Meki den arkiman firi taki den kisi deki-ati nanga krakti

AWANSI sortu problema e miti den futuboi fu Gado, toku den sa musu man feni deki-ati na ini a Kresten gemeente. Fu dati ede, spesrutu den owruman musu sorgu taki den e gi deki-ati te den e hori den lezing èn te den e gi rai. Den owruman musu sori taki den de „leki wan kibripresi gi a winti èn wan kibripresi gi a sibibusi, leki watra di e lon na ini wan kondre sondro watra, leki a kowrupe fu wan bigi klepston di tanapu leti-opo na ini wan kondre di drei”.​—Yes. 32:2.

Efu yu na wan owruman, yu denki dan taki den lezing fu yu e gi trawan deki-ati èn e trowstu den? Den lezing fu yu e tranga den wan di e du muiti fu dini Yehovah getrow? Den e gi sma krakti fu tan du a wani fu Gado, awansi furu sma no e span nanga den, noso e gens den? San yu kan du te wan tu fu yu arkiman brokosaka? San yu kan du te wan tu fu den e pina fu di a hebi gi den na moni sei? San yu kan du te wan tu fu den e feti nanga wan seryusu siki di datra no man dresi? Wan sani di yu kan du, na taki yu kan ’tranga den brada nanga sisa fu yu nanga den wortu fu yu mofo’.​—Yob 16:5.

Gebroiki na okasi di yu abi leki takiman fu yepi yu brada kisi howpu nanga krakti fu Yehovah èn fu den sani di A seti gi wi.​—Rom. 15:13; Ef. 6:10.

Memre yu arkiman na den sani di Yehovah du kaba. Wan prenspari fasi fu gi trawan trutru deki-ati, na fu sori den fa Yehovah yepi en pipel fositen fu pasa muilek ten.​—Rom. 15:4.

Yehovah ben taigi Moses fu gi Yosua „deki-ati” nanga „krakti” bifo Israel ben o go na ini a Pramisi Kondre, wan kondre di ben de na ini na anu fu den feanti fu Israel na a ten dati. Fa Moses ben gi Yosua „deki-ati” nanga „krakti”? Moses ben memre Yosua makandra nanga a heri pipel san Yehovah du gi den di den ben lowe komoto fu Egepte (Deut. 3:28; 7:18). Moses ben fruteri sosrefi fa Yehovah yepi den fu wini den feti teige den Amorietsma. Baka dati, dan Moses taigi Yosua: „Abi deki-ati èn de tranga” (Deut. 31:1-8). Na dati yu e du tu? Te yu e suku fu gi yu brada deki-ati, dan yu e yepi den fu kisi krakti fu di yu e memre den san Yehovah du kaba gi den?

Sontron, wan tu sma e si soso den problema di den abi, èn fu dati ede den e aksi densrefi efu oiti den sa kisi den blesi fu a Kownukondre. Memre den taki den kan frutrow tapu den pramisi fu Yehovah.​—Yos. 23:14.

Na ini wan tu kondre, den brada fu wi e kisi fu du nanga wet fu lanti tiriman di e taki dati den no mag preiki a bun nyunsu. Efu dati de so, dan lobi-ati owruman kan yepi den tra brada nanga sisa fu den fu kisi krakti, fu di den owruman e sori den san ben miti den apostel fu Yesus Krestes (Tori. 4:1–5:42). Seiker den brada sa kisi deki-ati efu den owruman e sori den san skrifi na ini a buku Ester, pe skrifi fa Gado ben sorgu taki sani waka bun nanga a pipel fu en.

Sontron, dan wan tu sma e kon na den gemeente konmakandra, ma den no e go na fesi moro. Kande den e firi taki noiti Gado sa man gi den pardon fu den ogri sani di den du na ini den libi. Kande yu kan fruteri den san Yehovah ben du nanga Kownu Manase (2 Kron. 33:1-16). Noso yu kan fruteri fu den Korentesma fu fositen. Gado ben si den leki regtfardiki sma, baka di den kenki den libi èn tron Kresten.​—1 Kor. 6:9-11.

Wan tu sma e kisi furu problema. A de so taki disi e meki den firi taki Gado no lobi den moro? Yu kan memre den na san ben miti Yob èn fa Yehovah gi en furu blesi bakaten, fu di Yob hori ensrefi na en soifri retifasi (Yob 1:1-22; 10:1; 42:12, 13; Ps. 34:19). Den falsi trowstuman fu Yob, ben taki lei di den ben taigi Yob taki a ben musu de so taki a du wan sondu wan leisi (Yob 4:7, 8; 8:5, 6). Ma Paulus nanga Barnabas ben de tra fasi leki den falsi trowstuman disi, fu di den ben tranga den disipel èn den ben gi den „deki-ati fu tan na ini a bribi”. Den du disi di den taki: „Wi musu pasa furu banawtu fu go na ini a kownukondre fu Gado” (Tori. 14:21, 22). Na a srefi sani yu kan du tu na ini a ten disi. Yu kan tranga den wan di e kisi tesi, fu di yu e sori den taki fu horidoro na ondro banawtu, na wan sani di ala Kresten musu du, èn a de wan sani di warti furu na ini na ai fu Gado.​—Odo 27:11; Mat. 24:13; Rom. 5:3, 4; 2 Tim. 3:12.

Gi yu arkiman deki-ati fu den go sidon prakseri fa Yehovah meki den pramisi fu en kon tru na ini den eigi libi. Kande yu kan memre den na wan tu sani di e sori den san Yehovah du kaba gi den èn fa A du dati, soifri soleki fa a pramisi. Na Psalm 32:8 wi e leisi: „Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu.” Yepi yu arkiman fu memre fa Yehovah gi den rai noso fa A tranga den. Na so fasi yu sa man yepi den fu si fa Yehovah e sorgu den bun tu, èn taki trutru a sa yepi den nanga awansi sortu tesi den e kisi nownowde.​—Yes. 41:10, 13; 1 Petr. 5:7.

Sori taki yu e prisiri nanga den sani di Gado e du nownowde. Te yu wani gi yu brada deki-ati, dan sori den san Yehovah e du nownowde. Efu yu e taki fu den sani disi na wan fasi di e sori taki den e meki yu firi prisiri, dan yu arkiman sa kisi a srefi firi disi na ini den ati.

Sori fa Yehovah e yepi wi nanga den broko-ede fu na aladei libi. Yehovah e sori wi san na a moro bun fasi fu libi (Yes. 30:21). A e sori wi fu san ede sani de soleki ogridu, kruktudu, pôtifasi, siki, nanga dede, èn a e fruteri wi fa a sa puru ala den sani disi. A e sorgu taki wi abi brada nanga sisa di lobi wi. A e gi wi a moi grani fu begi. A e gi wi a grani fu de en Kotoigi. A e opo wi ai gi wi, so taki wi man si taki Krestes poti kaba leki Kownu na ini hemel, èn taki disi na den lasti dei fu na owru grontapu disi di e kon na en kaba heri esi.​—Openb. 12:1-12.

Tra bun sani di Yehovah e gi wi, na den gemeente konmakandra fu wi, nanga den bigi konmakandra. Te yu e taki fu den moi seti disi na wan fasi di e sori taki trutru yu e warderi den, dan yu sa gi trawan deki-ati fu no misi fu kon makandra nanga den brada fu den.​—Hebr. 10:23-25.

Den tori di e sori taki Yehovah e blesi den muiti di wi e du na ini a preikiwroko, na sani di e gi wi krakti tu. Na ini a fosi yarihondro di Paulus nanga Barnabas ben de na pasi fu go na Yerusalem, dan den ’ben meki ala den brada firi prisiri’, fu di den ben fruteri finifini fa tra pipel ben drai den libi (Tori. 15:3). Yusrefi kan meki den brada nanga sisa prisiri, fu di yu e fruteri den ondrofenitori di e gi den deki-ati.

Sma kan kisi deki-ati tu te yu e yepi den fu si o warti a sani de di den e du. Prèise den gi a prati di den abi na a Kresten diniwroko. Prèise den wan di no man du so furu, fu di den kon owru kaba noso fu di den siki, ma di toku e sori taki den e horidoro na wan getrow fasi. Memre den taki Yehovah no e frigiti a lobi di den sori kaba gi a nen fu en (Hebr. 6:10). Te wan sma e sori bribi te a e kisi tesi, dan a bribi dati warti moro ala tra sani di de (1 Petr. 1:6, 7). Sorgu taki ala ten wi brada tan hori disi na prakseri.

Taki nanga firi fu a howpu di de na wi fesi. Ala sma di lobi Gado, kan kisi furu deki-ati te den e prakseri fu den sani di Gado pramisi fu du na ini a ten di e kon. A kan taki furu fu den arkiman fu yu yere den pramisi disi furu tron kaba. Ma te yu e taki nanga furu warderi fu den pramisi disi, dan yu sa meki taki den arkiman si den pramisi disi leki trutru sani. Yu kan meki den firi taki den pramisi disi sa kon tru seiker, èn yu kan meki den de nanga tangi na ati gi den pramisi disi. Yu sa man du den sani disi, te yu e du san yu leri tapu a Theokrasia Diniwroko-skoro.

Yehovah na a moro prenspari Sma pe en pipel kan go fu kisi deki-ati nanga krakti. Toku, yu kan wroko makandra nanga en fu gi trawan deki-ati nanga krakti tu. Te yu e taki nanga a gemeente, dan teki na okasi disi fu gi den a deki-ati nanga a krakti disi.