Jezus en libi nanga diniwroko

A ben de nanga bere ma a no ben trow

MARIA de na ini na di foe dri moen nanga bere. Joe kan memre ete dati na a bigin foe na bere foe en a ben de na fisiti na Elisabeth, ma now a ben drai go baka na oso na ini Nazareth. Heri esi na toestand foe en ala sma sa kon sabi na ini a presi pe a e libi. A e broko en ede toemsi foe na situwasi!

San e meki na situwasi de moro ogri, de dati Maria ben meki mofo foe trow nanga na temreman Jozef. Èn Maria sabi dati na ondro na wet di Gado ben gi na Israël, wan oema di ben meki mofo nanga wan man foe trow ma nanga en fri wani ben libi nanga wan tra man den ben moe ston en kiri. Fa a moe ferteri Jozef dati a de nanga bere?

Foe di Maria ben gwe dri moen, meki wi kan de séker dati Jozef ben wani foe si en sote. Te den e miti makandra, Maria e ferteri en kande voorzichtig na njoensoe. Kande a e proberi foe ferklari taki a de nanga bere nanga jepi foe na santa jeje foe Gado. Ma joe kan tjari kon ini prakseri dati Jozef e feni en wan moeilek sani.

Jozef sabi na heri boen libi nanga waka foe Maria, èn a de krin dati a lobi en sref’srefi. Ma san a mag foe taki ooktoe, a gersi troetroe dati a de nanga bere foe wan tra man. Fa a kan de ooktoe, Jozef no wani taki den ston èn kiri ofoe na publiki gi en sjen. Foe dat’meki a e teki a bosroiti foe prati nanga en na kibrifasi. Na ini a ten dati wan paar di ben meki mofo foe trow den ben si den leki den trow èn wan officiële prati ben de fanowdoe foe broko na mofo.

Bakaten ala di Jozef ben de ete e prakseri, a e fadon ini sribi. Jehovah engel e sori ensrefi na en na ini wan dren èn e taki: ’No frede foe teki Maria joe wefi go na oso, bika a de nanga bere foe Gado santa jeje. Èn joe moe kari a pikin Jezus, foe di a sa ferloesoe en pipel foe den sondoe.’

Fa Jozef de tangi te a e wiki! Wantewante a e opo doe wan sani èn a e doe precies san a engel ben taki. A e teki Maria go na en oso. Na sani disi na publiki te joe loekoe en boen wani taki wan trow plechtigheid, nanga san den e sori dati Jozef nanga Maria trow now officieel. Ma Jozef no e abi seks nanga Maria solanga a de nanga bere foe Jezus.

Loekoe! Maria bere bigi sref’srefi, ma Jozef e poti en tapoe wan boeriki! Pe den e go èn foe san-ede den e go na reis efoe Maria ibri momenti kan kisi na pikin? Lukas 1:39-41, 56; Mattéus 1:18-25; Deuteronomium 22:23, 24.

◆ San Jozef ben prakseri di a ben kon sabi dati Maria ben de nanga bere èn foe san-ede?

◆ Fa Jozef ben kan prati foe Maria, foe di den no ben trow ete?

◆ Sortoe doe na publiki ben de leki na trow plechtigheid foe Jozef nanga Maria?