No hori sma na ati
TE WAN sma hati den firi foe wi, dan a kan sori foe de wan toemoesi bigi tjalensi foe no hori a sma dati na ati. Bijbel abi praktis rai gi den sortoe situwâsi dati. „De nanga atibron”, na apostel Paulus ben skrifi, „ma tokoe, joe no moesoe sondoe; no meki son dongo ala di joe de na ini wan atibron fasi.” — Efeisesma 4:26.
Te wan sma e doe wi wan ogri, dan a de soso wan gewoon sani taki wi e firi pikinso atibron. Taki Paulus e taki foe „de nanga atibron”, e sori taki na atibron kande fiti son tron — kande foe di wan sma no handri boen nanga wi noso foe di wan sma no sori retidoe na a fasi fa a ben moesoe doe dati. (Teki gersi 2 Korentesma 11:29.) Ma te a tori no seti, dan srefi atibron di fiti kan abi takroe bakapisi, èn a kan meki wan sma doe wan bigi sondoe (Genesis 34:1-31; 49:5-7; Psalm 106:32, 33). So boen, san joe kan doe te joe firi taki joe de ini wan atibron fasi?
Ini moro foeroe foe den situwâsi pe pikin sondoe de ini a tori, dan joe kan seti a tori na ini joe ati „èn no taki noti” noso go na a sma di hati joe firi èn taki nanga en foe dati (Psalm 4:4; Mateus 5:23, 24). Ma awansi fa a tori e waka, a moro boen foe seti a tori esi-esi so taki a firi dati foe hori wan sma na ati no e meki bita-ati kon di kan abi sari bakapisi. — Efeisesma 4:31.
Jehovah e gi wi pardon foe wi sondoe na wan frifasi, srefi foe sondoe di wi no sabi srefi taki wi e doe den foe di wi no ben poti prakseri na sani tapoe. Wi no kan gi wan kompe libisma pardon gi den pikin sondoe na a srefi fasi dan? — Kolosesma 3:13; 1 Petrus 4:8.
A de wan moi sani foe si taki a Griki wortoe gi „foe gi pardon” troetroe wani taki „foe libi a tori leki fa a de”. Te wi e gi wan sma pardon dan dati no wani taki dati wi e meki a sondoe sori so wan pikin sani noso taki a no de so prenspari. Son tron a abi na ini foe ’libi a [situwâsi] leki fa a de’, foe di wi e froestan taki te wi hori wan sma na ati dan a sa meki a lai foe joe kon moro hebi nomo èn a sa pori a wánfasi na ini a kresten gemeente. Boiti dati, a kan pori a gosontoe foe joe te joe e hori wan sma na ati! — Psalm 103:9.