Joe e si bijbel leki wan sani di abi waarde?
SO WAN 200 jari pasa, Marie Jones ben gebore ini Lanfihangel, wan farawe pikin foto foe Wales no fara foe na Atlantis sjoro. En papa nanga mama ben de pôti sma di ben meki krosi — toemoesi pôti foe abi wan bijbel srefi. Ma den ben leri na oemapikin foe den safrisafri foe abi wan lobi gi Gado, foe di den ben froeteri en bijbel tori èn den ben taki ibritron baka foe tekst di den ben memre. Foeroetron Marie ben leisi wan bijbel foe Wales foe wan foe den birtisma èn ben bigin foe kibri ala pikinso moni san a ben man kibri, nanga a fasti bosroiti foe bai wan gi ensrefi.
Ini a jari 1800, di Marie ben abi 16 jari, a ben jere taki wan toe bijbel foe Wales ben de foe seri 40 kilometer moro fara ini a pikin foto Bala. Sondro frede, a ben teki a fasti bosroiti foe waka go drape. Disi a ben doe, a waka abra den bergi soso-foetoe. Ma, di a doro drape, ala eksemplaar ben seri kaba. Marie ben kon sabi toe taki a moni di a ben kibri no ben de nofo srefisrefi.
A sabi foe Marie nanga a lobi foe en gi bijbel, ben naki na ati foe a domri foe drape. Di a domri si den watra-ai foe Marie foe di a froewakti foe Marie no ben kon troe baka ala moeiti di a ben meki, dan nanga switifasi a domri ben gi Marie en eigi eksemplaar, èn a ben taki: „Leisi en finifini, studeri en fajafaja, kibri den santa wortoe ini joe froestan leki wan sani di abi waarde, èn libi joe libi akroederi den leri foe en.”
Baka ten a tori disi ben froeteri tapoe wan konmakandra foe a Komte foe a Kerki Traktaat Genootschap foe Londen. Drape a bosroiti ben teki foe prati bijbel di vertaal ini tra tongo, no wawan gi den sma foe Wales ma gi a heri grontapoe. A fosiwan foe den someni Bijbel genootschap foe a di foe 19 jarihondro, ben komoto na a eenvoudig bigin disi. Baka dati, eksemplaar foe bijbel ini tra tongo bigin kon na doro ini moro foeroe nomroe.
Ini a ten disi, a Watch Tower Bible and Tract Society, di bigin ini 1884, e druk bijbel nanga jepisani foe studeri bijbel ini moro leki 200 tongo. Na heri grontapoe, a ben prati 72 miljoen eksemplaar foe a Nieuwe-Wereldvertaling van de Heilige Schrift (Njoen Grontapoevertaling foe den Santa Boekoe foe Bijbel) ini a disiten tongo. A heri Njoen Grontapoevertaling di den vertaal foe a Hebrewtongo nanga a Grikitongo, de foe kisi now kompleet noso pisi foe dati ini 18 tongo èn now den e vertaal en ini 12 tra tongo.
Foe di bijbel de foe kisi now pikinmoro gi ibri sma, fa joe e prakseri foe en? Joe e si bijbel leki wan sani di abi waarde? Joe abi wan eksemplaar di joe e kibri leki wan sani di abi waarde èn joe e leisi en?
[Sma di abi a reti foe a prenki na tapoe bladzijde 3]
Foe a boekoe The Story of Mary Jones and Her Bible (A tori foe Marie Jones nanga a bijbel foe en)