Adam nanga Eva no du san Gado taki

Wan dei di Eva ben de en wawan, wan sneki taki nanga en. A sneki aksi en: ’A tru taki un no mag nyan den froktu fu ala den bon?’ Eva taki: ’Wi kan nyan den froktu fu den bon, ma fu wan fu den bon wi no mag nyan. Efu wi nyan a froktu fu a bon dati, wi o dede.’ Dan a sneki taki: ’Un no o dede. Efu un nyan a froktu, unu o kon de leki Gado.’ A sani dati ben tru? Nôno, na wan lei. Ma Eva bribi a lei. O moro a ben e luku a froktu, o moro a ben wani en. Te fu kaba a nyan a froktu èn a gi Adam tu fu nyan. Adam ben sabi taki den ben o dede efu den no arki Gado. Ma toku a nyan a froktu.

A srefi dei dati Yehovah taki nanga Adam nanga Eva. A aksi den fu san ede den no du san a taki. Eva taki dati na a sneki meki a nyan a froktu èn Adam taki dati na Eva gi en a froktu fu nyan. Fu di Adam nanga Eva no gi yesi na Yehovah, meki a poti den na dorosei fu a dyari. Fu sorgu taki Adam nanga Eva no drai go baka na ini a dyari, Yehovah poti engel na a mofodoro fu a dyari èn wan feti-owru di ben abi faya.

Yehovah ben taki dati a ben o strafu a sma di ben fruteri Eva a lei. A no a sneki ben taki nanga Eva. Yehovah no ben meki sneki fu taki. Na wan ogri engel meki a sneki taki. A du dati fu kori Eva. Bijbel e kari na engel dati Satan Didibri. Na ini a ten di e kon, Yehovah o kiri Satan. Dan noiti moro a o man kori sma fu du ogri.