. Ma toku yu musu luku bun nanga wan sani. Te wan sma no e taki wortu soifri leki fa den musu taki, noso te a no e gebroiki den bun, dan trawan kan denki taki a no sabi srefisrefi san a e taki.

Wi wani kon sabi moro wortu fu di wi wani gi leri, no fu di wi wani prei kefalek gi den sma di e arki wi. Efu wan takiman e gebroiki muilek wortu èn wortu di langa tumusi, dan den arkiman sa poti prakseri na a takiman nomo, na presi fu den arki san a e taki. A sani di wi wani du trutru, na fu taigi den sma sani di warti èn di switi gi den fu arki. Memre na odo fu Bijbel: „A tongo fu den koniwan sabi heri bun san a musu taki” (Odo 15:2). Efu wi e gebroiki bun wortu, wortu di fiti èn di sma e frustan makriki, dan dati sa meki taki wi e taki switi èn wi sa gi sma deki-ati te wi e taki; wi no sa taki na wan soi fasi di no e hari den prakseri.

Te yu e leri sabi moro wortu, dan sorgu taki yu e gebroiki den yoisti wortu te yu e taki. A kan, taki tu wortu wani taki a srefi sani, ma toku den kan difrenti pikinso te yu e gebroiki den na ini difrenti situwâsi. Efu yu e frustan disi bun, dan yu sa man taki sani moro krin èn yu no sa taki sani di sa hati yu arkiman. Arki bun te sma di e taki bun, e taki. Wan tu wortubuku e sori difrenti wortu di wani taki a srefi sani (fu eksempre den wortu „prisiri” nanga „breiti” wani taki a srefi sani). Den abi sosrefi wortu di wani taki tu difrenti sortu sani (fu eksempre den wortu „blaka” nanga „weti” e difrenti krinkrin fu makandra). Na so fasi yu e feni difrenti fasi fa yu kan taki a srefi sani. Boiti dati, yu e feni tra wortu tu di yu kan gebroiki te wan sani de pikinso tra fasi. Disi kan yepi yu heri bun te yu e suku a yoisti wortu gi wan spesrutu situwâsi. Bifo yu e gebroiki wan wortu di yu no ben sabi ete, dan sorgu taki yu sabi san a wortu dati wani taki, fa yu musu taki en soifri, èn o ten yu musu gebroiki en.

Te yu e gebroiki wortu di e taki sani soleki fa den de, na presi fu gebroiki wortu di e taki sani frafra, dan sma sa frustan moro krin san yu wani taki. Fu eksempre, wan takiman kan taki: „Na a ten dati, furu sma kon siki.” Ma a takiman kan taki tu: „Baka a Fosi Grontapufeti, dan na ini wan tu mun nomo, sowan 21.000.000 sma dede fu wan siki di den e kari Spanyoro agrabu (Spaanse griep).” Fu tru, yu kan si o bigi a difrenti de te a takiman e taki krin san na „a ten dati”, san na den „furu sma”, èn san na a siki di „sma kon siki”! Te yu wani taki na so wan fasi, dan yu musu kon sabi den trutru tori di abi fu du nanga a tori di yu e taki, èn yu musu luku bun tu sortu wortu yu o gebroiki.

Te yu e gebroiki den yoisti wortu, dan dati kan de wan yepi gi yu tu fu meki sma frustan wantewante san yu e taki, sondro taki yu e gebroiki tumusi furu wortu. Na a tra sei, te a tori fu yu langabere, dan dati e meki en moro muilek gi wan sma fu frustan san yu wani taki. Te yu e taki sani makriki, dan trawan kan frustan moro esi san yu e taki èn den sa memre moro bun sortu prenspari sani yu ben taki. Te yu e taki na so wan fasi, dan yu e yepi trawan fu kon sabi sani soifri. A leri fu Yesus Krestes ben bun kefalek, fu di a ben gebroiki wortu di furu sma ben frustan. Leri fu na eksempre di Yesus gi. (Luku den eksempre di skrifi na Mateyus 5:3-12 nanga Markus 10:17-21.) Pruberi fu gebroiki den yoisti wortu fu taki san yu abi na prakseri, sondro taki yu e gebroiki tumusi furu wortu.

Wortu di e taki sani na wan krakti fasi, di e sori firi, èn di e sori fa wan sani moi. Te yu e leri sabi moro wortu, dan no si den leki nyun wortu nomo, ma si den sosrefi leki wortu di e tyari wan spesrutu sani kon na fesi. Fu eksempre, poti prakseri na wortu di e meki yu taki sani na wan krakti fasi, noso wortu di e meki yu taki sani na wan moi fasi. Noso luku den wortu di e sori firi, soleki wortu di e meki sma firi switi, noso di e meki sma firi taki na wan seryusu tori.

Bijbel lai nanga den sortu wortu dati. Nanga yepi fu a profeiti Amos, Yehovah ben gi a deki-ati: „Suku san bun, èn no suku san takru . . . De teige den sani di takru, èn lobi san bun” (Amos 5:14, 15). A profeiti Samuel ben taigi Kownu Saul: „Yehovah priti a kownukondre fu Israel puru fu yu tide” (1 Sam. 15:28). Di Yehovah ben taki nanga Esekièl, dan a ben taki wortu di wan sma no man frigiti so esi. A ben taki: „Ala den sma fu na oso fu Israel kon tranga-ede èn den ati kon tranga” (Esek. 3:7). Yehovah ben poti krakti tapu a bigi fowtu di Israel meki, di a aksi den: „Wan libisma sa fufuru Gado? Ma unu e fufuru fu mi” (Mal. 3:8). Di Danièl ben fruteri fu wan tesi di den ben kisi tapu den bribi na ini Babilon, dan a ben fruteri na wan moi fasi taki „Nebukadnesar srefi ben kon furu nanga atibron”, fu di Sadrak, Meisak nanga Abedneikow no ben wani anbegi a popki fu Nebukadnesar. Dati meki a ben gi a komando meki den sma fu en tai den dri man disi èn trowe den na ini „a bun faya onfu”. Danièl e yepi wi fu frustan o faya na onfu ben de, di a skrifi taki a kownu ben taigi den man fu en fu „faya na onfu seibi tron moro leki fa den ben gwenti fu faya en”. Na onfu ben faya so kefalek taki a faya kiri den man fu a kownu di ben kon krosibei fu na onfu (Dan. 3:19-22). Di Yesus ben taki nanga den sma fu Yerusalem wan tu dei fosi a dede, dan a ben taki nanga furu firi: „Omeni leisi mi ben wani tyari den pikin fu yu kon na makandra, neleki fa wan umafowru e tyari den pikin fu en kon na makandra na ondro den frei fu en! Ma unu no ben wani. Luku! Gado o gowe libi na oso gi unu.”​—Mat. 23:37, 38.

Te yu e gebroiki den yoisti wortu, dan dati sa yepi yu fu taki sani di yu arkiman sa man memre wan langa ten ete. Efu yu e gebroiki wortu di e hari a prakseri fu yu arkiman, dan den sa man „si” èn „firi” den sani fu san yu e taki, den sa „tesi” èn „smeri’ a nyanyan di yu e taki fu en, èn den sa „yere” a babari fu san yu e taki nanga a sten fu den sma fu san yu e taki. Den arkiman sa wani arki nomonomo san yu abi fu taki, fu di yu yepi den firi leki densrefi de na ini a tori.

Wortu di e tyari sani kon abra na wan krakti fasi, kan meki sma lafu noso kan meki den krei. Den kan gi sma howpu, den kan yepi wan sma di lasi-ati kisi a firi baka taki a wani tan na libi, èn den kan meki wan sma kisi furu lobi gi en Mekiman. Sma na heri grontapu kisi howpu fu wortu di naki den ati trutru èn di skrifi na ini den bijbeltekst soleki Psalm 37:10, 11, 34; Yohanes 3:16; nanga Openbaring 21:4, 5.

Te yu e leisi Bijbel nanga den buku fa „a getrow èn koni srafu”, dan yu sa si furu difrenti wortu (Mat. 24:45). No leisi den wortu nomo, èn baka dati no frigiti den tu. Ma teki den wortu di yu feni moi èn gebroiki den te yu e taki.

Taki sani soifri soleki fa yu musu taki den na ini a tongo fu yu. Wan tu sma e si dati den no e taki a tongo soifri leki fa den musu taki en. Ma san den kan du dan?

Efu yu e go na skoro ete, dan teki na okasi fu leri fa yu musu gebroiki a tongo di yu e taki èn luku fa yu musu gebroiki den wortu na ini a tongo dati. Efu yu no de seiker fa wan spesrutu sani e taki na ini a tongo fu yu, dan aksi a skoromeester fu yu fa a musu de. No go leri den sani fu a tongo di yu e taki, nomo fu kaba nanga skoro. Yu abi wan sani di e pusu yu, di tra studenti no abi kande. Yu wani de wan bun preikiman fu a bun nyunsu.

Ma san yu kan du efu yu moro owru èn yu e taki wan tra tongo now di yu no ben taki di yu ben gro kon bigi? Noso kande yu no ben kisi furu skoroleri na ini yu eigi tongo. No lasi-ati. Na presi fu dati, du muiti fu leri a tongo moro bun, èn du dati fu di yu wani preiki a bun nyunsu moro bun. Wi e leri furu sani fu a fasi fa wan tongo seti te wi e arki fa trawan e taki a tongo dati. Sobun, arki heri bun te bun takiman e hori wan lezing. Te yu e leisi Bijbel nanga buku di e yepi wi frustan Bijbel, dan luku a fasi fa wortu skrifi, sortu wortu e go makandra, èn luku o ten den e gebroiki den wortu. Pruberi fu taki soifri soleki fa den bun eksempre disi e sori yu.

Pôpi man nanga pôpi singiman kan gebroiki wortu di no e kruderi nanga fasi fa a tongo musu taki trutru. Libisma abi a gwenti fu teki den wortu disi abra fu den pôpi sma disi. Sma de di e seri drugs èn sma di e libi leki ogriman èn leki huruman. Furu tron den sma disi abi den eigi wortu di den e gebroiki, èn den wortu dati wani taki heri tra sani leki san sma gwenti yere. A no de wan koni sani gi wan Kresten fu teki den sani disi abra fu den sma disi. Efu wi ben o du dati, dan trawan ben kan denki taki wi de neleki den sma disi fu a grontapu èn taki wi e libi na so wan fasi tu.​—Yoh. 17:16.

Teki a gwenti fu gebroiki bun wortu te yu e taki ibri dei. Efu yu no e span nanga den wortu di yu e gebroiki te yu e taki, dan yu no musu fruwakti taki yu sa man taki bun te yu musu taki na spesrutu okasi. Ma efu ala dei yu e gebroiki bun wortu te yu e taki, dan a sa de makriki gi yu èn yu sa de yusrefi te yu musu taki na tapu a podium noso te yu musu preiki gi wan tra sma.