Jezus libi nanga diniwroko

Den ben aksi Jezus foe na hori foe faste

PIKINMORO wan jari pasa sensi Jezus ben de na a Pascha foe 30 G.T. Johannes na Dopoeman de now wan toe moen kaba na ini straf’oso. Aladi a ben wani dati en discipel ben sa tron bakaman foe Kristus, tokoe den alamala no ben doe dati.

Now wantoe foe den discipel foe Johannes di de na ini straf’oso e kon na Jezus èn e aksi: „Foe san-ede wi nanga den Fariséman e hori faste, ma joe discipel no e hori faste?” Den Fariséman abi na gwenti foe hori faste toe tron ini wan wiki foedi disi de wan gwenti foe a fasi foe bribi foe den, èn kande den discipel foe Johannes e hori sowan gwenti toe. A kan de ooktoe dati den e hori faste foedi den e sari foe na de di Johannes de ini straf’oso èn dati den e aksi densrefi foe san-ede den discipel foe Jezus no e teki prati na a sori foe sari disi.

Jezus e piki den nanga a ferklari di e kon now: „Den mati foe na trowman no abi réde tog foe sari solanga na trawan de na den? Ma den dé sa kon dati den sa teki a trowman poeroe foe den, èn dan den sa faste.”

Den discipel foe Johannes moe memre ete dati Johannes ben taki srefi foe Jezus leki na bruidegom. Solanga Jezus de, dan Johannes no boo feni en soboen wan sani di fiti, foe faste èn so Jezus discipel e prakseri ooktoe foe a tori. Bakaten te Jezus dede, dan en discipel e sari èn e faste. Ma efoe a opobaka foe dede èn e opo go na hemel, dan den no abi nowan réde moro foe sari èn faste.

Baka dati Jezus e ferteri na agersitori disi di e kon: „Nowan sma e nai wan pisi krosi di no krempi tapoe wan owroe tapsé krosi; bikasi na pis krosi nanga na heri krakti foe en ben sa hari na tapsé krosi, sodati na priti ben sa kon moro bigi ete. Ooktoe sma no e poti njoen win na ini owroe winsaka; ma efoe den doe dati, dan den win-saka e baster dan a win o lon komoto foe en èn den win-saka lasi. Ma njoen win sma e poti na ini njoen win-saka.” San den agersitori disi abi foe doe nanga faste?

Jezus ben jepi Johannes discipel foe si dati nowan sma moe ferwakti dati en bakaman ben sa hori densrefi na owroe gwenti foe na Judaïsme, soleki a gwenti foe faste. En no ben kon foe lapoe èn foe meki owroe systema foe anbegi di verslijt, èn di ben de sofara foe poeroe a pasi, tan. Sma no ben sa dwengi na kristendom foe fiti ensrefi na a Judaïsme nanga den libisma gwenti di ben de ini a ten dati. None, a no ben sa de leki wan njoen pis krosi tapoe wan owroe krosi ofoe njoen win na ini owroe winsaka. Mattéus 9:14-17; Markus 2:18-22; Lukas 5:33-39; Johannes 3:27-29.

◆ Soema ben abi na gwenti foe faste, èn nanga sortoe marki?

◆ Foe san-ede Jezus discipel no ben faste solanga a ben de na den, èn foe san-ede baka dati réde no ben de foe faste moro?

◆ Sortoe agersitori Jezus ben ferteri, èn san den wani taki?