Gado Wortoe abi libi
Tégo libi — Pe den sa kisi en?
Jezus e taki dja gi en discipel: „Na ini na oso foe mi Tata foeroe presi de. . . . Mi e go drape foe sreka wan presi gi oenoe. Èn te mi go drape èn mi sreka na presi gi oenoe, dan mi e kon baka èn sa teki oenoe na mi oso.” — Johannes 14:2, 3.
Hemel ben de na oso foe Jezus. Gado ben seni en komoto foe drape kon na grontapoe. Now Jezus pramisi en apostel taki den ben sa teki poti ini en oso foe den e libi na en ini hemel. Ma san Jezus nanga en discipel sa doe na ini hemel?
Wi sabi dati Gado ben teki Jezus leki kownoe foe wi kownoekondre. Ma tra sma sa de mede-tiriman nanga Kristus na ini Gado hemel tiri. „Mi e meki wan njoen verbontoe nanga oenoe,” Jezus ben taki gi en apostel, „neleki mi Tata ben meki wan verbontoe nanga mi, foe wan kownoekondre” (Lukas 22:29). Paulus nanga Timotéus ben sa de mindri den tiriman dati nanga Kristus. Foe na réde dati meki Paulus ben skrifi Timotéus: „Efoe wi e tan hori doro, dan wi sa tiri ooktoe makandra leki kownoe.” — 2 Timotéus 2:12.
Ma soema sa de den grontapoe onderdaan foe Gado kownoekondre? Na man di ben dopoe en ben de en neef, Johannes na Dopoeman. Jezus ben taki foe en: „A mindri den di mama ben meki, no wan moro bigiwan ben gebore leki Johannes na Dopoeman.” Foe di a sreka na pasi getrow gi Kristus èn tjari srefi den sma kon na wan di bakaten ben sa tron Jezus fosi discipel, Johannes ben sori troe taki a de bigi. Tokoe Jezus ben taki foe en: „A sma di de wan mendri wan na ini na kownoekondre foe hemel de moro bigi leki en” (Mattéus 11:11). Johannes soboen no sa de a mindri den sma di e go na hemel foe tiri makandra nanga Kristus. A sa de a mindri den foeroe grontapoe onderdaan foe na kownoekondre.
A bijbel e sori taki soso wan skotoe nomroe foe sma, wan „pikin ipi” sa go na hemel foe de kownoe makandra nanga Kristus. A bijbel e ferteri taki a nomroe te foe kaba sa de 144.000. A tra pisi foe den getrow wan foe libisma sa libi leki den onderdaan foe den tiriman na grontapoe. — Lukas 12:32; Openbaring 14:1, 3.
Na ondro na regtvaardiki tiri foe Gado kownoekondre na grontapoe sa tron wan paradijs, soleki Gado ben abi na prakseri di biginbigin a ben poti Adam nanga Eva na ini na paradijs foe Eden. Dan na bijbel pramisi sa kon troe: „Den regtvaardikiwan sa abi na grontapoe, èn den sa tan foe tégo na tapoe.” — Psalm 37:29.