Fu san-ede yu musu sabi na tru tori di e go fu Abraham

ABRAHAM — wan deki-ati man fu anansitori ofu wan tru profeyti? O prenspari na piki de tapu na aksi dati? Leki fa na beybri teri fu ten e taki dan Abraham ben libi so wan fo dusun yari psa kba. Son sma fu dati-ede ben sa kan taki-go-taki-kon: ’Sortu difrenti a e meki efu a ben libi trutru ofu no?’

Now, afu fu den sma di e libi na grontapu de fu fasi fu bribi di e taki taki den e bribi na ini Abraham. Leki fa a 1988 Britannica Book of the Year e taki dan 32,9 procent fu grontapu de kresten sma, 17,2 procent Islam sma nanga 0,4 procent dyu sma, èn na ini ibriwan fu den dri relisi disi Abraham de wan prenspari sma. A no de fu taki taki opregti bribiwan fu den fasi fu bribi disi sa wani ondrosuku fu sabi seyker taki san den leri den fu Abraham de tru. Srefi den sma di de fu tra fasi fu anbegi ofu kweti kweti no abi wan fasi fu anbegi ben sa musu abi belangstelling gi na afersi. Fu san-ede?

Fu di beybri e taki taki Abraham ben de wan profeyti (Genesis 20:7). Dati na wortu fu beybri gi wan takiman fu Gado di abi wan boskopu gi tra sma. Efu Abraham ben de wan tru profeyti, dan gi ala sma wan bun sani de fu wini. Fu san-ede? Fu di na boskopu di a ben kisi, ben abi bun nyunsu gi na heri libismafamiri (Galasiya sma 3:8). Leki fa na beybri taki dan Gado ben pramisi Abraham: „Ala famiri fu grontapu seyker sa blesi den srefi nanga yepi fu yu.” — Genesis 12:3.

Dati na wan pramisi di e psa na denki fu wi, èn Abraham ben yere na pramisi dati na moro pikinso tu tra okasi ete (Genesis 18:18; 22:18). Gi na kon tru fu en na Gado fu Abraham sa meki srefi wan opobaka komoto fu dede kon gi sma di e teki presi gi famiri di dede. A libi sa de wan blesi gi den sortu sma disi di wiki opo fu dede trutru bika moro furu fu den te den dray kon baka sa miti nanga wan grontapu siuwâsi di gersi na paradeysi di libisma ben lasi bigin bigin. Baka dati den sa kisi leri fa den kan kisi na blesi fu têgo libi. — Genesis 2:8, 9, 15-17; 3:17-23.

Efu Abraham na a tra sey de soso wan sma fu anansitori, dan no wan fondamenti ben sa de fu bribi na ini na moy pramisi di a ben kisi. Èn efu wan sma no kan bow tapu den pramisi na ini beybri, dan son sma ben kan taki-go-taki-kon fu gi den srefi krin krin na den prisiri fu na disiten libl. Wan fu den fositen kresten sma ben skrifi fu disi: „Efu den dedewan no e wiki, ’meki wi nyan èn dringi dan, bika tamara wi dede’” — 1 Korente sma 15:32.

Yu abi so bun ala reyde fu hori yu srefi bezig nanga na aksi efu Abraham ben de soso wan deki-ati man fu anansitori ofu taki a ben de wan tru profeyti. A sa seki yu kande fu sabi san prenspari kerki fesiman fu na di fu neygi yarihondro ben taki fu disi. Ini ala a yuruten dati archeoloog sma ben feni fruwondru sani di e go kontrari den denki fu den kerki fesiman dati.