„A wefi foe joe jongoejari”

„SOETADOE pikinmoro e sori taki a de wan aladei sani.” Na so foeroe sabiman e taki, so leki Los Angeles Times e skrifi. A froeklari disi e froewondroe joe? Tokoe, lawman-datra Frank Pittman e prakseri taki so wan 50 procent foe den trowmasra èn 30 te 40 procent foe den trow-oema no ben de getrow. Efoe dati de troe, dan pikinmoro afoe foe ala den sma di trow, e doe soetadoe!

Disi wani taki, dati hoeroedoe boen? Nôno, kwetikweti! A panja foe a de di sma no de getrow na ini a trowlibi, no e meki taki a boen — neleki fa a gro foe ogridoe na strati no e meki a boen foe ròs wan sma. Hoeroedoe e ati sma. Foe eksempel, ini a ten disi a libisma famiri e pina foe kefarlek siki di sma e kisi foe seks, sani di sma ben kan dwengi makriki efoe den ben libi wan moreel libi. A siki AIDS, di e kiri sma, noiti ben o kon so fara efoe sma no ben de so broejabroeja nanga a sekslibi foe den.

Boiti dati, srefi a moro koni sma èn a sma nanga „krin froestan” e firi foeroe pen te den patna foe den no de getrow. Wan doe foe a getrow di sma no de getrow ini a trowlibi, kan meki soro di e teki afoe foe wan sma en libiten foe kon betre.

Ma a moro prenspari penti de taki foe no teki den pramisi foe a trowlibi serjoesoe, na wan kefarlek takroe fasi foe no abi lespeki gi Gado, foe di en de a Sma pe a trowlibi feni en bigin. Bijbel e taki: „A trowlibi moesoe de krin na mindri ala sma.” Wi ben kisi a warskow toe: „Gado sa kroetoe hoeroeman nanga soetaman.” — Hebrewsma 13:4.

Foe dati ede, koni sma e teki a rai foe den wortoe disi di skrifi nanga jepi foe santa jeje: „Prisiri nanga a wefi foe joe jongoejari” (Odo 5:18). Den e soekoe satisfaksi nanga kolokoe na a trowpatna foe den. Te den e doe disi, dan den e kibri a gesontoe foe den na skin fasi èn na emotioneel sei, èn san de moro prenspari, den e gi grani na a moro bigi Sma, Jehovah Gado pe a trowlibi feni en bigin.