„Den leili foe a sabana”

A DE di sma de sondro wroko. Den prijs di e kren. Pôtifasi. A de di na ekonomia no de steifi srefisrefi. Den wortoe disi e kon moro nanga moro foeroe ini den spesroetoe sjatoe njoensoe di den e meki bekènti. Èn den e sori den moeilèk sani di miljoenmiljoen sma e miti te den e doe moeiti foe gi den osofamiri foe den njanjan nanga krosi èn dati den abi wan presi foe libi.

A abi krakti tapoe bribiman so srefi toe tapoe sma di no de na bribi. Ma den bribiman no tanapoe den wanwan te den miti den problema dati. Di Jesus ben taki nanga sakafasi sma foe na fosi jarihondro, a ben taki: „Loekoe den fowroe foe hemel boen, bika den no e sai, èn den no e koti èn den no e tjari sani poti na ini maksin; tokoe oenoe hemel Tata e gi den njanjan. Oenoe no moro warti leki den disi?” — Mateus 6:26.

Jesus ben taki toe: „Leri wan les foe den leili foe a sabana, fa den e gro; den no e wroko tranga èn den no e drai keke (spinnen); ma mi e taigi oenoe taki srefi Salomo na ini ala en glori no ben weri moi leki den disi. Efoe, now, Gado e weri krosi na so wan fasi gi den prani foe a sabana, . . . dan a no moro esi a sa weri krosi gi oenoe?” — Mateus 6:28-30.

Disi wani taki dati wan kresten no abi foe wroko foe sorgoe ensrefi? Kwetikweti! Wan kresten e wroko tranga so leki a de fanowdoe foe a pai den paiman foe en. Na apostel Paulus ben taki: „Efoe wan sma no wani wroko no meki a njan toe.” (2 Tesalonikasma 3:10) Tokoe, a kresten sabi a lobi sorgoe foe Gado èn taki en hemel Tata e loekoe en. So boen den sorgoe foe a libi no e naki en poeroe na balansi. Srefi ini moeilèk ten, a e poti den fosi sani — jeje sani — na a fosi presi. A e bribi den wortoe foe Jesus: „Tan soekoe dan fosi a kownoekondre nanga en regtfardikifasi, èn ala den tra sani disi den sa gi oenoe na tapoe.” — Mateus 6:33.