Gado Wortoe abi libi
Gado wani dati wi sabi en nen
Joe ben tanapoe pikinso èn prakseri dati Gado abi wan nen? Jezus di joe e si djaso, e begi nanga en discipel èn e taki na Gado: „Mi meki joe nen bekenti na den èn mi sa meki en bekenti” (Joh. 17:26). A no moe de wan froewondroe sani gi wi dati Gado abi wan nen. Ibriwan sma abi wan nen èn sosrefi toe Gado égi Manpikin Jezus. — Luk. 1:30-32.
Libisma wani so te foe den kari den na den nen èn sosrefi toe Gado wani dati sma sabi en nen. Foe dat’ede meki a ben meki na Psalm-singiman foe na bijbel skrifi na ondro krakti foe santa jeje: „Sodati den sa sabi dati joe di nen Jehovah, joe wawan de na Moro Héwan foe na heri grontapoe (Ps. 83:18). Langa ten psa kaba Gado ben meki na Man Mozes si o prenspari en nen ben de.
Wan dé, di Mozes ben e doe en wroko foe tjari skapoe na ini Midian leki wan herder, a ben si wan froewondroe sani. A ben de wan boes’boesi di ben de nanga faja. Ma na boes’boesi no ben bron. Di a ben kon moro krosbé foe a ben kan loekoe moro boen soleki joe kan si dja dan na mindri foe na boes’boesi di ben e bron wan sten ben de foe jere di ben taki: „Mozes! Mozes!”
A ben de Gado di ben e taki. A ben wani dati Mozes ben go na Farao na kownoe foe Egypte èn dati a ben sa tjari en pipel komoto foe na kondre. Ma Mozes ben taigi Gado: „Kon wi taki dati mi ben go now na den man foe Israël èn dati mi taki troetroe gi den taki: ’Na Gado foe joe fosten tata ben seni mi kon na oenoe’, èn troetroe den taki gi mi taki: ’San na en nen?’ San mi sa taki dan?” Gado ben komanderi Mozes foe taki gi den: „Jehovah na Gado foe oen fositen tata, . . . ben seni mi kon na oenoe.” — Ex. 3:1-15.
Ma di Mozes ben go a Egypte foe taki nanga Farao dan den Egypte sma ben prakseri dati Jehovah ben de noti moro leki wan soso gado foe den manpikin foe Israël di no wani taki noti. Den ben no e bribi dati en ben de na Gado foe heri grontapoe (Ex. 5:2). Foe dat’ede meki Jehovah ben meki Mozes taigi Farao dati „a ben sa meki en nen bekenti na a heri grontapoe” (Ex. 9:16). Joe sabi fa Jehovah ben doe dati na ini a ten dati?
Jehovah ben meki Mozes tjari den Israëlsma komoto foe Egypte, ma den Egyptesma ben lon na den baka. Di den ben kon na a Redi Se, dan a ben gersi dati no wan enkri fasi ben de foe lon komoto foe den Egyptesma di ben de a den baka. Ma dan Jehovah ben meki Mozes langa en tiki na abra na watra èn na watra ben prati ensrefi na ini toe sodati den Israëlsma di e lowe ben kan waka abra drégron go na abrasé. Baka dati Jehovah ben meki Mozes langa en tiki baka soleki joe kan si dja èn na watra ben fadon kon na tapoe den Egyptesma sodati den alamala ben dede na watra. Na njoensoe foe na bigi sani disi di psa ben panja ensrefi go na alasé sodati den folkoe foe na alape ben leri sabi Gado nen. — Ex. 14:21-31; Joz. 2:9-11.
Èn fa a de na ini a ten disi? Gado wani te now ete dati en nen moe meki bekenti na a heri grontapoe? Ija, foe troe. Èn a de wan toemsi prenspari sani dati sma ini a ten disi kon sabi Jehovah èn dini en. Noso, neleki tranga-ede Egyptesma di ben wégri foe sabi Jehovah, den sa kisi pori te Masra Jezus sori ensrefi komoto foe hemel . . . te a e teki refensi abra den di no sabi Gado.” — 2 Thess. 1:7-9.