Efu wan famiriman di wi lobi dede

„INI 1981 kanker ben kiri mi mma. A ben de mi kwekimma. Na dede fu en ben seki mi nanga mi kwekibrada hebi. Mi ben de tinaseybi yari èn mi brada erfu. Mi ben misi mi mma srefisrefi. Mi ben kweki leki wan lomsu, èn fu di mi ben leri taki mi mma ben de na ini heymel, meki mi ben wani kiri mi srefi fu de nanga en. Mi mma ben de na moro bun mati fu mi.” — Roberta, 25 yari.

Yu ben miti so wan sani tu? Efu dati de so, dan ondrofeni meki yu sabi fa a de wan hati sani fu lasi wan sma ini dede di yu lobi. A gersi taki a no de nanga leti taki dede abi a makti fu puru wan sma na pasi di yu lobi. Èn efu a psa, dan na prakseri taki yu no kan taki ofu lafu ofu brasa yu lobi famiriman noyti moro, kan de wan heri muylek sani fu tyari. So leki e kon a krin ini den wortu fu Roberta, dan na pen dati no e puru na pasi te yu kisi fu yere taki den lobiwan fu yu de na ini heymel.

Ma fa yu ben sa firi yu srefi efu yu ben sabi taki na ini na krosibey ten di e kon yu ben kan de baka nanga den, nôno, no na ini heymel, ma leti dya na grontapu, ondro regtfardiki omstandigheid fu vrede? Èn fa yu ben o feni en efu yu ben sabi tu taki na a ten dati ala sma sa abi dan na fruwakti fu prisiri na ini volmaakti gosontu sondro fu abi fu dede oyti? ’Dati de seyker wan prakseri di yu winsi!’, yu ben sa taki kande.

Toku na ini na fosi yarihondro G.T. Yeyses Krestes ben taki den krakti wortu disi: „Mi na a opobaka èn na libi. A sma di e sori bribi na ini mi, awinsi a dede a sa kon a libi baka” (Yohanes 11:25). Dati ben de wan pramisi taki den dedewan sa libi baka — trutru wan span fruwakti!

Ma kande yu e aksi yu srefi: ’Wan bun fondamenti de gi sowan bribi? Fa mi kan de seyker taki a no de soso wan prakseri di mi e winsi? Èn efu wan fondamenti de fu dati, dan san na kontru fu na pramisi disi kan wani taki gi mi nanga mi lobiwan?’ Den aksi disi nanga trawan wi sa taki fu den na ini na tra artikel.