A njanjan disi kan wani taki wan sani gi joe?
A FOEROE moen e meki a kondre swen ini safoe leti. Ini wan tapoesei kamra foe wan tanpresi ini a hondrohondro jari owroe Jerusalem, 12 mansma kon makandra lontoe wan tafra. Erfoe e arki boen troetroe te a Leriman foe den ben bigin seti wan toemoesi prenspari sani di den ben moesoe tan doe èn e taki wortoe di de toemoesi prenspari. Wan tori e taki:
„Jesus [Krestes] ben teki wan brede, èn baka di a ben aksi na blesi, a ben broko en èn ben gi dati na den disipel en ben taki: ’Teki, njan. Disi wani taki mi skin.’ So srefi a ben teki wan kan, èn baka wan begi foe gi tangi, a ben gi dati na den ala di a ben taki: ’Oenoe alamala dringi foe en; bikasi disi wani taki mi broedoe foe a froebontoe, dati sa kanti trowe foe na boen foe foeroe sma foe pardon foe sondoe. Ma mi e taigi oenoe: „Foe bigin foe now kwetikweti mi no sa dringi wan sani moro foe a droifibon disi te na a dei dati te mi sa dringi en njoen nanga oenoe na ini a kownoekondre foe mi Tata.” Te foe kaba, baka di den singi prèise singi den ben go na doro na a Olijfbergi.” — Mateus 26:26-30.
Disi ben feni presi baka di sondongo na tapoe a di foe 14 dei foe na djoe moen Nisan ini a jari 33 foe wi gewoon teri. Jesus nanga den apostel foe en ben hori a Paskafesa didjonsrode foe memre a fri di Israèl ben kon fri foe katibo na Egipti ini a di foe 16 jarihondro bifo G.T. Krestes ben seni Judas Iskariot gowe, di ben de foe go foe tori en. Foe dati ede, Jesus wawan nanga den 11 loyaal apostel foe en ben de drape.
A neti njanjan disi no ben de wan go doro foe a djoe Paska. A ben de wan njoen sani di den ben kon kari na Avondmaal foe Masra. Foe a sani disi di den ben moesoe hori, Jesus ben gi den bakaman foe en komando: „Tan doe disi foe memre mi” (Lukas 22:19, 20; 1 Korentesma 11:24-26). Foe san ede a ben taki disi? Èn fa a sani disi di pasa hondrohondro jari kaba kan wani taki wan sani gi joe?