Sori lespeki gi tra sma

DEN Buku fu Bijbel e taigi wi fu „gi grani na ala sortu sma” èn fu no „taki ogri fu nowan sma” (1 Petr. 2:17; Tit. 3:2). Fu tru, ibri libisma di wi e miti, na wan ’libisma di Gado meki leki wan sma di gersi en’ (Yak. 3:9). Ibri sma na wan sma gi suma Krestes dede (Yoh. 3:16). Èn ala sma musu yere a bun nyunsu, so taki den kan du san a bun nyunsu e taki èn so taki den kan kisi frulusu (2 Petr. 3:9). Wan tu sma abi makti noso den man du sani heri bun, èn dati e meki taki trawan musu gi den spesrutu grani.

Bijbel e taki dati wi musu sori lespeki gi trawan. Dan fu san ede wan tu sma feni taki den no abi fu sori a lespeki disi? A kan taki a kulturu pe den de, e taigi den, suma na den sma di musu kisi grani. Dati kan abi fu du nanga a grupu pe a sma de, a kloru fu en skin, efu en na wan mansma noso wan umasma, o gosontu a de, o owru a sma de, o gudu a sma de, noso sortu presi a abi na ini a libimakandra. Fu di krukafasi de na ala sei na mindri heihei lantiman, meki furu sma lasi lespeki gi tirimakti. Na ini wan tu kondre, sma no de tevrede kwetikweti nanga a libi fu den, fu di kande den musu wroko someni yuru wan dei soso fu man bai san den abi fanowdu fu tan na libi. Boiti dati, den e libi na mindri sma di no abi lespeki gi trawan kwetikweti. Yonguwan e kisi fu du nanga tra yongusma di e hari den fu opo densrefi teige skoromeester noso skoromisi di den no lobi, èn fu opo densrefi teige tra sma di abi makti. Furu fu den e si tapu telefisi fa tra pikin e du san den wani nanga den papa nanga den mama èn fa den e basi den, èn disi abi krakti tapu den. Wi musu meki bun furu muiti fu no meki den denki disi fu grontapu, meki wi lasi lespeki gi trawan. Te wi e gi sma grani, dan disi e meki taki wi sa man taki moro bun nanga den fu den sani di wi e denki.

Sori lespeki te yu e waka miti wan sma. Furu sma e fruwakti fu wan sma di e du kerkiwroko, taki a musu sori lespeki nanga a fasi fa a e weri krosi èn nanga a fasi fa a e du sani. Na ala presi libisma abi den eigi denki fu sani di fiti fu weri noso di fiti fu du. Wan tu sma e feni taki yu no abi lespeki gi wan sma te yu e waka miti en nanga wan ati na tapu yu ede, noso nanga yu anu na ini yu saka. Ma na tra presi baka, den sma no e si dati so. Yu musu hori na prakseri fa den sma e denki fu den tori disi na ini a kontren pe yu e libi, so taki yu no du wan sani di e meki den firi leki yu no abi lespeki gi den. Efu yu sa du dati, dan yu sa man wai pasi gi problema di kan meki taki yu no sa man preiki a bun nyunsu bun.

A srefi sani wi kan taki tu fu a fasi fa wi e taki nanga tra sma, spesrutu sma di moro owru leki wi. Na furu presi, sma e feni taki wan yonguwan no abi maniri te a e kari wan bigisma na en nen, boiti efu a bigisma gi a yonguwan primisi fu du so. Na wan tu presi, dan srefi den bigisma no musu kari sma di den no sabi, na den nen. Na ini furu tongo, sma e gebroiki a wortu „yu” na so wan fasi, taki a e sori go na tu, noso moro sma. A srefi wortu disi noso wan tra wortu, den e gebroiki fu sori lespeki gi wan sma di owru moro den, noso gi wan sma di abi makti.

Sori lespeki te yu e miti nanga trawan. Na ini pikin libimakandra, sma e fruwakti fu yu dati yu e sori lespeki te yu e miti nanga wan trawan. Dati kan de te yu e waka na pasi, noso te yu e go na ini wan oso. Disi yu kan du fu di yu e taki a sma odi, yu e lafu pikinso nanga a sma, yu e boigi yu ede pikinso gi a sma, noso yu kan sori dati nanga yu fesi srefi. Efu yu du neleki yu no si a sma, dan den e si dati leki yu no abi maniri.

Toku wan tu sma kan firi taki yu du neleki yu no si den, awansi yu taki den odi kaba. Fa dati kan? Fu di den kan si krin taki yu no si den leki wan trutru sma. Sontron, son sma e si sikisma heri tra fasi leki fa den e si gosontu sma. Furu tron trawan e wai pasi gi malengri sma, noso sma nanga wan tra siki. Toku, Gado Wortu e sori wi fa wi musu lobi nanga lespeki den sortu sma disi (Mat. 8:2, 3). Na a wan noso tra fasi, wi alamala e firi den bakapisi fu a sondu di wi kisi fu Adam. Yu ben sa firi taki trawan e lespeki yu efu ala ten den ben o taki fu den fowtu fu yu? Yu no ben sa feni en moro bun efu sma sabi yu fu den furu bun fasi di yu abi?

Fu sori lespeki, wani taki tu dati wi musu lespeki wan sma di de wan edeman. Na wan tu presi wan sma musu taki fosi nanga na edeman fu na oso, bifo a kan preiki gi tra sma fu na osofamiri. Aladi na Yehovah gi wi a komando fu preiki èn fu leri sma, toku wi sabi taki Gado wani taki papa nanga mama musu leri den pikin fu den èn den musu gi den trangaleri (Ef. 6:1-4). Fu dati ede, te wi e taki nanga sma na den oso, dan furu tron a fiti fu taki fosi nanga den papa nanga mama bifo wi abi wan langa takimakandra nanga den pikin.

Te sma e kon moro owru, dan den e kisi moro ondrofeni na ini a libi, èn fu dati ede wi musu lespeki den (Yob 32:6, 7). Wan yongu pionier sisa na ini Sri Lanka ben sabi disi, dati meki a ben kan taki bun nanga wan owru man. Na ini a bigin na owru man no ben wani taki nanga en, di a taigi a sisa: „Fa wan yongu sma leki yu, kan leri mi san Bijbel e taki?” Ma a yongu sisa piki en: „Fu taki en leti, mi no kon fu leri yu, ma mi kon fu prati wan sani nanga yu di mi leri, èn di meki mi so koloku taki mi musu fruteri trawan.” A lespeki fasi fa a sisa ben piki en, meki taki na owru man ben wani arki a sisa. Ne a aksi a sisa: „Dan taigi mi, san yu leri dan?” A sisa piki en: „Mi leri fa fu libi fu têgo.” Na owru man bigin studeri Bijbel nanga Yehovah Kotoigi. A no ala owru sma sa taigi yu taki yu musu sori lespeki gi den, ma furu fu den sa warderi en efu yu e du dati.

Ma toku, a kan pasa taki wi e go tumusi fara te wi e sori lespeki gi trawan. Na tapu den èilanti fu a Stille Zuidzee èn na tra presi, dan a hori di den Kotoigi e hori densrefi na den gwenti fu sori lespeki gi den basya nanga den kapten fu den dorpu, kan gi den Kotoigi na okasi fu taki nanga den, ma sosrefi nanga den sma di e tan na ini den dorpu. Toku, a no de fanowdu fu taki switi wortu soso fu meki trawan denki taki den de prenspari, èn dati no de wan bun sani tu (Odo 29:5). Na a srefi fasi, wan tongo kan abi wortu di de fu sori lespeki gi spesrutu sma. Ma te wan Kresten e sori lespeki, dan dati no wani taki dati a musu gebroiki den wortu disi tumusi furu.

Taki na wan lespeki fasi. Bijbel e gi wi deki-ati fu taki fu san ede wi abi howpu, ma fu du dati „na wan safri fasi èn nanga bigi lespeki” (1 Petr. 3:15). Sobun, kande wi e si wantewante taki wan sma e denki na wan fowtu fasi fu wan sani. Wi kan sori en wantewante tapu en fowtu na wan fasi pe wi no e sori lespeki moro gi a sma. Ma yu denki taki dati ben sa de wan koni sani fu du? Yu no denki taki a ben o moro bun fu arki nanga pasensi? Kande wi kan aksi a sma fu san ede a e firi so, èn dan wi musu hori na prakseri fa a e firi te wi e fruteri en san Bijbel e taki.

A srefi lespeki di wi e sori te wi e taki nanga wán sma, wi musu sori tu te wi e taki komoto fu a podium nanga wan grupu arkiman. Wan takiman di e lespeki den arkiman fu en, no sa taki hati sani fu sori den arkiman tapu den fowtu, èn sosrefi a no sa meki den firi taki den no wani meki muiti fu du san a e leri den. Efu wan takiman ben o taki na so wan fasi, dan a ben o meki trawan lasi-ati. Fu tru, a moro bun fu si den arkiman leki sma di kon makandra fu di den lobi Yehovah èn fu di den wani dini en! Neleki Yesus, wi musu sori taki wi e frustan trawan di kande swaki na yeye fasi, di no abi so furu ondrofeni, noso di no man fiti Bijbel rai so gaw.

Den arkiman sa firi taki a takiman e lespeki den efu a e sori taki ensrefi musu fiti den rai fu Gado Wortu moro bun tu. Dati meki a de wan koni sani efu a takiman no e gebroiki a wortu „yu” dorodoro te a e sori den arkiman fa fu gebroiki den bijbeltekst. Luku fu eksempre a difrenti na mindri na aksi disi „Yu e du ala san yu man?”, èn na aksi disi: „Ibriwan fu wi musu aksi ensrefi: ’Mi e du ala san mi man?’” A sani di a takiman wani sori nanga den tu aksi disi na a srefi, ma a fosi aksi e sori taki a takiman e poti ensrefi moro hei leki den arkiman. A tra aksi e gi ala sma deki-ati, sosrefi a takiman, fu ondrosuku den eigi situwâsi èn fu kon sabi fu san ede den e du sani.

No pruberi fu taki lafutori soso fu meki den arkiman lafu. Disi kan meki sma denki taki a boskopu fu Bijbel no warti so. A tru taki wi musu prisiri na ini wi diniwroko gi Gado. A kan srefi taki wan tu sani di wi musu taki, sa meki trawan lafu. Ma toku, efu wan takiman e meki wan seryusu tori kon tron wan lafutori, dan dati e sori taki a no abi lespeki gi den arkiman èn gi Gado.

Meki a de so taki den sani di wi e du te wi e waka miti wan sma, a fasi fa wi e tyari wisrefi, èn a fasi fa wi e taki, ala ten e sori taki wi e si trawan leki fa Yehovah leri wi fu si den.