A Kownukondre preikiwroko​—A bun nyunsu e preiki na heri grontapu

WAN dei te yu no abi fu go na wroko, yu e opo fruku mamanten fu sreka yusrefi gi a preikiwroko. Fu di yu weri pikinso, yu e denki: „A ben o switi efu mi ben man sribi go doro!” Ma dan yu e begi èn toku yu e go. Na ini a preikiwroko yu e wroko nanga wan owru sisa. A switifasi fu en èn a fasi fa a e horidoro e naki yu ati trutru. Te yu e preiki oso fu oso yu e prakseri fa den brada nanga sisa fu yu na heri grontapu e tyari a srefi boskopu, den e gebroiki den srefi buku, èn den e kisi a srefi leri. Bakaten te yu doro na oso, yu e firi taki yu kisi krakti baka. Yu breiti taki yu no tan na oso!

Na ini a ten disi a preikiwroko na a moro prenspari wroko di Kresten musu du na ondro a tiri fu Gado Kownukondre. Yesus ben taki na fesi dati a preikiwroko ben o du na heri grontapu na ini den lasti dei (Mat. 24:14). Fa a profeititori disi kon tru? Na ini Pisi 2 fu a buku disi wi o luku suma e du a preikiwroko, na sortu fasi den e du a wroko disi èn san den e gebroiki fu du a wroko. Nanga yepi fu a preikiwroko milyunmilyun sma na heri grontapu man si taki Gado Kownukondre na wan trutru sani.