1 Loekoe! Wan kownoe sa tiri gi soso regtvaardikifasi, èn foe taki foe granman, den sa tiri leki granman foe soso geregtigheid. 2 Dan ibriwan moe de leki wan kibripresi gi alen, leki watra fonten na ini wan kondre sondro watra, leki wan kowroe foe wan hebi, let’opoe stonbergi na ini wan dré kondre.
3 Èn den ai foe den sma di e si no sa plak tapoe, èn srefi den jesi foe den sma di e jere sa arki boen. 4 Èn srefi na ati foe den sma di gaw foe doe sani sondro foe prakseri fosi sa poti prakseri na tapoe sabi, èn srefi na tongo foe den wan di e gagoe sa kon koni na ini a teki foe krin sani. 5 Na lawman den no se kari moro langa wan sma di lobi foe gi trawan sani; èn foe taki foe na man di e libi sondro gronprakseri, foe en den no sa taki dati a de boen; 6 bika na lawman sa taki foe en sé soso law sani, èn en ati srefi sa wroko tapoe san de takroe, foe wroko na a fadon komoto foe sma foe (na troe) bribi èn foe taki tége Jehovah san de law sani, foe meki na sma, di abi angri kon de légi, èn a de meki a sma di abi dréwatra de srefi sondro dringi. 7 Foe taki foe na man di e libi sondro gronprakseri, den wrokosani foe en de takroe; ensrefi ben gi rai ini a tori foe loesoefasi-foe-libi, foe trowe den mofinawan go na ini ongolokoe nanga jepi foe léwortoe, srefi te wan pótisma e taki san de reti.