Jezus libi nanga diniwroko

Jezus nanga den astroloog

WANTOE man e komoto foe oostsé. Den de astroloog sma di e taki dati den kan tjari kon na krin san na positsi foe den stari wani taki. Na den oso na oostsé, den ben si wan njoen stari èn hondrohondro kilometer den waka moro fara na baka a stari dati go a Jeruzalem.

Te den astroloog e doro na ini Jeruzalem, den e aksi: ’Pe na pikin de di ben gebore foe tron kownoe foe den djoe? Wi ben si en stari èn ben kon foe saka kindi na fesi en.’

Te kownoe Herodes na ini Jeruzalem e jere disi, a e broeja pikinso. Foe dat’ede a e kari den granpriester kon na en èn e aksi: ’Pe na Kristus ben sa gebore.’ Dan Herodes e seni teki den astroloog èn e taigi den: ’Go soekoe a pikin, èn efoe joe feni en, joe moe kon baka èn ferteri mi dati, sodati mi toe kan go saka kindi na fesi en.’ Ma ini en ati Herodes wani feni a pikin foe kiri en!

Te den ben gwe, wan toemsi ferwondroe sani e pasa. A stari di den ben si di den ben de na ini oostsé, e waka na den fesi. A de krin dati disi no de wan kewon stari, ma a de spesroetoe foe tjari den. Den astroloog e tan waka baka na stari te leki a e tan tanapoe leti na tapoesé foe na oso pe Jozef nanga Maria e tan.

Te den astroloog e go na inisé foe na oso, den e feni Maria nanga en pikin Jezus. Alamala e boigi na fesi en. Èn foe den tas foe den nanga san den e reis den e poeroe kado kon a doro: gowtoe, wierook, nanga mirre. Bakaten te den de so fara foe drai go baka foe ferteri Herodes pe a pikin de, Gado e warskow den na ini wan dren dati den no moe doe dati. Foe dat’ede meki den e teki wan tra pasi go baka na den égi kondre.

Soema ben sa kan sorgoe dati na stari dati ben boewégi ensrefi pasa na a hemel foe sori den astroloog na pasi? Prakseri dati na stari no ben tjari den go langalanga na Jezus na ini Bethlehem. Nono, a ben tjari den go na Jeruzalem pe den ben abi kontakt nanga kownoe Herodes di ben wani kiri Jezus. Èn dati a ben sa doe foe troe efoe Gado no ben kon a mindri èn ben warskow den astroloog foe no taigi dati na Herodes. A ben de a féjanti foe Gado, Satan Didibri, di ben wani kiri Jezus, èn a ben wani gebroiki a stari dati foe doro en marki. Mattéus 2:1-12; Micha 5:2.

◆ San e sori dati na stari di den astroloog ben si no ben de wan kewoon stari?

◆ Pe Jezus ben de di den astroloog ben feni en?

◆ Fa wi sabi dati Satan ben sorgoe foe na stari di ben sori den astroloog na pasi?