Wan moifasi di no e lasi gowe safrisafri

„MOIFASI e lasi gowe; moifasi e pasa gowe”, a poewemaman Walter De la Mare ben taki. Disi de seiker so nanga den toemoesi moi cactus bromki foe san den poti wan prenki djaso. A glori foe den e lasi gowe esi-esi.

A kresten disipel Jakobus ben skrifi: „Leki wan bromki foe den sani di prani a [a goedoe man] sa pasa gowe. Bikasi a son e opo nanga a kefarlek faja foe en èn e meki den sani di prani kon drei, èn den bromki foe den e fadon komoto èn a moifasi fa a e loekoe foe dorosei e pori gowe. Na so toe a goedoeman sa lasi gowe ini den fasi foe libi di a abi”. — Jakobus 1:10, 11.

Ini a grontapoe disi pe sani no de seiker, goedoe kan lasi fosi joe denki. Moro fara, a goedoe man — neleki ibriwan tra sma — e libi — ’sjatoe, neleki wan bromki’ (Job 14:1, 2). Jesus ben froeteri na agersitori foe wan man di ben feti foe tjari goedoe kon na wan so taki a ben kan sidon langa en foetoe. Ma di a ben denki taki a ben abi ala sani di de fanowdoe gi wan fri libi, a ben dede. Jesus ben warskow: „Na so a e waka nanga a man di e tjari goedoe kon na wan gi ensrefi, ma di no goedoe ini a tori foe Gado.” — Lukas 12:16-21.

„Goedoe ini a tori foe Gado”. San Jesus ben wani taki nanga dati? Wan man di goedoe na a fasi disi abi “goedoe na hemel” — wan boen nen na Godo. Den sortoe goedoe dati no abi foe lasi gowe safrisafri noiti (Mateus 6:20; Hebrewsma 6:10). Na presi foe de leki wan bromki di e flaw, den e agersi so wan man na ini bijbel nanga wan bon, di den wiwiri foe en no e kon drei. Èn wi de seiker taki, „ala sani di a e doe sa waka boen”. — Psalm 1:1-3, 6.