Joe e memre disi ete?
Joe ben poti boen prakseri na tapoe den uitgave foe A Waktitoren foe den moen di pasa? Kande joe feni en wan moi sani foe memre san e kon now:
◻ Fa wan sma e ’kon na Jesus’ akroederi a kari di a e gi na Mateus 11:28?
Jesus ben taki: „Efoe wan sma wani waka na mi baka, dan a moesoe drai baka gi ensrefi èn teki en pina-oedoe èn waka doronomo na mi baka” (Mateus 16:24). So boen, foe kon na Jesus, wani taki dati wan sma moesoe saka na eigi wani foe en na ondro a wani foe Gado nanga a wani foe Krestes, èn a moesoe teki wan lai foe frantiwortoe, èn a moesoe tan doe dati doronomo. — 1/8, bladzijde 24.
◻ Fa a djaroesoe di libisma e djaroesoe kan abi wan boen marki?
A kan boeweigi wan sma foe kibri wan lobiwan gi takroe krakti di kan wroko na en tapoe. Moro fara, na wan joisti fasi libisma kan sori djaroesoe gi Jehovah èn gi na anbegi foe en (1 Kownoe 19:10). — 1/9, bladzijde 19.
◻ San de toemoesi prenspari foe kan abi wan trowlibi èn wan osofamiri-libi di abi boen bakapisi?
Foe kisi so wan bakapisi di wi wani srefisrefi, dan ala ten trowpatna moesoe poti a wani foe Gado na a fosi presi. Te den trowpaar e doe disi, dan den e proeberi foe tan na makandra èn foe loesoe den problema foe den nanga jepi foe a gebroiki di den sa gebroiki a rai foe Gado Wortoe. Foe dati ede, den no abi no wan pen di e kon te den no e gi jesi na a wani foe Gado (Psalm 19:7-11). — 1/10, bladzijde 9.
◻ O ten Jesus e sidon na tapoe en kownoestoeroe na ini na agersitori foe den skapoe nanga den bokoboko èn foe san ede? (Mateus 25:31-33)
Na agersitori no e sori a sidon di a e sidon na a fasi disi taki a e tron Kownoe. Na presi foe dati, a e sidon leki Kroetoeman. A kroetoewroko dati a no wan sani di doro wan boen langa ten foe foeroe jari langa. Na presi foe dati, na agersitori e sori go na a ten di e kon te Jesus sa leisi kroetoestrafoe èn tjari dati kon na tapoe den nâsi na ini wan sjatoe pisi ten. — 1/10, bladzijde 26, 27.
◻ San na a „geslakti” di Jesus ben taki doronomo foe en?
Jesus ben gebroiki den wortoe „a geslakti disi” gi den groepoe sma foe en ten nanga den „breni tjariman” foe den, di makandra, ben de a djoe nâsi (Mateus 11:16; 15:14; 24:34). — 1/11, bladzijde 12.
◻ Na san den wortoe „a geslakti disi” e sori go, na ini a lasti kontroe foe a profeititori foe Jesus na Mateus 24:34-39?
Soleki fa a sori, dan Jesus e sori go na den sma na grontapoe di e si a marki foe a denoja foe Krestes, ma e weigri foe kenki den pasi. — 1/11, bladzijde 17.
◻ Fa a seti di den loweman foto ben seti nanga den skotoe foe den, ben de wan boen sani gi a pipel na Israel foe owroeten?
A ben naki na ati foe den Israèlsma foe si taki den no moesoe abi wan mi-no-ke-fasi gi a libi foe wan libisma. So srefi a ben poti krakti na tapoe a fanowdoe foe sori sari-ati te a fiti (Jakobus 2:13). — 1/11, bladzijde 24.
◻ San na a sani di gersi a loweman foto?
Disi na a sani di Gado seti foe kibri wi foe dede foe di wi e pasa a komando foe en di e sori taki broedoe na wan santa sani (Genesis 9:6). — 1/11, bladzijde 27.
◻ Fa a kresten bradafasi kan jepi wi foe „kisi krakti baka”? (Jesaja 40:31)
Na mindri den kresten brada nanga sisa foe wi, wan toe foe den de di kande abi foe doe nanga den srefi sortoe druk nanga tesi èn di kande e firi a srefi fasi fa wi e firi (1 Petrus 5:9). Wi no e weri wi ede moro èn a e tranga wi bribi efoe wi sabi taki san e miti wi, no de wan freimde sani èn taki tra brada nanga sisa ben firi a srefi fasi fa wi e firi now. — 1/12, bladzijde 15.