Kownukondre preykiman e fruteri

„De nanga faya na ini yeye” na ini Meksikow

„NA heri kondre gersi leki a de nanga faya èn e seki fu aktiviteit.” Na so na bijkantoro fu na Wachttorengenootschap na ini Meksikow e skrifi èn o tru den wortu dati de! Na aktiviteit di e seki sani na ini a kondre dati de fu si na ini disi, taki te nanga augustus yu ben abi 70 ala mun heymarki di ben waka baka makandra, nanga na moro hey nomru fu 277.436 preykiman te nanga now. Boyti fu dati, rapport ben fruteri fu moro leki 400.000 beybristudi, èn na nomru fu fisitiman fu na Memrefesa fu na yari di psa ben doro 1.046.291. Fa disi de wan tumusi moy fondamenti fu gro na ini a ten di e kon!

Wan heymarki fu 1989 ben de wan kenki na ini na status fu Yehovah Kotoygi na ini Meksikow. Leki wan bakapisi fu disi, dan den kan kobroyki na beybri fu na fositron na ini na oso-fu-oso-preykiwroko èn den ben kan bigin den konmakandra nanga begi. Disi ben abi wan bun bakapisi wantronwantron. Ini tu mun ten na nomru fu preykiman ben frey go na loktu nanga moro leki 17.000.

Na prisiri fu den brada nanga sisa fu den sani disi di psa ben de fu si na ini den sani di den ben taki. Wan fu den ben skrifi: „Di na brifi ben leysi na ini na gemeente, dan a leysiman tu tron ben musu stòp, fu di sma ben kisi a firi fu klòp. A ben de wan span sani!” Wan trawan ben taki: „Wi no ben kan dwengi den watra-ay fu wi fu prisiri ede. Den bun bakapisi kon a krin fu di wi e hori unsrefi moro betre na ten. Ibriwan sma wani de biten fu yere na fosi begi.”

„Na ini wi gebied”, wan tra Kotoygi ben taki, „wan uma di ben abi fu du fayafaya nanga a beybristudi programa fu na Katolik Kerki ben taki: ’Efu na fesi kba [den kotoygi] ben tapu wi mofo nanga soso den wortu di den ben taki èn nanga den tijdschrift di den ben kobroyki, dan wi no sabi pe fu tan now di den e opo a beybri na den doro!’”

Yehovah Kotoygi na ini Meksikow e poti krakti so srefi na tapu okasipreyki nanga na beybri. Wan sisa ben go na wan uma di ben aksi san a ben prakseri fu a puru fu bere. Na Kotoygi ben piki: „San mi e denki, no de so prenspari leki san a beybri e taki.” Baka di a ben leysi difrenti tekst, na sisa ben taki-go-taki-kon: „Libi de gi na Mekiman wan tumusi prenspari sani, srefi a libi fu den sma di no koboru ete.”

Na uma ben piki taki a ben e fruwakti en fosi beybi, ma datra ondrosuku ben sori taki na beybi ben sa abi wan mankeri. A datra fu en ben wani fu meki a puru a bere èn en masra ben agri nanga dati, ma na uma srefi ben e degedege ete. Na preykiman ben tan taki-go-taki-kon nanga en moro fara nanga na beybri, èn baka di a ben gi en nen, den ben prati fu makandra.

Na wan distriktkongres di ben hori feyfi yari a baka, dan wan trowpaar nanga wan fo yari owru pikin ben wani fu miti na sisa nanga en masra. A ben de na srefi uma! San ben psa? Baka di a ben taki nanga na Kotoygi, dan na uma ben teki na bosroyti fu meki na beybi fu en. A datra fu en ben weygri fu behandel en morofara èn en masra srefi ben tapu skreki gi en taki a o gwe libi en efu a beybi ben sa koboru nanga wan mankeri. Di na ten ben doro gi en fu meki a pikin, a ben go kowôn na a fosi datra di a ben kan feni fu yepi en.

Wantewante baka di na beybi ben koboru, na datra ben taki: „Mi e fristeri yu, mami! Yu kisi wan moy umapikin.” Di a no ben kan bribi en yesi, a ben aksi a datra fu ondrosuku na beybi finifini. Dan a ben fruteri en na tori fu en. A datra ben kan taki nomo: „Disi na wan wondru.” Na uma ben prisiri taki a ben abi na deki-ati fu respeki na fasi fa Yehovah e si na santafasi fu libi, èn a ben gi na moy gosontu beybi na nen fu na sisa. So esi leki a ben tranga nofo, a ben go suku den Kotoygi èn ben bigin studeri na beybri nanga den. Fosi wan yari na uma nanga en masra ben teki dopu.

Na apostru Paulus ben gi na deki-ati: „De nanga faya na ini yeye. Dini Yehovah leki srafu” (Rome sma 12:11). Yehovah Kotoygi na ini Meksikow neleki tru kresten na ini tra presi, e teki na deki-ati disi nanga den heri ati. Dati meki na heri kondre de nanga faya èn e seki fu den yeye aktiviteit. Fa Yehovah e blesi den kotrow-wan fu en furu!